1.11

क्रमेण गर्भादभिनिःसृतः सन् बभौ च्युतः खादिव योन्यजातः

krameṇa garbhādabhiniḥsṛtaḥ san babhau cyutaḥ khādiva yonyajātaḥ

1.11.2

कल्पेष्वनेकेषु च भावितात्मा यः सम्प्रजानन् सुषुवे न मूढः

kalpeṣvanekeṣu ca bhāvitātmā yaḥ samprajānan suṣuve na mūḍhaḥ

1.12

दीप्त्या च धैर्येण च यो रराज बालो रविभूमिमिवावतीर्णः

dīptyā ca dhairyeṇa ca yo rarāja bālo ravibhūmimivāvatīrṇaḥ

1.12.2

तथातिदीप्तो ऽपि निरीक्ष्यमाणो जहार चक्षूंषि यथा शशाङ्कः

tathātidīpto 'pi nirīkṣyamāṇo jahāra cakṣūṃṣi yathā śaśāṅkaḥ

1.13

स हि स्वगात्रप्रभयोज्ज्वलन्त्या दीपप्रभां भास्करवन्मुमोष

sa hi svagātraprabhayojjvalantyā dīpaprabhāṃ bhāskaravanmumoṣa

1.13.2

महार्हजाम्बूनदचारुवर्णो विद्योतयामास दिशश्च सर्वाः

mahārhajāmbūnadacāruvarṇo vidyotayāmāsa diśaśca sarvāḥ

1.14

अनाकुलान्युब्जसमुद्गतानि निष्पेषवद्व्यायतविक्रमाणि

anākulānyubjasamudgatāni niṣpeṣavadvyāyatavikramāṇi

1.14.2

तथैव धीराणि पदानि सप्त सप्तर्षितारासदृशो जगाम

tathaiva dhīrāṇi padāni sapta saptarṣitārāsadṛśo jagāma

1.15

बोधाय जातो ऽस्मि जगद्धितार्थमन्त्या भवोत्पत्तिरियं ममेति

bodhāya jāto 'smi jagaddhitārthamantyā bhavotpattiriyaṃ mameti

1.15.2

चतुर्दिशं सिंहगतिर्विलोक्य वाणीं च भव्यार्थकरीमुवाच

caturdiśaṃ siṃhagatirvilokya vāṇīṃ ca bhavyārthakarīmuvāca

1.16

खात् प्रस्रुते चन्द्रमरीचिशुभ्रे द्वे वारिधारे शिशिरोष्णवीर्ये

khāt prasrute candramarīciśubhre dve vāridhāre śiśiroṣṇavīrye

1.16.2

शरीरसंस्पर्शसुखान्तराय निपेततुर्मूर्धनि तस्य सौम्ये

śarīrasaṃsparśasukhāntarāya nipetaturmūrdhani tasya saumye

1.17

श्रीमद्विताने कनकोज्ज्वलाङ्गे वैडूर्यपादे शयने शयानम्

śrīmadvitāne kanakojjvalāṅge vaiḍūryapāde śayane śayānam

1.17.2

यद्गौरवात्काञ्चनपद्महस्ता यक्षाधिपाः संपरिवार्य तस्थुः

yadgauravātkāñcanapadmahastā yakṣādhipāḥ saṃparivārya tasthuḥ

1.18

अदृश्यभावाश्च दिवौकसः खे यस्य प्रभावात्प्रणतैः शिरोभिः

adṛśyabhāvāśca divaukasaḥ khe yasya prabhāvātpraṇataiḥ śirobhiḥ

1.18.2

आधारयन् पाण्डरमातपत्रं बोधाय जेपुः परमाशिषश्च

ādhārayan pāṇḍaramātapatraṃ bodhāya jepuḥ paramāśiṣaśca

1.19

महोरगा धर्मविशेषतर्षाद् बुद्धेष्वतीतेषु कृताधिकाराः

mahoragā dharmaviśeṣatarṣād buddheṣvatīteṣu kṛtādhikārāḥ

1.19.2

यम् अव्यजन् भक्तिविशिष्टनेत्रा मन्दारपुष्पैः

yam avyajan bhaktiviśiṣṭanetrā mandārapuṣpaiḥ

1.20

तथागतोत्पादगुणेन तुष्टाः शुद्धाधिवासाश्च विशुद्धसत्त्वाः

tathāgatotpādaguṇena tuṣṭāḥ śuddhādhivāsāśca viśuddhasattvāḥ

1.20.2

देवा ननन्दुर्विगते ऽपि रागे मग्नस्य दुःखे जगतो हिताय

devā nanandurvigate 'pi rāge magnasya duḥkhe jagato hitāya

Buddhacarita