2.22.2

अपि स्नातानुलिप्तस्य भृशमायान्ति सर्वशः

api snātānuliptasya bhṛśamāyānti sarvaśaḥ

2.23

तत्र श्लोकः

tatra ślokaḥ

2.23.2

सामान्येन मयोक्तानि लिङ्गानि रसगन्धयोः

sāmānyena mayoktāni liṅgāni rasagandhayoḥ

2.23.3

पुष्पितस्य नरस्यैतत् मरणमादिशेत्

puṣpitasya narasyaitat maraṇamādiśet

3.1

अथातः परिमर्शनीयमिन्द्रियं व्याख्यास्यामः

athātaḥ parimarśanīyamindriyaṃ vyākhyāsyāmaḥ

3.2

इति ह स्माह भगवानात्रेयः

iti ha smāha bhagavānātreyaḥ

3.3

वर्णे स्वरे च गन्धे च रसे चोक्तं पृथक् पृथक्

varṇe svare ca gandhe ca rase coktaṃ pṛthak pṛthak

3.3.2

लिङ्गं मुमूर्षतां सम्यक् स्पर्शेष्वपि निबोधत

liṅgaṃ mumūrṣatāṃ samyak sparśeṣvapi nibodhata

3.4

स्पर्शप्राधान्येनैवातुरस्यायुषः प्रमाणावशेषं जिज्ञासुः प्रकृतिस्थेन पाणिना शरीरमस्य केवलं स्पृशेत् परिमर्शयेद् वान्येन

sparśaprādhānyenaivāturasyāyuṣaḥ pramāṇāvaśeṣaṃ jijñāsuḥ prakṛtisthena pāṇinā śarīramasya kevalaṃ spṛśet parimarśayed vānyena

3.4.2

परिमृशता तु खल्वातुरशरीरमिमे भावास्तत्र तत्रावबोद्धव्या भवन्ति

parimṛśatā tu khalvāturaśarīramime bhāvāstatra tatrāvaboddhavyā bhavanti

3.4.3

इति लक्षणं स्पृश्यानां भावानामुक्तं समासेन

iti lakṣaṇaṃ spṛśyānāṃ bhāvānāmuktaṃ samāsena

3.5

तद्व्यासतो ऽनुव्याख्यास्यामः तस्य चेत् परिमृश्यमानं पृथक्त्वेन पादजङ्घोरुस्फिगुदरपार्श्वपृष्ठेषिकापाणिग्रीवाताल्वोष्ठललाटं स्विन्नं शीतं स्तब्धं दारुणं वीतमांसशोणितं वा स्यात् परासुरयं पुरुषो न चिरात् कालं मरिष्यतीति विद्यात्

tadvyāsato 'nuvyākhyāsyāmaḥ tasya cet parimṛśyamānaṃ pṛthaktvena pādajaṅghorusphigudarapārśvapṛṣṭheṣikāpāṇigrīvātālvoṣṭhalalāṭaṃ svinnaṃ śītaṃ stabdhaṃ dāruṇaṃ vītamāṃsaśoṇitaṃ vā syāt parāsurayaṃ puruṣo na cirāt kālaṃ mariṣyatīti vidyāt

3.5.2

तस्य चेत् परिमृश्यमानानि पृथक्त्वेन गुल्फजानुवङ्क्षणगुदवृषणमेढ्रनाभ्यंसस्तनमणिकपर्शुकाहनुनासिकाकर्णाक्षिभ्रूशङ्खादीनि स्रस्तानि व्यस्तानि च्युतानि स्थानेभ्यः स्कन्नानि वा स्युः परासुरयं पुरुषो ऽचिरात् कालं मरिष्यतीति विद्यात्

tasya cet parimṛśyamānāni pṛthaktvena gulphajānuvaṅkṣaṇagudavṛṣaṇameḍhranābhyaṃsastanamaṇikaparśukāhanunāsikākarṇākṣibhrūśaṅkhādīni srastāni vyastāni cyutāni sthānebhyaḥ skannāni vā syuḥ parāsurayaṃ puruṣo 'cirāt kālaṃ mariṣyatīti vidyāt

3.6

तथास्योच्छ्वासमन्यादन्तपक्ष्मचक्षुःकेशलोमोदरनखाङ्गुलीर् आलक्षयेत्

tathāsyocchvāsamanyādantapakṣmacakṣuḥkeśalomodaranakhāṅgulīr ālakṣayet

3.6.2

तस्य चेदुच्छ्वासो ऽतिदीर्घो ऽतिह्रस्वो वा स्यात् परासुरिति विद्यात्

tasya ceducchvāso 'tidīrgho 'tihrasvo vā syāt parāsuriti vidyāt

3.6.3

तस्य चेन्मन्ये परिमृश्यमाने न स्पन्देयातां परासुरिति विद्यात्

tasya cenmanye parimṛśyamāne na spandeyātāṃ parāsuriti vidyāt

3.6.4

तस्य चेद्दन्ताः परिकीर्णाः श्वेता जातशर्कराः स्युः परासुरिति विद्यात्

tasya ceddantāḥ parikīrṇāḥ śvetā jātaśarkarāḥ syuḥ parāsuriti vidyāt

3.6.5

तस्य चेत् पक्ष्माणि जटाबद्धानि स्युः परासुरिति विद्यात्

tasya cet pakṣmāṇi jaṭābaddhāni syuḥ parāsuriti vidyāt

3.6.6

तस्य चेच्चक्षुषी प्रकृतिहीने विकृतियुक्ते ऽत्युत्पिण्डिते ऽतिप्रविष्टे ऽतिजिह्मे ऽतिविषमे ऽतिमुक्तबन्धने ऽतिप्रस्रुते सततोन्मिषिते सततनिमिषिते निमिषोन्मेषातिप्रवृत्ते विभ्रान्तदृष्टिके विपरीतदृष्टिके हीनदृष्टिके व्यस्तदृष्टिके नकुलान्धे कपोतान्धे ऽलातवर्णे कृष्णपीतनीलश्यावताम्रहरितहारिद्रशुक्लवैकारिकाणां वर्णानाम् अन्यतमेनातिप्लुते वा स्यातां तदा परासुरिति विद्यात्

tasya ceccakṣuṣī prakṛtihīne vikṛtiyukte 'tyutpiṇḍite 'tipraviṣṭe 'tijihme 'tiviṣame 'timuktabandhane 'tiprasrute satatonmiṣite satatanimiṣite nimiṣonmeṣātipravṛtte vibhrāntadṛṣṭike viparītadṛṣṭike hīnadṛṣṭike vyastadṛṣṭike nakulāndhe kapotāndhe 'lātavarṇe kṛṣṇapītanīlaśyāvatāmraharitahāridraśuklavaikārikāṇāṃ varṇānām anyatamenātiplute vā syātāṃ tadā parāsuriti vidyāt

3.6.7

अथास्य केशलोमान्यायच्छेत्तस्य चेत् केशलोमान्यायम्यमानानि प्रलुच्येरन् न चेद्वेदयेयुस्तं परासुरिति विद्यात्

athāsya keśalomānyāyacchettasya cet keśalomānyāyamyamānāni pralucyeran na cedvedayeyustaṃ parāsuriti vidyāt

Carakasaṃhitā