8.177

अनुलोमप्रतिलोमे महासमुद्रे मनुष्यानवचरिते अनुलोमप्रतिलोमा वायवो वान्ति

anulomapratilome mahāsamudre manuṣyānavacarite anulomapratilomā vāyavo vānti

8.178

तत्र यो ऽसौ पुरुषो भवति महेशाख्यो महेशाख्यदेवतापरिगृहीतः स महता पुण्यबलेन वीर्यबलेन चित्तबलेन महान्तं प्लवमास्थाय अनुलोमप्रतिलोममहासमुद्रम् अवतरति

tatra yo 'sau puruṣo bhavati maheśākhyo maheśākhyadevatāparigṛhītaḥ sa mahatā puṇyabalena vīryabalena cittabalena mahāntaṃ plavamāsthāya anulomapratilomamahāsamudram avatarati

8.179

स यन्मासेन गच्छति तदेकेन दिवसेन प्रत्याह्रियते

sa yanmāsena gacchati tadekena divasena pratyāhriyate

8.180

एवं द्विस् त्रिः

evaṃ dvis triḥ

8.181

ह्रियमाणश्च प्रत्याह्रियमाणश्च यदि मध्यमामुदकधारां प्रतिपद्यते एवमसौ मैत्रीबलपरिगृहीतो लोकहितार्थमभ्युद्गम्योत्तरति निस्तरति अभिनिष्क्रमति

hriyamāṇaśca pratyāhriyamāṇaśca yadi madhyamāmudakadhārāṃ pratipadyate evamasau maitrībalaparigṛhīto lokahitārthamabhyudgamyottarati nistarati abhiniṣkramati

8.182

अनुलोमप्रतिलोमं महासमुद्रं समतिक्रम्य अनुलोमप्रतिलोमो नाम पर्वतः

anulomapratilomaṃ mahāsamudraṃ samatikramya anulomapratilomo nāma parvataḥ

8.183

अनुलोमप्रतिलोमे महापर्वते ऽमनुष्यावचरिते ऽनुलोमप्रतिलोमा नाम वायवो वान्ति यैः पुरुषस्तिमिरीकृतनेत्रो नष्टसंज्ञः संतिष्ठते

anulomapratilome mahāparvate 'manuṣyāvacarite 'nulomapratilomā nāma vāyavo vānti yaiḥ puruṣastimirīkṛtanetro naṣṭasaṃjñaḥ saṃtiṣṭhate

8.184

स वीर्यबलेनात्मानं संधार्य तस्मादेव महापर्वतादमोघां नामौषधीं समन्विष्य गृहीत्वा नेत्रे अञ्जयित्वा शिरसि बद्ध्वा समालभ्य अनुलोमप्रतिलोमं नाम महापर्वतमभिनिष्क्रमितव्यम्

sa vīryabalenātmānaṃ saṃdhārya tasmādeva mahāparvatādamoghāṃ nāmauṣadhīṃ samanviṣya gṛhītvā netre añjayitvā śirasi baddhvā samālabhya anulomapratilomaṃ nāma mahāparvatamabhiniṣkramitavyam

8.185

सचेदेतं विधिमनुतिष्ठते नास्य संमोहो भवति स्वस्तिक्षेमेणातिक्रमत्यनुलोमप्रतिलोमं महापर्वतम्

sacedetaṃ vidhimanutiṣṭhate nāsya saṃmoho bhavati svastikṣemeṇātikramatyanulomapratilomaṃ mahāparvatam

8.186

सचेदेवं विधिं वा नानुतिष्ठति औषधीं वा न लभते लब्ध्वा वा न गृह्णाति स षण्मासान् मुह्यति उन्मादमपि प्राप्नोति उच्छ्रित्य वा कालं करोति

sacedevaṃ vidhiṃ vā nānutiṣṭhati auṣadhīṃ vā na labhate labdhvā vā na gṛhṇāti sa ṣaṇmāsān muhyati unmādamapi prāpnoti ucchritya vā kālaṃ karoti

8.187

अनुलोमप्रतिलोमं महापर्वतं समतिक्रम्य आवर्तो नाम महासमुद्रः

anulomapratilomaṃ mahāparvataṃ samatikramya āvarto nāma mahāsamudraḥ

8.188

तत्र वैरम्भका वायवो वान्ति यैस्तदुदकं भ्राम्यते

tatra vairambhakā vāyavo vānti yaistadudakaṃ bhrāmyate

8.189

तत्र यो ऽसौ पुरुषो भवत्युदारपुण्यविपाकमहेशाख्यो देवतापरिगृहीतः स महता पुण्यबलेन वीर्यबलेन चित्तबलेन कायबलेन महान्तं प्लवमास्थाय आवर्तं महासमुद्रमवतरति

tatra yo 'sau puruṣo bhavatyudārapuṇyavipākamaheśākhyo devatāparigṛhītaḥ sa mahatā puṇyabalena vīryabalena cittabalena kāyabalena mahāntaṃ plavamāsthāya āvartaṃ mahāsamudramavatarati

8.190

स एकस्मिन्नावर्ते सप्तकृत्वो भ्रामयित्वा निरुध्यते

sa ekasminnāvarte saptakṛtvo bhrāmayitvā nirudhyate

8.191

योजनं गत्वा द्वितीये आवर्ते उन्मज्जते

yojanaṃ gatvā dvitīye āvarte unmajjate

8.192

स तस्मिन्नप्यावर्ते सप्तकृत्वो भ्रामयित्वा निरुध्यते

sa tasminnapyāvarte saptakṛtvo bhrāmayitvā nirudhyate

8.193

एवं द्वितीये तृतीये चतुर्थे पञ्चमे षष्ठे आवर्ते सप्तकृत्वो भ्रामयित्वा निरुध्यते योजनं गत्वा उन्मज्जते

evaṃ dvitīye tṛtīye caturthe pañcame ṣaṣṭhe āvarte saptakṛtvo bhrāmayitvā nirudhyate yojanaṃ gatvā unmajjate

8.194

एवमसौ मैत्रीबलपरिगृहीतो लोकहितार्थमभ्युद्गत उत्तरति निस्तरत्यभिनिष्क्रामति

evamasau maitrībalaparigṛhīto lokahitārthamabhyudgata uttarati nistaratyabhiniṣkrāmati

8.195

आवर्तं महासमुद्रमभिनिष्क्रम्य आवर्तो नाम पर्वतो ऽमनुष्यावचरितः

āvartaṃ mahāsamudramabhiniṣkramya āvarto nāma parvato 'manuṣyāvacaritaḥ

8.196

तत्र शङ्खो नाम राक्षसः प्रतिवसति रौद्रः परप्राणहरो महाबलो महाकायः

tatra śaṅkho nāma rākṣasaḥ prativasati raudraḥ paraprāṇaharo mahābalo mahākāyaḥ

Divyāvadāna