1.21

यस्य प्रसूतौ गिरिराजकीला वाताहता नौरिव भूश्चचाल

yasya prasūtau girirājakīlā vātāhatā nauriva bhūścacāla

1.21.2

सचन्दना चोत्पलपद्मगर्भा पपात वृष्टिर्गगनादनभ्रात्

sacandanā cotpalapadmagarbhā papāta vṛṣṭirgaganādanabhrāt

1.22

वाता ववुः स्पर्शसुखा मनोज्ञा दिव्यानि वासांस्यवपातयन्तः

vātā vavuḥ sparśasukhā manojñā divyāni vāsāṃsyavapātayantaḥ

1.22.2

सूर्यः स एवाभ्यधिकं चकाशे जज्वाल सौम्यार्चिर् अनीरितो ऽग्निः

sūryaḥ sa evābhyadhikaṃ cakāśe jajvāla saumyārcir anīrito 'gniḥ

1.23

प्रागुत्तरे चावसथप्रदेशे कूपः स्वयं प्रादुरभूत्सिताम्बुः

prāguttare cāvasathapradeśe kūpaḥ svayaṃ prādurabhūtsitāmbuḥ

1.23.2

अन्तःपुराण्यागतविस्मयानि यस्मिन् क्रियास्तीर्थ इव प्रचक्रुः

antaḥpurāṇyāgatavismayāni yasmin kriyāstīrtha iva pracakruḥ

1.24

धर्मार्थिभिर्भूतगणैश्च दिव्यैस्तद्दर्शनार्थं वनमापुपूरे

dharmārthibhirbhūtagaṇaiśca divyaistaddarśanārthaṃ vanamāpupūre

1.24.2

कौतूहलेनैव च पादपेभ्यः पुष्पाण्यकाले ऽप्यवपातयद्भिः

kautūhalenaiva ca pādapebhyaḥ puṣpāṇyakāle 'pyavapātayadbhiḥ

1.25

भूतैरसौम्यैः परित्यक्तहिंसैर्नाकारि पीडा स्वगणे परे वा

bhūtairasaumyaiḥ parityaktahiṃsairnākāri pīḍā svagaṇe pare vā

1.25.2

लोके हि सर्वाश्च विना प्रयासं रुजो नराणां शमयांबभूवुः

loke hi sarvāśca vinā prayāsaṃ rujo narāṇāṃ śamayāṃbabhūvuḥ

1.26

कलं प्रणेदुः मृगपक्षिणश्च शान्ताम्बुवाहाः सरितो बभूवुः

kalaṃ praṇeduḥ mṛgapakṣiṇaśca śāntāmbuvāhāḥ sarito babhūvuḥ

1.26.2

दिशः प्रसेदुर्विमले निरभ्रे विहायसे दुन्दुभयो निनेदुः

diśaḥ prasedurvimale nirabhre vihāyase dundubhayo nineduḥ

1.27

लोकस्य मोक्षाय गुरौ प्रसूते शमं प्रपेदे जगदव्यवस्थम्

lokasya mokṣāya gurau prasūte śamaṃ prapede jagadavyavastham

1.27.2

प्राप्येव नाथं खलु नीतिमन्तम् एको न मारो मुदमाप लोके

prāpyeva nāthaṃ khalu nītimantam eko na māro mudamāpa loke

1.28

दिव्याद्भुतं जन्म निरीक्ष्य तस्य धीरो ऽपि राजा बहुक्षोभमेतः

divyādbhutaṃ janma nirīkṣya tasya dhīro 'pi rājā bahukṣobhametaḥ

1.28.2

स्नेहादसौ भीतिप्रमोदजन्ये द्वे वारिधारे मुमुचे नरेन्द्रः

snehādasau bhītipramodajanye dve vāridhāre mumuce narendraḥ

1.29

अमानुषीं तस्य निशम्य शक्तिं माता प्रकृत्या करुणार्द्रचित्ता

amānuṣīṃ tasya niśamya śaktiṃ mātā prakṛtyā karuṇārdracittā

1.29.2

प्रीता च भीता च बभूव देवी शीतोष्णमिश्रेव जलस्य धारा

prītā ca bhītā ca babhūva devī śītoṣṇamiśreva jalasya dhārā

1.30

निरीक्षमाणा भयहेतुमेव ध्यातुं न शेकुः वनिताः प्रवृद्धाः

nirīkṣamāṇā bhayahetumeva dhyātuṃ na śekuḥ vanitāḥ pravṛddhāḥ

1.30.2

पूताश्च ता मङ्गलकर्म चक्रुः शिवं ययाचुः शिशवे सुरौघान्

pūtāśca tā maṅgalakarma cakruḥ śivaṃ yayācuḥ śiśave suraughān

Buddhacarita