2.23.2

तृप्तिश्च बीजग्रहणं च योन्यां गर्भस्य सद्योऽनुगतस्य लिङ्गम्

tṛptiśca bījagrahaṇaṃ ca yonyāṃ garbhasya sadyo'nugatasya liṅgam

2.24

सव्याङ्गचेष्टा पुरुषार्थिनी स्त्री स्त्रीस्वप्नपानाशनशीलचेष्टा

savyāṅgaceṣṭā puruṣārthinī strī strīsvapnapānāśanaśīlaceṣṭā

2.24.2

सव्यात्तगर्भा न च वृत्तगर्भा सव्यप्रदुग्धा स्त्रियमेव सूते

savyāttagarbhā na ca vṛttagarbhā savyapradugdhā striyameva sūte

2.25

पुत्रं त्वतो लिङ्गविपर्ययेण व्यामिश्रलिङ्गा प्रकृतिं तृतीयाम्

putraṃ tvato liṅgaviparyayeṇa vyāmiśraliṅgā prakṛtiṃ tṛtīyām

2.25.2

गर्भोपपत्तौ तु मनः स्त्रिया यं जन्तुं व्रजेत्तत्सदृशं प्रसूते

garbhopapattau tu manaḥ striyā yaṃ jantuṃ vrajettatsadṛśaṃ prasūte

2.26

गर्भस्य चत्वारि चतुर्विधानि भूतानि मातापितृसंभवानि

garbhasya catvāri caturvidhāni bhūtāni mātāpitṛsaṃbhavāni

2.26.2

आहारजान्यात्मकृतानि चैव सर्वस्य सर्वाणि भवन्ति देहे

āhārajānyātmakṛtāni caiva sarvasya sarvāṇi bhavanti dehe

2.27

तेषां विशेषाद् बलवन्ति यानि भवन्ति मातापितृकर्मजानि

teṣāṃ viśeṣād balavanti yāni bhavanti mātāpitṛkarmajāni

2.27.2

तानि व्यवस्येत् सदृशत्वहेतुं सत्त्वं यथामूलमपि व्यवस्येत्

tāni vyavasyet sadṛśatvahetuṃ sattvaṃ yathāmūlamapi vyavasyet

2.28

कस्मात् प्रजां स्त्री विकृतां प्रसूते हीनाधिकाङ्गीं विकलेन्द्रियां वा

kasmāt prajāṃ strī vikṛtāṃ prasūte hīnādhikāṅgīṃ vikalendriyāṃ vā

2.28.2

देहात् कथं देहमुपैति चान्यम् आत्मा सदा कैरनुबध्यते च

dehāt kathaṃ dehamupaiti cānyam ātmā sadā kairanubadhyate ca

2.29

बीजात्मकर्माशयकालदोषैर् मातुस् तथाहारविहारदोषैः

bījātmakarmāśayakāladoṣair mātus tathāhāravihāradoṣaiḥ

2.29.2

कुर्वन्ति दोषा विविधानि दुष्टाः संस्थानवर्णेन्द्रियवैकृतानि

kurvanti doṣā vividhāni duṣṭāḥ saṃsthānavarṇendriyavaikṛtāni

2.30

वर्षासु काष्ठाश्मघनाम्बुवेगास् तरोः सरित्स्रोतसि संस्थितस्य

varṣāsu kāṣṭhāśmaghanāmbuvegās taroḥ saritsrotasi saṃsthitasya

2.30.2

यथैव कुर्युर्विकृतिं तथैव गर्भस्य कुक्षौ नियतस्य दोषाः

yathaiva kuryurvikṛtiṃ tathaiva garbhasya kukṣau niyatasya doṣāḥ

2.31

भूतैश्चतुर्भिः सहितः सुसूक्ष्मैर् मनोजवो देहमुपैति देहात्

bhūtaiścaturbhiḥ sahitaḥ susūkṣmair manojavo dehamupaiti dehāt

2.31.2

कर्मात्मकत्वान्न तु तस्य दृश्यं दिव्यं विना दर्शनमस्ति रूपम्

karmātmakatvānna tu tasya dṛśyaṃ divyaṃ vinā darśanamasti rūpam

2.32

स सर्वगः सर्वशरीरभृच्च स विश्वकर्मा स च विश्वरूपः

sa sarvagaḥ sarvaśarīrabhṛcca sa viśvakarmā sa ca viśvarūpaḥ

2.32.2

स चेतनाधातुरतीन्द्रियश्च स नित्ययुक् सानुशयः स एव

sa cetanādhāturatīndriyaśca sa nityayuk sānuśayaḥ sa eva

2.33

रसात्ममातापितृसंभवानि भूतानि विद्याद्दश षट् च देहे

rasātmamātāpitṛsaṃbhavāni bhūtāni vidyāddaśa ṣaṭ ca dehe

Carakasaṃhitā