7.40

तीर्थानि पुण्यान्यभितस्तथैव सोपानभूतानि नभस्तलस्य

tīrthāni puṇyānyabhitastathaiva sopānabhūtāni nabhastalasya

7.40.2

जुष्टानि धर्मात्मभिरात्मवद्भिर्देवर्षिभिश्चैव महर्षिभिश्च

juṣṭāni dharmātmabhirātmavadbhirdevarṣibhiścaiva maharṣibhiśca

7.41

इतश्च भूयः क्षममुत्तरैव दिक्सेवितुं धर्मविशेषहेतोः

itaśca bhūyaḥ kṣamamuttaraiva diksevituṃ dharmaviśeṣahetoḥ

7.41.2

न तु क्षमं दक्षिणतो बुधेन पदं भवेदेकमपि प्रयातुम्

na tu kṣamaṃ dakṣiṇato budhena padaṃ bhavedekamapi prayātum

7.42

तपोवने ऽस्मिन्नथ निष्क्रियो वा संकीर्णधर्मापतितो ऽशुचिर्वा

tapovane 'sminnatha niṣkriyo vā saṃkīrṇadharmāpatito 'śucirvā

7.42.2

दृष्टस्त्वया येन न ते विवत्सा तद्ब्रूहि यावद्रुचितो ऽस्तु वासः

dṛṣṭastvayā yena na te vivatsā tadbrūhi yāvadrucito 'stu vāsaḥ

7.43

इमे हि वाञ्छन्ति तपःसहायं तपोनिधानप्रतिमं भवन्तम्

ime hi vāñchanti tapaḥsahāyaṃ taponidhānapratimaṃ bhavantam

7.43.2

वासस्त्वया हीन्द्रसमेन सार्धं बृहस्पतेरभ्युदयावहः स्यात्

vāsastvayā hīndrasamena sārdhaṃ bṛhaspaterabhyudayāvahaḥ syāt

7.44

इत्येवमुक्ते स तपस्विमध्ये तपस्विमुख्येन मनीषिमुख्यः

ityevamukte sa tapasvimadhye tapasvimukhyena manīṣimukhyaḥ

7.44.2

भवप्रणाशाय कृतप्रतिज्ञः स्वं भावम् अन्तर्गतम् आचचक्षे

bhavapraṇāśāya kṛtapratijñaḥ svaṃ bhāvam antargatam ācacakṣe

7.45

ऋज्वात्मनां धर्मभृतां मुनीनाम् इष्टातिथित्वात् स्वजनोपमानाम्

ṛjvātmanāṃ dharmabhṛtāṃ munīnām iṣṭātithitvāt svajanopamānām

7.45.2

एवंविधैर्मा प्रति भावजातैः प्रीतिः परा मे जनितश्च मानः

evaṃvidhairmā prati bhāvajātaiḥ prītiḥ parā me janitaśca mānaḥ

7.46

स्निग्धाभिराभिर्हृदयंगमाभिः समासतः स्नात इवास्मि वाग्भिः

snigdhābhirābhirhṛdayaṃgamābhiḥ samāsataḥ snāta ivāsmi vāgbhiḥ

7.46.2

रतिश्च मे धर्मनवग्रहस्य विस्पन्दिता संप्रति भूय एव

ratiśca me dharmanavagrahasya vispanditā saṃprati bhūya eva

7.47

एवं प्रवृत्तान् भवतः शरण्यानतीव संदर्शितपक्षपातान्

evaṃ pravṛttān bhavataḥ śaraṇyānatīva saṃdarśitapakṣapātān

7.47.2

यास्यामि हित्वेति ममापि दुःखं यथैव बन्धूंस्त्यजतस्तथैव

yāsyāmi hitveti mamāpi duḥkhaṃ yathaiva bandhūṃstyajatastathaiva

7.48

स्वर्गाय युष्माकमयं तु धर्मो ममाभिलाषस्त्वपुनर्भवाय

svargāya yuṣmākamayaṃ tu dharmo mamābhilāṣastvapunarbhavāya

7.48.2

अस्मिन्वने येन न मे विवत्सा भिन्नः प्रवृत्त्या हि निवृत्तिधर्मः

asminvane yena na me vivatsā bhinnaḥ pravṛttyā hi nivṛttidharmaḥ

7.49

तन्नारतिर्मे न परापचारो वनादितो येन परिव्रजामि

tannāratirme na parāpacāro vanādito yena parivrajāmi

7.49.2

धर्मे स्थिताः पूर्वयुगानुरूपे सर्वे भवन्तो हि महर्षिकल्पाः

dharme sthitāḥ pūrvayugānurūpe sarve bhavanto hi maharṣikalpāḥ

Buddhacarita