4.131.2

एवम् एते मया लब्धास् तुष्टान् नारायणाद् इति

evam ete mayā labdhās tuṣṭān nārāyaṇād iti

4.132

इति हृष्टमतिर् निशाम्य तस्याश् चरितं पुत्रसमूहलाभहेतुम्

iti hṛṣṭamatir niśāmya tasyāś caritaṃ putrasamūhalābhahetum

4.132.2

सचिवैः सहितश् चकार राजा सुतसंप्राप्तिफलं क्रियाविचारम्

sacivaiḥ sahitaś cakāra rājā sutasaṃprāptiphalaṃ kriyāvicāram

5.1

अथ संप्रेषितास्थानः सचिवान् अब्रवीन् नृपः

atha saṃpreṣitāsthānaḥ sacivān abravīn nṛpaḥ

5.1.2

यद् ब्रवीमि निबोधन्तु भवन्तस् तत् सचेतसः

yad bravīmi nibodhantu bhavantas tat sacetasaḥ

5.2

ऋणैः किल समाघ्रातः पुरुषो जायते त्रिभिः

ṛṇaiḥ kila samāghrātaḥ puruṣo jāyate tribhiḥ

5.2.2

ब्रह्मचर्येष्टिसंतानैर् ऋषिदेवस्वधाभुजाम्

brahmacaryeṣṭisaṃtānair ṛṣidevasvadhābhujām

5.3

तत्राधिगतवेदो ऽहम् इष्टाशेषमहाक्रतुः

tatrādhigatavedo 'ham iṣṭāśeṣamahākratuḥ

5.3.2

अपुत्रत्वात् तु पितृभिर् गृहीतः पिण्डभोजिभिः

aputratvāt tu pitṛbhir gṛhītaḥ piṇḍabhojibhiḥ

5.4

न च पुत्राङ्गसंस्पर्शात् सुखहेतुर् अनुत्तरः

na ca putrāṅgasaṃsparśāt sukhahetur anuttaraḥ

5.4.2

सुखिभिः स हि निर्दिष्टश् चन्दनाद् अपि शीतलः

sukhibhiḥ sa hi nirdiṣṭaś candanād api śītalaḥ

5.5

अलं चातिप्रसङ्गेन सर्वथा गृहमेधिनाम्

alaṃ cātiprasaṅgena sarvathā gṛhamedhinām

5.5.2

दृष्टादृष्टसुखप्राप्तेः पुत्राद् अन्यन् न कारणम्

dṛṣṭādṛṣṭasukhaprāpteḥ putrād anyan na kāraṇam

5.6

तद् अस्ति यदि वः काङ्क्षा निष्प्रजानां प्रजां प्रति

tad asti yadi vaḥ kāṅkṣā niṣprajānāṃ prajāṃ prati

5.6.2

आरभध्वं मया सार्धं देवताराधनं ततः

ārabhadhvaṃ mayā sārdhaṃ devatārādhanaṃ tataḥ

5.7

ते तु सप्रमदाः श्रुत्वा राज्ञः पुत्रार्थिनः कथाम्

te tu sapramadāḥ śrutvā rājñaḥ putrārthinaḥ kathām

5.7.2

सिद्धकल्पात्मसंकल्पाः प्रत्यूचुर् दर्शितस्मिताः

siddhakalpātmasaṃkalpāḥ pratyūcur darśitasmitāḥ

5.8

पुत्रजन्म वणिग्वध्वा यात्रायां चित्रदर्शनम्

putrajanma vaṇigvadhvā yātrāyāṃ citradarśanam

5.8.2

पिङ्गलीदर्शनं चेति प्रयोगो ऽयम् अनुष्ठितः

piṅgalīdarśanaṃ ceti prayogo 'yam anuṣṭhitaḥ

5.9

अस्माभिः स च देवेन तथैव सफलीकृतः

asmābhiḥ sa ca devena tathaiva saphalīkṛtaḥ

Bṛhatkathāślokasaṃgraha