8.6.3

पर्याप्ते चैनां शीतोदकेन परिषिञ्चेत्

paryāpte caināṃ śītodakena pariṣiñcet

8.6.4

तत्रात्यशिता क्षुधिता पिपासिता भीता विमनाः शोकार्ता क्रुद्धान्यं च पुमांसम् इच्छन्ती मैथुने चातिकामा वा न गर्भं धत्ते विगुणां वा प्रजां जनयति

tatrātyaśitā kṣudhitā pipāsitā bhītā vimanāḥ śokārtā kruddhānyaṃ ca pumāṃsam icchantī maithune cātikāmā vā na garbhaṃ dhatte viguṇāṃ vā prajāṃ janayati

8.6.5

अतिबालामतिवृद्धां दीर्घरोगिणीमन्येन वा विकारेणोपसृष्टां वर्जयेत्

atibālāmativṛddhāṃ dīrgharogiṇīmanyena vā vikāreṇopasṛṣṭāṃ varjayet

8.6.6

पुरुषेऽप्येत एव दोषाः

puruṣe'pyeta eva doṣāḥ

8.6.7

अतः सर्वदोषवर्जितौ स्त्रीपुरुषौ संसृज्येयाताम्

ataḥ sarvadoṣavarjitau strīpuruṣau saṃsṛjyeyātām

8.7

संजातहर्षौ मैथुने चानुकूलाविष्टगन्धं स्वास्तीर्णं सुखं शयनमुपकल्प्य मनोज्ञं हितमशनमशित्वा नात्यशितौ दक्षिणपादेन पुमानारोहेद् वामपादेन स्त्री

saṃjātaharṣau maithune cānukūlāviṣṭagandhaṃ svāstīrṇaṃ sukhaṃ śayanamupakalpya manojñaṃ hitamaśanamaśitvā nātyaśitau dakṣiṇapādena pumānārohed vāmapādena strī

8.8

तत्र मन्त्रं प्रयुञ्जीत

tatra mantraṃ prayuñjīta

8.8.2

अहिरसि आयुरसि सर्वतः प्रतिष्ठासि धाता त्वा ददतु विधाता त्वा दधातु ब्रह्मवर्चसा भव

ahirasi āyurasi sarvataḥ pratiṣṭhāsi dhātā tvā dadatu vidhātā tvā dadhātu brahmavarcasā bhava

8.8.3

इति

iti

8.8.4

ब्रह्मा बृहस्पतिर्विष्णुः सोमः सूर्यस्तथाश्विनौ

brahmā bṛhaspatirviṣṇuḥ somaḥ sūryastathāśvinau

8.8.5

भगोऽथ मित्रावरुणा वीरं ददतु मे सुतम्

bhago'tha mitrāvaruṇā vīraṃ dadatu me sutam

8.8.6

इत्युक्त्वा संवसेयाताम्

ityuktvā saṃvaseyātām

8.9

सा चेद् एवमाशासीत बृहन्तम् अवदातं हर्यक्षम् ओजस्विनं शुचिं सत्त्वसम्पन्नं पुत्रमिच्छेयमिति शुद्धस्नानात् प्रभृत्यस्यै मन्थमवदातयवानां मधुसर्पिर्भ्यां संमृज्य श्वेताया गोः सरूपवत्सायाः पयसालोड्य राजते कांस्ये वा पात्रे काले काले सप्ताहं सततं प्रयच्छेत् पानाय

sā ced evamāśāsīta bṛhantam avadātaṃ haryakṣam ojasvinaṃ śuciṃ sattvasampannaṃ putramiccheyamiti śuddhasnānāt prabhṛtyasyai manthamavadātayavānāṃ madhusarpirbhyāṃ saṃmṛjya śvetāyā goḥ sarūpavatsāyāḥ payasāloḍya rājate kāṃsye vā pātre kāle kāle saptāhaṃ satataṃ prayacchet pānāya

8.9.2

प्रातश्च शालियवान्नविकारान् दधिमधुसर्पिर्भिः पयोभिर्वा संमृज्य भुञ्जीत तथा सायम् अवदातशरणशयनासनपानवसनभूषणा च स्यात्

prātaśca śāliyavānnavikārān dadhimadhusarpirbhiḥ payobhirvā saṃmṛjya bhuñjīta tathā sāyam avadātaśaraṇaśayanāsanapānavasanabhūṣaṇā ca syāt

8.9.3

सायं प्रातश्च शश्वच्छ्वेतं महान्तं वृषभमाजानेयं वा हरिचन्दनाङ्गदं पश्येत्

sāyaṃ prātaśca śaśvacchvetaṃ mahāntaṃ vṛṣabhamājāneyaṃ vā haricandanāṅgadaṃ paśyet

8.9.4

सौम्याभिश्चैनां कथाभिर् मनोऽनुकूलाभिर् उपासीत

saumyābhiścaināṃ kathābhir mano'nukūlābhir upāsīta

8.9.5

सौम्याकृतिवचनोपचारचेष्टांश्च स्त्रीपुरुषान् इतरानपि चेन्द्रियार्थानवदातान् पश्येत्

saumyākṛtivacanopacāraceṣṭāṃśca strīpuruṣān itarānapi cendriyārthānavadātān paśyet

8.9.6

सहचर्यश्चैनां प्रियहिताभ्यां सततमुपचरेयुस्तथा भर्ता

sahacaryaścaināṃ priyahitābhyāṃ satatamupacareyustathā bhartā

8.9.7

न च मिश्रीभावमापद्येयातामिति

na ca miśrībhāvamāpadyeyātāmiti

8.9.8

अनेन विधिना सप्तरात्रं स्थित्वाष्टमे ऽहन्य् आप्लुत्याद्भिः सशिरस्कं सह भर्त्रा अहतानि वस्त्राण्याच्छादयेद् अवदातानि अवदाताश्च स्रजो भूषणानि

anena vidhinā saptarātraṃ sthitvāṣṭame 'hany āplutyādbhiḥ saśiraskaṃ saha bhartrā ahatāni vastrāṇyācchādayed avadātāni avadātāśca srajo bhūṣaṇāni

Carakasaṃhitā