10.41.2

तच्छ्रुत्वा न स विचचाल राजसूनुः कैलासो गिरिरिव नैकचित्रसानुः

tacchrutvā na sa vicacāla rājasūnuḥ kailāso giririva naikacitrasānuḥ

10.42

इति बुद्धचरिते महाकाव्ये ऽश्वघोषकृते श्रेण्याभिगमनो नाम दशमः सर्गः

iti buddhacarite mahākāvye 'śvaghoṣakṛte śreṇyābhigamano nāma daśamaḥ sargaḥ

11.1

अथैवमुक्तो मगधाधिपेन सुहृन्मुखेन प्रतिकूलमर्थम्

athaivamukto magadhādhipena suhṛnmukhena pratikūlamartham

11.1.2

स्वस्थो ऽविकारः कुलशौचशुद्धः शौद्धोदनिर्वाक्यमिदं जगाद

svastho 'vikāraḥ kulaśaucaśuddhaḥ śauddhodanirvākyamidaṃ jagāda

11.2

नाश्चर्यमेतद्भवतो विधानं जातस्य हर्यङ्ककुले विशाले

nāścaryametadbhavato vidhānaṃ jātasya haryaṅkakule viśāle

11.2.2

यन्मित्रपक्षे तव मित्रकाम स्याद्वृत्तिरेषा परिशुद्धवृत्तेः

yanmitrapakṣe tava mitrakāma syādvṛttireṣā pariśuddhavṛtteḥ

11.3

असत्सु मैत्री स्वकुलानुवृत्ता न तिष्ठति श्रीरिव विक्लवेषु

asatsu maitrī svakulānuvṛttā na tiṣṭhati śrīriva viklaveṣu

11.3.2

पूर्वैः कृतां प्रीतिपरंपराभिस्तामेव सन्तस्तु विवर्धयन्ति

pūrvaiḥ kṛtāṃ prītiparaṃparābhistāmeva santastu vivardhayanti

11.4

ये चार्थकृच्छ्रेषु भवन्ति लोके समानकार्याः सुहृदां मनुष्याः

ye cārthakṛcchreṣu bhavanti loke samānakāryāḥ suhṛdāṃ manuṣyāḥ

11.4.2

मित्राणि तानीति परैमि बुद्ध्या स्वस्थस्य वृद्धिष्विह को हि न स्यात्

mitrāṇi tānīti paraimi buddhyā svasthasya vṛddhiṣviha ko hi na syāt

11.5

एवं च ये द्रव्यमवाप्य लोके मित्रेषु धर्मे च नियोजयन्ति

evaṃ ca ye dravyamavāpya loke mitreṣu dharme ca niyojayanti

11.5.2

अवाप्तसाराणि धनानि तेषां भ्रष्टानि नान्ते जनयन्ति तापम्

avāptasārāṇi dhanāni teṣāṃ bhraṣṭāni nānte janayanti tāpam

11.6

सुहृत्तया चार्यतया च राजन् खल्वेष यो मां प्रति निश्चयस्ते

suhṛttayā cāryatayā ca rājan khalveṣa yo māṃ prati niścayaste

11.6.2

अत्रानुनेष्यामि सुहृत्तयैव ब्रूयामहं नोत्तरमन्यदत्र

atrānuneṣyāmi suhṛttayaiva brūyāmahaṃ nottaramanyadatra

11.7

अहं जरामृत्युभयं विदित्वा मुमुक्षया धर्ममिमं प्रपन्नः

ahaṃ jarāmṛtyubhayaṃ viditvā mumukṣayā dharmamimaṃ prapannaḥ

11.7.2

बन्धून् प्रियानश्रुमुखान्विहाय प्रागेव कामान् अशुभस्य हेतून्

bandhūn priyānaśrumukhānvihāya prāgeva kāmān aśubhasya hetūn

11.8

नाशीविषेभ्यो हि तथा बिभेमि नैवाशनिभ्यो गगनाच्च्युतेभ्यः

nāśīviṣebhyo hi tathā bibhemi naivāśanibhyo gaganāccyutebhyaḥ

11.8.2

न पावकेभ्यो ऽनिलसंहितेभ्यो यथा भयं मे विषयेभ्य एव

na pāvakebhyo 'nilasaṃhitebhyo yathā bhayaṃ me viṣayebhya eva

11.9

कामा ह्यनित्याः कुशलार्थचौरा रिक्ताश्च मायासदृशाश्च लोके

kāmā hyanityāḥ kuśalārthacaurā riktāśca māyāsadṛśāśca loke

11.9.2

आशास्यमाना अपि मोहयन्ति चित्तं नृणां किं पुनरात्मसंस्थाः

āśāsyamānā api mohayanti cittaṃ nṛṇāṃ kiṃ punarātmasaṃsthāḥ

Buddhacarita