3.15

प्रासादसोपानतलप्रणादैः काञ्चीरवैर्नूपुरनिस्वनैश्च

prāsādasopānatalapraṇādaiḥ kāñcīravairnūpuranisvanaiśca

3.15.2

वित्रासयन्त्यो गृहपक्षिसङ्घानन्योन्यवेगांश्च समाक्षिपन्त्यः

vitrāsayantyo gṛhapakṣisaṅghānanyonyavegāṃśca samākṣipantyaḥ

3.16

कासांचिदासां तु वराङ्गनानां जातत्वराणामपि सोत्सुकानाम्

kāsāṃcidāsāṃ tu varāṅganānāṃ jātatvarāṇāmapi sotsukānām

3.16.2

गतिं गुरुत्वाज्जगृहुर्विशालाः श्रोणीरथाः पीनपयोधराश्च

gatiṃ gurutvājjagṛhurviśālāḥ śroṇīrathāḥ pīnapayodharāśca

3.17

शीघ्रं समर्थापि तु गन्तुमन्या गतिं निजग्राह ययौ न तूर्णम्

śīghraṃ samarthāpi tu gantumanyā gatiṃ nijagrāha yayau na tūrṇam

3.17.2

ह्रियाप्रगल्भा विनिगूहमाना रहःप्रयुक्तानि विभूषणानि

hriyāpragalbhā vinigūhamānā rahaḥprayuktāni vibhūṣaṇāni

3.18

परस्परोत्पीडनपिण्डितानां संमर्दसंक्षोभिकुण्डलानाम्

parasparotpīḍanapiṇḍitānāṃ saṃmardasaṃkṣobhikuṇḍalānām

3.18.2

तासां तदा सस्वनभूषणानां वातायनेष्वप्रशमो बभूव

tāsāṃ tadā sasvanabhūṣaṇānāṃ vātāyaneṣvapraśamo babhūva

3.19

वातायनेभ्यस्तु विनिःसृतानि

vātāyanebhyastu viniḥsṛtāni

3.19.2

स्त्रीणां विरेजुर्मुखपङ्कजानि सक्तानि हर्म्येष्विव पङ्कजानि

strīṇāṃ virejurmukhapaṅkajāni saktāni harmyeṣviva paṅkajāni

3.20

ततो विमानैर्युवतीकरालैः कौतूहलोद्घाटितवातायनैः

tato vimānairyuvatīkarālaiḥ kautūhalodghāṭitavātāyanaiḥ

3.20.2

श्रीमत्समन्तान्नगरं बभासे वियद्विमानैरिव साप्सरोभिः

śrīmatsamantānnagaraṃ babhāse viyadvimānairiva sāpsarobhiḥ

3.21

वातायनानाम् अविशालभावाद् अन्योन्यगण्डार्पितकुण्डलानाम्

vātāyanānām aviśālabhāvād anyonyagaṇḍārpitakuṇḍalānām

3.21.2

मुखानि रेजुः प्रमदोत्तमानां बद्धाः कलापा इव पङ्कजानाम्

mukhāni rejuḥ pramadottamānāṃ baddhāḥ kalāpā iva paṅkajānām

3.22

तं ताः कुमारं पथि वीक्षमाणाः स्त्रियो बभुर् गाम् इव गन्तुकामाः

taṃ tāḥ kumāraṃ pathi vīkṣamāṇāḥ striyo babhur gām iva gantukāmāḥ

3.22.2

ऊर्ध्वोन्मुखाश्चैनमुदीक्षमाणा नरा बभुर् द्याम् इव गन्तुकामाः

ūrdhvonmukhāścainamudīkṣamāṇā narā babhur dyām iva gantukāmāḥ

3.23

दृष्ट्वा च तं राजसुतं स्त्रियस्ता जाज्वल्यमानं वपुषा श्रिया च

dṛṣṭvā ca taṃ rājasutaṃ striyastā jājvalyamānaṃ vapuṣā śriyā ca

3.23.2

धन्यास्य भार्येति शनैरवोचञ्शुद्धैर्मनोभिः खलु नान्यभावात्

dhanyāsya bhāryeti śanairavocañśuddhairmanobhiḥ khalu nānyabhāvāt

3.24

अयं किल व्यायतपीनबाहू रूपेण साक्षादिव पुष्पकेतुः

ayaṃ kila vyāyatapīnabāhū rūpeṇa sākṣādiva puṣpaketuḥ

3.24.2

त्यक्त्वा श्रियं धर्ममुपैष्यतीति तस्मिन् हि ता गौरवमेव चक्रुः

tyaktvā śriyaṃ dharmamupaiṣyatīti tasmin hi tā gauravameva cakruḥ

Buddhacarita