8.44.3

ताम् अग्रे सूत्रेणोपनिबध्य कण्ठेऽस्य शिथिलमवसृजेत्

tām agre sūtreṇopanibadhya kaṇṭhe'sya śithilamavasṛjet

8.44.4

तस्य चेन् नाभिः पच्येत तां लोध्रमधुकप्रियङ्गुसुरदारुहरिद्राकल्कसिद्धेन तैलेनाभ्यज्यात् एषाम् एव तैलौषधानां चूर्णेनावचूर्णयेत्

tasya cen nābhiḥ pacyeta tāṃ lodhramadhukapriyaṅgusuradāruharidrākalkasiddhena tailenābhyajyāt eṣām eva tailauṣadhānāṃ cūrṇenāvacūrṇayet

8.44.5

इति नाडीकल्पनविधिर् उक्तः सम्यक्

iti nāḍīkalpanavidhir uktaḥ samyak

8.45

असम्यक्कल्पने हि नाड्या आयामव्यायामोत्तुण्डितापिण्डलिकाविनामिकाविजृम्भिकाबाधेभ्यो

asamyakkalpane hi nāḍyā āyāmavyāyāmottuṇḍitāpiṇḍalikāvināmikāvijṛmbhikābādhebhyo

8.45.2

तत्राविदाहिभिर् वातपित्तप्रशमनैरभ्यङ्गोत्सादनपरिषेकैः सर्पिर्भिश्चोपक्रमेत गुरुलाघवमभिसमीक्ष्य

tatrāvidāhibhir vātapittapraśamanairabhyaṅgotsādanapariṣekaiḥ sarpirbhiścopakrameta gurulāghavamabhisamīkṣya

8.46

अतोऽनन्तरं जातकर्म कुमारस्य कार्यम्

ato'nantaraṃ jātakarma kumārasya kāryam

8.46.2

तद्यथा मधुसर्पिषी मन्त्रोपमन्त्रिते यथाम्नायं प्रथमं प्राशितुं दद्यात्

tadyathā madhusarpiṣī mantropamantrite yathāmnāyaṃ prathamaṃ prāśituṃ dadyāt

8.46.3

स्तनमत ऊर्ध्वमेतेनैव विधिना दक्षिणं पातुं पुरस्तात् प्रयच्छेत्

stanamata ūrdhvametenaiva vidhinā dakṣiṇaṃ pātuṃ purastāt prayacchet

8.46.4

अथातः शीर्षतः स्थापयेदुदकुम्भं मन्त्रोपमन्त्रितम्

athātaḥ śīrṣataḥ sthāpayedudakumbhaṃ mantropamantritam

8.47

अथास्य रक्षां विदध्यात् आदानीखदिरकर्कन्धुपीलुपरूषकशाखाभिरस्या गृहं समन्ततः परिवारयेत्

athāsya rakṣāṃ vidadhyāt ādānīkhadirakarkandhupīluparūṣakaśākhābhirasyā gṛhaṃ samantataḥ parivārayet

8.47.2

सर्वतश्च सूतिकागारस्य सर्षपातसीतण्डुलकणकणिकाः प्रकिरेयुः

sarvataśca sūtikāgārasya sarṣapātasītaṇḍulakaṇakaṇikāḥ prakireyuḥ

8.47.3

तथा तण्डुलबलिहोमः सततम् उभयकालं क्रियेत आ

tathā taṇḍulabalihomaḥ satatam ubhayakālaṃ kriyeta ā

8.47.4

द्वारे च मुसलं देहलीमनु तिरश्चीनं न्यसेत्

dvāre ca musalaṃ dehalīmanu tiraścīnaṃ nyaset

8.47.5

वचाकुष्ठक्षौमकहिङ्गुसर्षपातसीलशुनकणकणिकानां रक्षोघ्नसमाख्यातानां चौषधीनां पोट्टलिकां बद्ध्वा सूतिकागारस्योत्तरदेहल्यामवसृजेत् तथा सूतिकायाः कण्ठे सपुत्रायाः स्थाल्युदककुम्भपर्यङ्केष्वपि तथैव च द्वयोर्द्वारपक्षयोः

vacākuṣṭhakṣaumakahiṅgusarṣapātasīlaśunakaṇakaṇikānāṃ rakṣoghnasamākhyātānāṃ cauṣadhīnāṃ poṭṭalikāṃ baddhvā sūtikāgārasyottaradehalyāmavasṛjet tathā sūtikāyāḥ kaṇṭhe saputrāyāḥ sthālyudakakumbhaparyaṅkeṣvapi tathaiva ca dvayordvārapakṣayoḥ

8.47.6

कणककण्टकेन्धनवान् अग्निस् तिन्दुककाष्ठेन्धनश् चाग्निः सूतिकागारस्याभ्यन्तरतो नित्यं स्यात्

kaṇakakaṇṭakendhanavān agnis tindukakāṣṭhendhanaś cāgniḥ sūtikāgārasyābhyantarato nityaṃ syāt

8.47.7

स्त्रियश्चैनां यथोक्तगुणाः सुहृदश् चानुश्चानुजागृयुर् दशाहं द्वादशाहं

striyaścaināṃ yathoktaguṇāḥ suhṛdaś cānuścānujāgṛyur daśāhaṃ dvādaśāhaṃ

8.47.8

अनुपरतप्रदानमङ्गलाशीःस्तुतिगीतवादित्रम् अन्नपानविशदम् अनुरक्तप्रहृष्टजनसम्पूर्णं च तद्वेश्म कार्यम्

anuparatapradānamaṅgalāśīḥstutigītavāditram annapānaviśadam anuraktaprahṛṣṭajanasampūrṇaṃ ca tadveśma kāryam

8.47.9

ब्राह्मणश्चाथर्ववेदवित् सततम् उभयकालं शान्तिं जुहुयात् स्वस्त्ययनार्थं कुमारस्य तथा सूतिकायाः

brāhmaṇaścātharvavedavit satatam ubhayakālaṃ śāntiṃ juhuyāt svastyayanārthaṃ kumārasya tathā sūtikāyāḥ

8.47.10

इत्येतद्रक्षाविधानम् उक्तम्

ityetadrakṣāvidhānam uktam

8.48

सूतिकां तु खलु बुभुक्षितां विदित्वा स्नेहं पाययेत परमया शक्त्या सर्पिस्तैलं वसां मज्जानं वा सात्म्यीभावम् अभिसमीक्ष्य पिप्पलीपिप्पलीमूलचव्यचित्रकशृङ्गवेरचूर्णसहितम्

sūtikāṃ tu khalu bubhukṣitāṃ viditvā snehaṃ pāyayeta paramayā śaktyā sarpistailaṃ vasāṃ majjānaṃ vā sātmyībhāvam abhisamīkṣya pippalīpippalīmūlacavyacitrakaśṛṅgaveracūrṇasahitam

Carakasaṃhitā