2.3.2

किं स्याच्चतुष्पात्प्रभवं च षड्भ्यो यत् स्त्रीषु गर्भत्वमुपैति पुंसः

kiṃ syāccatuṣpātprabhavaṃ ca ṣaḍbhyo yat strīṣu garbhatvamupaiti puṃsaḥ

2.4

शुक्रं तदस्य प्रवदन्ति धीरा यद्धीयते गर्भसमुद्भवाय

śukraṃ tadasya pravadanti dhīrā yaddhīyate garbhasamudbhavāya

2.4.2

वाय्वग्निभूम्यब्गुणपादवत्तत् षड्भ्यो रसेभ्यः प्रभवश्च तस्य

vāyvagnibhūmyabguṇapādavattat ṣaḍbhyo rasebhyaḥ prabhavaśca tasya

2.5

सम्पूर्णदेहः समये सुखं च गर्भः कथं केन च जायते स्त्री

sampūrṇadehaḥ samaye sukhaṃ ca garbhaḥ kathaṃ kena ca jāyate strī

2.5.2

गर्भं चिराद्विन्दति सप्रजापि भूत्वाथवा नश्यति केन गर्भः

garbhaṃ cirādvindati saprajāpi bhūtvāthavā naśyati kena garbhaḥ

2.6

शुक्रासृगात्माशयकालसंपद् यस्योपचारश्च हितैस्तथान्नैः

śukrāsṛgātmāśayakālasaṃpad yasyopacāraśca hitaistathānnaiḥ

2.6.2

गर्भश्च काले च सुखी सुखं च संजायते संपरिपूर्णदेहः

garbhaśca kāle ca sukhī sukhaṃ ca saṃjāyate saṃparipūrṇadehaḥ

2.7

योनिप्रदोषान् मनसोऽभितापाच्छुक्रासृगाहारविहारदोषात्

yonipradoṣān manaso'bhitāpācchukrāsṛgāhāravihāradoṣāt

2.7.2

अकालयोगाद्बलसंक्षयाच्च गर्भं चिराद्विन्दति सप्रजापि

akālayogādbalasaṃkṣayācca garbhaṃ cirādvindati saprajāpi

2.8

असृङ्निरुद्धं पवनेन नार्या गर्भं व्यवस्यन्त्यबुधाः कदाचित्

asṛṅniruddhaṃ pavanena nāryā garbhaṃ vyavasyantyabudhāḥ kadācit

2.8.2

गर्भस्य रूपं हि करोति तस्यास् तदसृग् अस्रावि विवर्धमानम्

garbhasya rūpaṃ hi karoti tasyās tadasṛg asrāvi vivardhamānam

2.9

तदग्निसूर्यश्रमशोकरोगैर् उष्णान्नपानैरथवा प्रवृत्तम्

tadagnisūryaśramaśokarogair uṣṇānnapānairathavā pravṛttam

2.9.2

दृष्ट्वासृगेकं न च गर्भसंज्ञं केचिन् नरा भूतहृतं वदन्ति

dṛṣṭvāsṛgekaṃ na ca garbhasaṃjñaṃ kecin narā bhūtahṛtaṃ vadanti

2.10

ओजोऽशनानां रजनीचराणाम् आहारहेतोर्न शरीरमिष्टम्

ojo'śanānāṃ rajanīcarāṇām āhārahetorna śarīramiṣṭam

2.10.2

गर्भं हरेयुर्यदि ते न मातुर् लब्धावकाशा न हरेयुरोजः

garbhaṃ hareyuryadi te na mātur labdhāvakāśā na hareyurojaḥ

2.11

कन्यां सुतं वा सहितौ पृथग्वा सुतौ सुते वा तनयान् बहून् वा

kanyāṃ sutaṃ vā sahitau pṛthagvā sutau sute vā tanayān bahūn vā

2.11.2

कस्मात् प्रसूते सुचिरेण गर्भम् एकोऽभिवृद्धिं च यमेऽभ्युपैति

kasmāt prasūte sucireṇa garbham eko'bhivṛddhiṃ ca yame'bhyupaiti

2.12

रक्तेन कन्याम् अधिकेन पुत्रं शुक्रेण तेन द्विविधीकृतेन

raktena kanyām adhikena putraṃ śukreṇa tena dvividhīkṛtena

2.12.2

बीजेन कन्यां च सुतं च सूते यथास्वबीजान्यतराधिकेन

bījena kanyāṃ ca sutaṃ ca sūte yathāsvabījānyatarādhikena

2.13

शुक्राधिकं द्वैधमुपैति बीजं यस्याः सुतौ सा सहितौ प्रसूते

śukrādhikaṃ dvaidhamupaiti bījaṃ yasyāḥ sutau sā sahitau prasūte

Carakasaṃhitā