1.51

स पार्थिवान्तःपुरसंनिकर्षं कुमारजन्मागतहर्षवेगः

sa pārthivāntaḥpurasaṃnikarṣaṃ kumārajanmāgataharṣavegaḥ

1.51.2

विवेश धीरो वनसंज्ञयेव तपःप्रकर्षाच्च जराश्रयाच्च

viveśa dhīro vanasaṃjñayeva tapaḥprakarṣācca jarāśrayācca

1.52

ततो नृपस्तं मुनिमासनस्थं पाद्यार्घ्यपूर्वं प्रतिपूज्य सम्यक्

tato nṛpastaṃ munimāsanasthaṃ pādyārghyapūrvaṃ pratipūjya samyak

1.52.2

निमन्त्रयामास यथोपचारं पुरा वसिष्ठं स इवान्तिदेवः

nimantrayāmāsa yathopacāraṃ purā vasiṣṭhaṃ sa ivāntidevaḥ

1.53

धन्यो ऽस्म्यनुग्राह्यमिदं कुलं मे यन्मां दिदृक्षुर्भगवानुपेतः

dhanyo 'smyanugrāhyamidaṃ kulaṃ me yanmāṃ didṛkṣurbhagavānupetaḥ

1.53.2

आज्ञाप्यतां किं करवाणि सौम्य शिष्यो ऽस्मि विश्रम्भितुम् अर्हसीति

ājñāpyatāṃ kiṃ karavāṇi saumya śiṣyo 'smi viśrambhitum arhasīti

1.54

एवं नृपेणोपनिमन्त्रितः सन्सर्वेण भावेन मुनिर्यथावत्

evaṃ nṛpeṇopanimantritaḥ sansarveṇa bhāvena muniryathāvat

1.54.2

स विस्मयोत्फुल्लविशालदृष्टिर्गम्भीरधीराणि वचांस्युवाच

sa vismayotphullaviśāladṛṣṭirgambhīradhīrāṇi vacāṃsyuvāca

1.55

महात्मनि त्वय्युपपन्नम् एतत् प्रियातिथौ त्यागिनि धर्मकामे

mahātmani tvayyupapannam etat priyātithau tyāgini dharmakāme

1.55.2

सत्त्वान्वयज्ञानवयोऽनुरूपा स्निग्धा यदेवं मयि ते मतिः स्यात्

sattvānvayajñānavayo'nurūpā snigdhā yadevaṃ mayi te matiḥ syāt

1.56

एतच्च तद्येन नृपर्षयस्ते धर्मेण सूक्ष्मेण धनान्यवाप्य

etacca tadyena nṛparṣayaste dharmeṇa sūkṣmeṇa dhanānyavāpya

1.56.2

नित्यं त्यजन्तो विधिवद्बभूवुस्तपोभिराढ्या विभवैर्दरिद्राः

nityaṃ tyajanto vidhivadbabhūvustapobhirāḍhyā vibhavairdaridrāḥ

1.57

प्रयोजनं यत्तु ममोपयाने तन्मे शृणु प्रीतिमुपेहि च त्वम्

prayojanaṃ yattu mamopayāne tanme śṛṇu prītimupehi ca tvam

1.57.2

दिव्या मयादित्यपथे श्रुता वाग्बोधाय जातस्तनयस्तवेति

divyā mayādityapathe śrutā vāgbodhāya jātastanayastaveti

1.58

श्रुत्वा वचस्तच्च मनश्च युक्त्वा ज्ञात्वा निमित्तैश्च ततो ऽस्म्युपेतः

śrutvā vacastacca manaśca yuktvā jñātvā nimittaiśca tato 'smyupetaḥ

1.58.2

दिदृक्षया शाक्यकुलध्वजस्य शक्रध्वजस्येव समुच्छ्रितस्य

didṛkṣayā śākyakuladhvajasya śakradhvajasyeva samucchritasya

1.59

इत्येतदेवं वचनं निशम्य प्रहर्षसंभ्रान्तगतिर् नरेन्द्रः

ityetadevaṃ vacanaṃ niśamya praharṣasaṃbhrāntagatir narendraḥ

1.59.2

आदाय धात्र्यङ्कगतं कुमारं संदर्शयामास तपोधनाय

ādāya dhātryaṅkagataṃ kumāraṃ saṃdarśayāmāsa tapodhanāya

1.60

चक्राङ्कपादं स ततो महर्षिर् जालावनद्धाङ्गुलिपाणिपादम्

cakrāṅkapādaṃ sa tato maharṣir jālāvanaddhāṅgulipāṇipādam

1.60.2

सोर्णभ्रुवं वारणवस्तिकोशं सविस्मयं राजसुतं ददर्श

sorṇabhruvaṃ vāraṇavastikośaṃ savismayaṃ rājasutaṃ dadarśa

Buddhacarita