5.86

हुतवहवपुषोः दिवौकसो ऽन्ये व्यवसितमस्य सुदुष्करं विदित्वा

hutavahavapuṣoḥ divaukaso 'nye vyavasitamasya suduṣkaraṃ viditvā

5.86.2

अकृषत तुहिने पथि प्रकाशं घनविवरप्रसृता

tuhine pathi prakāśaṃ ghanavivaraprasṛtā ivendupādāḥ

5.87

हरितुरगतुरङ्गवत्तुरङ्गः स तु विचरन्मनसीव चोद्यमानः

harituragaturaṅgavatturaṅgaḥ sa tu vicaranmanasīva codyamānaḥ

5.87.2

अरुणपरुषतारम् अन्तरिक्षं स च सुबहूनि जगाम योजनानि

aruṇaparuṣatāram antarikṣaṃ sa ca subahūni jagāma yojanāni

5.88

इति बुद्धचरिते महाकाव्ये ऽभिनिष्क्रमणो नाम पञ्चमः सर्गः

iti buddhacarite mahākāvye 'bhiniṣkramaṇo nāma pañcamaḥ sargaḥ

6.1

ततो मुहूर्ताभ्युदिते जगच्चक्षुषि भास्करे

tato muhūrtābhyudite jagaccakṣuṣi bhāskare

6.1.2

भार्गवस्याश्रमपदं स ददर्श नृणां वरः

bhārgavasyāśramapadaṃ sa dadarśa nṛṇāṃ varaḥ

6.2

सुप्तविश्वस्तहरिणं स्वस्थस्थितविहङ्गमम्

suptaviśvastahariṇaṃ svasthasthitavihaṅgamam

6.2.2

विश्रान्त इव यद्दृष्ट्वा कृतार्थ इव चाभवत्

viśrānta iva yaddṛṣṭvā kṛtārtha iva cābhavat

6.3

स विस्मयनिवृत्त्यर्थं तपःपूजार्थमेव च

sa vismayanivṛttyarthaṃ tapaḥpūjārthameva ca

6.3.2

स्वां चानुवर्तितां रक्षन्नश्वपृष्ठाद् अवातरत्

svāṃ cānuvartitāṃ rakṣannaśvapṛṣṭhād avātarat

6.4

अवतीर्य च पस्पर्श निस्तीर्णमिति वाजिनम्

avatīrya ca pasparśa nistīrṇamiti vājinam

6.4.2

छन्दकं चाब्रवीत्प्रीतः स्नापयन्निव चक्षुषा

chandakaṃ cābravītprītaḥ snāpayanniva cakṣuṣā

6.5

इमं तार्क्ष्योपमजवं तुरङ्गमनुगच्छता

imaṃ tārkṣyopamajavaṃ turaṅgamanugacchatā

6.5.2

दर्शिता सौम्य मद्भक्तिर्विक्रमश्चायमात्मनः

darśitā saumya madbhaktirvikramaścāyamātmanaḥ

6.6

सर्वथास्म्यन्यकार्यो ऽपि गृहीतो भवता हृदि

sarvathāsmyanyakāryo 'pi gṛhīto bhavatā hṛdi

6.6.2

भर्तृस्नेहश्च यस्यायमीदृशः शक्तिरेव च

bhartṛsnehaśca yasyāyamīdṛśaḥ śaktireva ca

6.7

अस्निग्धो ऽपि समर्थो ऽस्ति निःसामर्थ्यो ऽपि भक्तिमान्

asnigdho 'pi samartho 'sti niḥsāmarthyo 'pi bhaktimān

6.7.2

भक्तिमांश्चैव शक्तश्च दुर्लभस्त्वद्विधो भुवि

bhaktimāṃścaiva śaktaśca durlabhastvadvidho bhuvi

6.8

तत्प्रीतो ऽस्मि तवानेन महाभागेन कर्मणा

tatprīto 'smi tavānena mahābhāgena karmaṇā

Buddhacarita