8.157

नास्माकं कृषिर् न वाणिज्यं न गौरक्ष्यम्

nāsmākaṃ kṛṣir na vāṇijyaṃ na gaurakṣyam

8.158

अनेन वयं जीविकां कल्पयामः

anena vayaṃ jīvikāṃ kalpayāmaḥ

8.159

ततः सुप्रियेण सार्थवाहेन पूर्विकां प्रतिज्ञामनुस्मृत्य दृढप्रतिज्ञेन तस्य चौरसहस्रस्य भाण्डमनुप्रदत्तम्

tataḥ supriyeṇa sārthavāhena pūrvikāṃ pratijñāmanusmṛtya dṛḍhapratijñena tasya caurasahasrasya bhāṇḍamanupradattam

8.160

सुप्रियो महासार्थवाहः संलक्षयति इमे चौरा लब्धं लब्धमर्थजातसंनिचयं कुर्वन्ति

supriyo mahāsārthavāhaḥ saṃlakṣayati ime caurā labdhaṃ labdhamarthajātasaṃnicayaṃ kurvanti

8.161

मया च महती प्रतिज्ञा कृता सर्वसत्त्वा धनेन मया संतर्पयितव्या इति

mayā ca mahatī pratijñā kṛtā sarvasattvā dhanena mayā saṃtarpayitavyā iti

8.162

सो ऽहमिमं चौरसहस्रं न शक्नोमि धनेन संतर्पयितुम्

so 'hamimaṃ caurasahasraṃ na śaknomi dhanena saṃtarpayitum

8.163

कथं पुनः सर्वसत्त्वान् धनेन संतर्पयिष्यामीति चिन्तापरो मिद्धमवक्रान्तः

kathaṃ punaḥ sarvasattvān dhanena saṃtarpayiṣyāmīti cintāparo middhamavakrāntaḥ

8.164

अथ तस्य महात्मन उदारपुण्यमहेशाख्यस्योदारचेतसोपपन्नस्य सर्वसत्त्वमनोरथपरिपूरकस्य लोकहितार्थमभ्युद्गतस्य अन्यतरा महेशाख्या देवता उपसंक्रम्य समाश्वासयति मा त्वं सार्थवाह खेदमापद्यस्व

atha tasya mahātmana udārapuṇyamaheśākhyasyodāracetasopapannasya sarvasattvamanorathaparipūrakasya lokahitārthamabhyudgatasya anyatarā maheśākhyā devatā upasaṃkramya samāśvāsayati mā tvaṃ sārthavāha khedamāpadyasva

8.165

ऋद्धिष्यति ते प्रणिधिरिति

ṛddhiṣyati te praṇidhiriti

8.166

अस्ति खलु महासार्थवाह अस्मिन्नेव जम्बुद्वीपे बदरद्वीपो नाम महापत्तनो ऽमनुष्यावचरितो महेशाख्यमनुष्याधिष्ठितः

asti khalu mahāsārthavāha asminneva jambudvīpe badaradvīpo nāma mahāpattano 'manuṣyāvacarito maheśākhyamanuṣyādhiṣṭhitaḥ

8.167

सन्ति तस्मिन् बदरद्वीपे प्रधानानि रत्नानि सर्वसत्त्वविचित्रमनोरथपरिपूरकाणि

santi tasmin badaradvīpe pradhānāni ratnāni sarvasattvavicitramanorathaparipūrakāṇi

8.168

यदि महासार्थवाहो बदरद्वीपयात्रां साधयेत् एवमिमां महतीं प्रतिज्ञां प्रतिनिस्तरेत

yadi mahāsārthavāho badaradvīpayātrāṃ sādhayet evamimāṃ mahatīṃ pratijñāṃ pratinistareta

8.169

इयं हि महाप्रतिज्ञा शक्रब्रह्मादीनामपि दुस्तरा प्रागेव मनुष्यभूतस्य

iyaṃ hi mahāpratijñā śakrabrahmādīnāmapi dustarā prāgeva manuṣyabhūtasya

8.170

इत्युक्त्वा सा देवता तत्रैवान्तर्हिता

ityuktvā sā devatā tatraivāntarhitā

8.171

न च शकिता सुप्रियेण महासार्थवाहेन सा देवता प्रष्टुम् कतरस्यां दिशि बदरद्वीपः कथं वा तत्र गम्यत इति

na ca śakitā supriyeṇa mahāsārthavāhena sā devatā praṣṭum katarasyāṃ diśi badaradvīpaḥ kathaṃ vā tatra gamyata iti

8.172

अथ सुप्रियस्य सार्थवाहस्य सुप्तप्रतिबुद्धस्य एतदभवत् अहो बत मे सा देवता पुनरपि दर्शयेत् दिशं चोपायं च व्यपदिशेद् बदरद्वीपमहापत्तनस्य गमनायेति चिन्तापरो मिद्धमवक्रान्तः

atha supriyasya sārthavāhasya suptapratibuddhasya etadabhavat aho bata me sā devatā punarapi darśayet diśaṃ copāyaṃ ca vyapadiśed badaradvīpamahāpattanasya gamanāyeti cintāparo middhamavakrāntaḥ

8.173

अथ सा देवता तस्य महात्मन उदारपुण्यमहेशाख्यस्य दृढोदारप्रतिज्ञस्योदारवीर्यपराक्रमताम् अनिक्षिप्तोत्साहतां विदित्वा उपसंक्रम्य एवमाह मा त्वं सार्थवाह खेदमापद्यस्व

atha sā devatā tasya mahātmana udārapuṇyamaheśākhyasya dṛḍhodārapratijñasyodāravīryaparākramatām anikṣiptotsāhatāṃ viditvā upasaṃkramya evamāha mā tvaṃ sārthavāha khedamāpadyasva

8.174

अस्ति खलु महासार्थवाह पश्चिमे दिग्भागे पञ्चान्तरद्वीपशतानि समतिक्रम्य सप्त महापर्वताः उच्चाश्च प्रगृहीताश्च सप्त च महानद्यः

asti khalu mahāsārthavāha paścime digbhāge pañcāntaradvīpaśatāni samatikramya sapta mahāparvatāḥ uccāśca pragṛhītāśca sapta ca mahānadyaḥ

8.175

तान् वीर्यबलेन लङ्घयित्वा अन्तरोद्दानम् अनुलोमप्रतिलोमद्वयमावर्तः शङ्खनाभः शङ्खनाभी च नीलोदस्तारकाक्षश्च पर्वतौ नीलग्रीव एव च वैरम्भा ताम्राटवी वेणुगुल्मः सप्त पर्वताः सकण्टकाः क्षारनदी त्रिशङ्कुर् अयस्किलम् अष्टादशवक्रो नदी श्लक्ष्ण एव च धूमनेत्रमुदकं सप्ताशीविषपर्वता नदी भवति पश्चिमा

tān vīryabalena laṅghayitvā antaroddānam anulomapratilomadvayamāvartaḥ śaṅkhanābhaḥ śaṅkhanābhī ca nīlodastārakākṣaśca parvatau nīlagrīva eva ca vairambhā tāmrāṭavī veṇugulmaḥ sapta parvatāḥ sakaṇṭakāḥ kṣāranadī triśaṅkur ayaskilam aṣṭādaśavakro nadī ślakṣṇa eva ca dhūmanetramudakaṃ saptāśīviṣaparvatā nadī bhavati paścimā

8.176

अनुलोमप्रतिलोमो नाम महासमुद्रः

anulomapratilomo nāma mahāsamudraḥ

Divyāvadāna