2.40

पराजितं परेणाथ दृष्ट्वा स्वं राज्यहस्तिनम्

parājitaṃ pareṇātha dṛṣṭvā svaṃ rājyahastinam

2.40.2

निवर्तयितुकामो ऽहम् आसन्नान् इदम् उक्तवान्

nivartayitukāmo 'ham āsannān idam uktavān

2.41

निवर्तयामि राज्येभं शीघ्रम् आनयताङ्कुशम्

nivartayāmi rājyebhaṃ śīghram ānayatāṅkuśam

2.41.2

शिक्षितो वत्सराजेन हस्तिशिक्षाम् अहं ननु

śikṣito vatsarājena hastiśikṣām ahaṃ nanu

2.42

इति मन्त्रयमाणो ऽहम् अलब्धप्रार्थिताङ्कुशः

iti mantrayamāṇo 'ham alabdhaprārthitāṅkuśaḥ

2.42.2

प्रतिबुद्धः ससंत्रासः किम् एतद् इति चिन्तयन्

pratibuddhaḥ sasaṃtrāsaḥ kim etad iti cintayan

2.43

इति स्वप्नो मया दृष्टः क्षणदायाः परिक्षये

iti svapno mayā dṛṣṭaḥ kṣaṇadāyāḥ parikṣaye

2.43.2

फलम् इष्टम् अनिष्टं वा पूज्यैर् अत्रोच्यताम् इति

phalam iṣṭam aniṣṭaṃ vā pūjyair atrocyatām iti

2.44

अथानिष्टफलं स्वप्नं जानन्तो ऽपि द्विजातयः

athāniṣṭaphalaṃ svapnaṃ jānanto 'pi dvijātayaḥ

2.44.2

राजोपचारचतुराः स्थापयामासुर् अन्यथा

rājopacāracaturāḥ sthāpayāmāsur anyathā

2.45

यौ ऽसौ राजन् गजो वन्यस् तं बुध्यस्व विनायकम्

yau 'sau rājan gajo vanyas taṃ budhyasva vināyakam

2.45.2

यश् चाभिषेकहस्ती तं राज्यविघ्नं शरीरिणम्

yaś cābhiṣekahastī taṃ rājyavighnaṃ śarīriṇam

2.46

तत् ते गणपतिः प्रीतः प्रसह्योद्धरति प्रभुः

tat te gaṇapatiḥ prītaḥ prasahyoddharati prabhuḥ

2.46.2

त्वम् अप्य् उन्मूलितानर्थश् चिरं पाहि महीम् इति

tvam apy unmūlitānarthaś ciraṃ pāhi mahīm iti

2.47

इति दुःश्लिष्टम् आकर्ण्य फलं स्वप्नस्य कल्पितम्

iti duḥśliṣṭam ākarṇya phalaṃ svapnasya kalpitam

2.47.2

सुखं नालभताथैनम् अब्रूतां मन्त्रिणाव् इदम्

sukhaṃ nālabhatāthainam abrūtāṃ mantriṇāv idam

2.48

श्रूयतां देव यद् वृत्तं वृद्धस्य जगतीपतेः

śrūyatāṃ deva yad vṛttaṃ vṛddhasya jagatīpateḥ

2.48.2

आवाभ्यां श्रुतम् एतच् च गृहे कथयतः पितुः

āvābhyāṃ śrutam etac ca gṛhe kathayataḥ pituḥ

2.49

मृगेन्द्रासनम् आरोढुं प्रद्योतेन किलेच्छता

mṛgendrāsanam āroḍhuṃ pradyotena kilecchatā

2.49.2

यथाप्रधानमिलिताः पृष्टाः स्वप्नं द्विजातयः

yathāpradhānamilitāḥ pṛṣṭāḥ svapnaṃ dvijātayaḥ

Bṛhatkathāślokasaṃgraha