7.16.2

इति शरीरावयवसंख्या यथास्थूलभेदेनावयवानां निर्दिष्टा

iti śarīrāvayavasaṃkhyā yathāsthūlabhedenāvayavānāṃ nirdiṣṭā

7.17

शरीरावयवास्तु परमाणुभेदेनापरिसंख्येया भवन्ति अतिबहुत्वाद् अतिसौक्ष्म्यादतीन्द्रियत्वाच्च

śarīrāvayavāstu paramāṇubhedenāparisaṃkhyeyā bhavanti atibahutvād atisaukṣmyādatīndriyatvācca

7.17.2

तेषां संयोगविभागे परमाणूणां कारणं वायुः कर्मस्वभावश्च

teṣāṃ saṃyogavibhāge paramāṇūṇāṃ kāraṇaṃ vāyuḥ karmasvabhāvaśca

7.18

तदेतच्छरीरं संख्यातमनेकावयवं दृष्टमेकत्वेन सङ्गः पृथक्त्वेनापवर्गः

tadetaccharīraṃ saṃkhyātamanekāvayavaṃ dṛṣṭamekatvena saṅgaḥ pṛthaktvenāpavargaḥ

7.18.2

तत्र प्रधानम् असक्तं सर्वसत्तानिवृत्तौ निवर्तते इति

tatra pradhānam asaktaṃ sarvasattānivṛttau nivartate iti

7.19

तत्र श्लोकौ

tatra ślokau

7.19.2

शरीरसंख्यां यो वेद सर्वावयवशो भिषक्

śarīrasaṃkhyāṃ yo veda sarvāvayavaśo bhiṣak

7.19.3

तदज्ञाननिमित्तेन स मोहेन न युज्यते

tadajñānanimittena sa mohena na yujyate

7.20

अमूढो मोहमूलैश्च न दोषैरभिभूयते

amūḍho mohamūlaiśca na doṣairabhibhūyate

7.20.2

निर्दोषो निःस्पृहः शान्तः प्रशाम्यत्यपुनर्भवः

nirdoṣo niḥspṛhaḥ śāntaḥ praśāmyatyapunarbhavaḥ

8.1

अथातो जातिसूत्रीयं शारीरं व्याख्यास्यामः

athāto jātisūtrīyaṃ śārīraṃ vyākhyāsyāmaḥ

8.2

इति ह स्माह भगवानात्रेयः

iti ha smāha bhagavānātreyaḥ

8.3

स्त्रीपुंसयोर् अव्यापन्नशुक्रशोणितगर्भाशययोः श्रेयसीं प्रजामिच्छतोस् तदर्थाभिनिर्वृत्तिकरं कर्मोपदेक्ष्यामः

strīpuṃsayor avyāpannaśukraśoṇitagarbhāśayayoḥ śreyasīṃ prajāmicchatos tadarthābhinirvṛttikaraṃ karmopadekṣyāmaḥ

8.4

अथाप्येतौ स्त्रीपुंसौ स्नेहस्वेदाभ्याम् उपपाद्य वमनविरेचनाभ्यां संशोध्य क्रमेण प्रकृतिमापादयेत्

athāpyetau strīpuṃsau snehasvedābhyām upapādya vamanavirecanābhyāṃ saṃśodhya krameṇa prakṛtimāpādayet

8.4.2

संशुद्धौ चास्थापनानुवासनाभ्याम् उपाचरेद् उपाचरेच्च मधुरौषधसंस्कृताभ्यां घृतक्षीराभ्यां पुरुषं स्त्रियं तु तैलमाषाभ्याम्

saṃśuddhau cāsthāpanānuvāsanābhyām upācared upācarecca madhurauṣadhasaṃskṛtābhyāṃ ghṛtakṣīrābhyāṃ puruṣaṃ striyaṃ tu tailamāṣābhyām

8.5

ततः पुष्पात् प्रभृति त्रिरात्रमासीत ब्रह्मचारिण्यधःशायिनी पाणिभ्यामन्नम् अजर्जरपात्राद् भुञ्जाना न च कांचिन् मृजामापद्येत

tataḥ puṣpāt prabhṛti trirātramāsīta brahmacāriṇyadhaḥśāyinī pāṇibhyāmannam ajarjarapātrād bhuñjānā na ca kāṃcin mṛjāmāpadyeta

8.5.2

ततश्चतुर्थेऽहन्येनाम् उत्साद्य सशिरस्कं स्नापयित्वा शुक्लानि वासांस्याच्छादयेत् पुरुषं च

tataścaturthe'hanyenām utsādya saśiraskaṃ snāpayitvā śuklāni vāsāṃsyācchādayet puruṣaṃ ca

8.5.3

ततः शुक्लवाससौ स्रग्विणौ सुभनसावन्योन्यमभिकामौ संवसेयातां स्नानात् प्रभृति युग्मेष्वहःसु पुत्रकामौ अयुग्मेषु दुहितृकामौ

tataḥ śuklavāsasau sragviṇau subhanasāvanyonyamabhikāmau saṃvaseyātāṃ snānāt prabhṛti yugmeṣvahaḥsu putrakāmau ayugmeṣu duhitṛkāmau

8.6

न च न्युब्जां पार्श्वगतां वा संसेवेत

na ca nyubjāṃ pārśvagatāṃ vā saṃseveta

8.6.2

न्युब्जाया वातो बलवान् स योनिं पीडयति पार्श्वगताया दक्षिणे पार्श्वे श्लेष्मा स च्युतः पिदधाति गर्भाशयं वामे पार्श्वे पित्तं तदस्याः पीडितं विदहति रक्तं शुक्रं च तस्मादुत्ताना बीजं गृह्णीयात् तथाहि यथास्थानम् अवतिष्ठन्ते दोषाः

nyubjāyā vāto balavān sa yoniṃ pīḍayati pārśvagatāyā dakṣiṇe pārśve śleṣmā sa cyutaḥ pidadhāti garbhāśayaṃ vāme pārśve pittaṃ tadasyāḥ pīḍitaṃ vidahati raktaṃ śukraṃ ca tasmāduttānā bījaṃ gṛhṇīyāt tathāhi yathāsthānam avatiṣṭhante doṣāḥ

Carakasaṃhitā