9.34

एवं च ते निश्चयमेतु बुद्धिर्दृष्ट्वा विचित्रं जगतः प्रचारम्

evaṃ ca te niścayametu buddhirdṛṣṭvā vicitraṃ jagataḥ pracāram

9.34.2

संतापहेतुर्न सुतो न बन्धुरज्ञाननैमित्तिक एष तापः

saṃtāpaheturna suto na bandhurajñānanaimittika eṣa tāpaḥ

9.35

यथाध्वगानमिह संगतानां काले वियोगो नियतः प्रजानाम्

yathādhvagānamiha saṃgatānāṃ kāle viyogo niyataḥ prajānām

9.35.2

प्राज्ञो जनः को नु भजेत शोकं बन्धुप्रतिज्ञातजनैर्विहीनः

prājño janaḥ ko nu bhajeta śokaṃ bandhupratijñātajanairvihīnaḥ

9.36

इहैति हित्वा स्वजनं परत्र प्रलभ्य चेहापि पुनः प्रयाति

ihaiti hitvā svajanaṃ paratra pralabhya cehāpi punaḥ prayāti

9.36.2

गत्वापि तत्राप्यपरत्र गच्छत्येवं जने त्यागिनि को ऽनुरोधः

gatvāpi tatrāpyaparatra gacchatyevaṃ jane tyāgini ko 'nurodhaḥ

9.37

यदा च गर्भात्प्रभृति प्रवृत्तः सर्वास्ववस्थासु वधाय मृत्युः

yadā ca garbhātprabhṛti pravṛttaḥ sarvāsvavasthāsu vadhāya mṛtyuḥ

9.37.2

कस्मादकाले वनसंश्रयं मे पुत्रप्रियस्तत्रभवानवोचत्

kasmādakāle vanasaṃśrayaṃ me putrapriyastatrabhavānavocat

9.38

भवत्यकालो विषयाभिपत्तौ कालस्तथैवार्थविधौ प्रदिष्टः

bhavatyakālo viṣayābhipattau kālastathaivārthavidhau pradiṣṭaḥ

9.38.2

कालो जगत्कर्षति सर्वकालान्निर्वाहके श्रेयसि नास्ति कालः

kālo jagatkarṣati sarvakālānnirvāhake śreyasi nāsti kālaḥ

9.39

राज्यं मुमुक्षुर्मयि यच्च राजा तदप्युदारं सदृशं पितुश्च

rājyaṃ mumukṣurmayi yacca rājā tadapyudāraṃ sadṛśaṃ pituśca

9.39.2

प्रतिग्रहीतुं मम न क्षमं तु लोभादपथ्यान्नमिवातुरस्य

pratigrahītuṃ mama na kṣamaṃ tu lobhādapathyānnamivāturasya

9.40

कथं नु मोहायतनं नृपत्वं क्षमं प्रपत्तुं विदुषा नरेण

kathaṃ nu mohāyatanaṃ nṛpatvaṃ kṣamaṃ prapattuṃ viduṣā nareṇa

9.40.2

सोद्वेगता यत्र मदः श्रमश्च परापचारेण च धर्मपीडा

sodvegatā yatra madaḥ śramaśca parāpacāreṇa ca dharmapīḍā

9.41

जाम्बूनदं हर्म्यमिव प्रदीप्तं विषेण संयुक्तमिवोत्तमान्नम्

jāmbūnadaṃ harmyamiva pradīptaṃ viṣeṇa saṃyuktamivottamānnam

9.41.2

ग्राहाकुलं चाम्ब्विव सारविन्दं राज्यं हि रम्यं व्यसनाश्रयं च

grāhākulaṃ cāmbviva sāravindaṃ rājyaṃ hi ramyaṃ vyasanāśrayaṃ ca

9.42

इत्थं च राज्यं न सुखं न धर्मः पूर्वे यथा जातघृणा नरेन्द्राः

itthaṃ ca rājyaṃ na sukhaṃ na dharmaḥ pūrve yathā jātaghṛṇā narendrāḥ

9.42.2

वयःप्रकर्षे ऽपरिहार्यदुःखे राज्यानि मुक्त्वा वनमेव जग्मुः

vayaḥprakarṣe 'parihāryaduḥkhe rājyāni muktvā vanameva jagmuḥ

9.43

वरं हि भुक्तानि तृणान्यरण्ये तोषं परं रत्नमिवोपगृह्य

varaṃ hi bhuktāni tṛṇānyaraṇye toṣaṃ paraṃ ratnamivopagṛhya

9.43.2

सहोषितं श्रीसुलभैर्न चैव दोषैरदृश्यैरिव कृष्णसर्पैः

sahoṣitaṃ śrīsulabhairna caiva doṣairadṛśyairiva kṛṣṇasarpaiḥ

Buddhacarita