3.35

निःश्वस्य दीर्घं स्वशिरः प्रकम्प्य तस्मिंश्च जीर्णे विनिवेश्य चक्षुः

niḥśvasya dīrghaṃ svaśiraḥ prakampya tasmiṃśca jīrṇe viniveśya cakṣuḥ

3.35.2

तां चैव दृष्ट्वा जनतां सहर्षां वाक्यं स संविग्न इदं जगाद

tāṃ caiva dṛṣṭvā janatāṃ saharṣāṃ vākyaṃ sa saṃvigna idaṃ jagāda

3.36

एवं जरा हन्ति च निर्विशेषं स्मृतिं च रूपं च पराक्रमं च

evaṃ jarā hanti ca nirviśeṣaṃ smṛtiṃ ca rūpaṃ ca parākramaṃ ca

3.36.2

न चैव संवेगमुपैति लोकः प्रत्यक्षतो ऽपीदृशमीक्षमाणः

na caiva saṃvegamupaiti lokaḥ pratyakṣato 'pīdṛśamīkṣamāṇaḥ

3.37

एवं गते सूत निवर्तयाश्वान् शीघ्रं गृहाण्येव भवान्प्रयातु

evaṃ gate sūta nivartayāśvān śīghraṃ gṛhāṇyeva bhavānprayātu

3.37.2

उद्यानभूमौ हि कुतो रतिर्मे जराभये चेतसि वर्तमाने

udyānabhūmau hi kuto ratirme jarābhaye cetasi vartamāne

3.38

अथाज्ञया भर्तृसुतस्य तस्य निवर्तयामास रथं नियन्ता

athājñayā bhartṛsutasya tasya nivartayāmāsa rathaṃ niyantā

3.38.2

ततः कुमारो भवनं तदेव चिन्तावशः शून्यमिव प्रपेदे

tataḥ kumāro bhavanaṃ tadeva cintāvaśaḥ śūnyamiva prapede

3.39

यदा तु तत्रैव न शर्म लेभे जरा जरेति प्रपरीक्षमाणः

yadā tu tatraiva na śarma lebhe jarā jareti praparīkṣamāṇaḥ

3.39.2

ततो नरेन्द्रानुमतः स भूयः क्रमेण तेनैव बहिर्जगाम

tato narendrānumataḥ sa bhūyaḥ krameṇa tenaiva bahirjagāma

3.40

अथापरं व्याधिपरीतदेहं त एव देवाः ससृजुर्मनुष्यम्

athāparaṃ vyādhiparītadehaṃ ta eva devāḥ sasṛjurmanuṣyam

3.40.2

दृष्ट्वा च तं सारथिमाबभाषे शौद्धोदनिस्तद्गतदृष्टिरेव

dṛṣṭvā ca taṃ sārathimābabhāṣe śauddhodanistadgatadṛṣṭireva

3.41

स्थूलोदरः श्वासचलच्छरीरः स्रस्तांसबाहुः कृशपाण्डुगात्रः

sthūlodaraḥ śvāsacalaccharīraḥ srastāṃsabāhuḥ kṛśapāṇḍugātraḥ

3.41.2

अम्बेति वाचं करुणं ब्रुवाणः परं समाश्रित्य नरः क एषः

ambeti vācaṃ karuṇaṃ bruvāṇaḥ paraṃ samāśritya naraḥ ka eṣaḥ

3.42

ततो ऽब्रवीत्सारथिरस्य सौम्य धातुप्रकोपप्रभवः प्रवृद्धः

tato 'bravītsārathirasya saumya dhātuprakopaprabhavaḥ pravṛddhaḥ

3.42.2

रोगाभिधानः सुमहाननर्थः शक्तो ऽपि येनैष कृतो ऽस्वतन्त्रः

rogābhidhānaḥ sumahānanarthaḥ śakto 'pi yenaiṣa kṛto 'svatantraḥ

3.43

इत्यूचिवान् राजसुतः स भूयस्तं सानुकम्पो नरमीक्षमाणः

ityūcivān rājasutaḥ sa bhūyastaṃ sānukampo naramīkṣamāṇaḥ

3.43.2

अस्यैव जातः पृथगेष दोषः सामान्यतो रोगभयं प्रजानाम्

asyaiva jātaḥ pṛthageṣa doṣaḥ sāmānyato rogabhayaṃ prajānām

3.44

ततो बभाषे स रथप्रणेता कुमार साधारण एष दोषः

tato babhāṣe sa rathapraṇetā kumāra sādhāraṇa eṣa doṣaḥ

3.44.2

एवं हि रोगैः परिपीड्यमानो रुजातुरो हर्षमुपैति लोकः

evaṃ hi rogaiḥ paripīḍyamāno rujāturo harṣamupaiti lokaḥ

Buddhacarita