1.91

अथ राजनि काननावृते पुरम् आस्पन्दितलोकलोचनाम्

atha rājani kānanāvṛte puram āspanditalokalocanām

1.91.2

निभृतश्वसितामयध्वनिं मृतकल्पां प्रविवेश पालकः

nibhṛtaśvasitāmayadhvaniṃ mṛtakalpāṃ praviveśa pālakaḥ

2.1

अथ बिभ्रद् दुरुच्छेदं शोकं भ्रातृवियोगजम्

atha bibhrad durucchedaṃ śokaṃ bhrātṛviyogajam

2.1.2

उत्सृष्टपृथिवीचिन्तः पालकः कालम् अक्षिपत्

utsṛṣṭapṛthivīcintaḥ pālakaḥ kālam akṣipat

2.2

तं पुरोधःप्रभृतयः कदाचिद् अवदन् प्रजाः

taṃ purodhaḥprabhṛtayaḥ kadācid avadan prajāḥ

2.2.2

उत्सीदन्तीः प्रजा राजन् नार्हसि त्वम् उपेक्षितुम्

utsīdantīḥ prajā rājan nārhasi tvam upekṣitum

2.3

भ्रातुः पुरः प्रतिज्ञाय दूरक्षां रक्षितुं क्षितिम्

bhrātuḥ puraḥ pratijñāya dūrakṣāṃ rakṣituṃ kṣitim

2.3.2

किं शोचसि न शोको ऽयम् उपायः क्षितिरक्षणे

kiṃ śocasi na śoko 'yam upāyaḥ kṣitirakṣaṇe

2.4

षष्ठं पापांशम् आदत्ते रक्षन्न् अपि नृपः प्रजाः

ṣaṣṭhaṃ pāpāṃśam ādatte rakṣann api nṛpaḥ prajāḥ

2.4.2

निक्षिप्तक्षितिरक्षस् तु सर्वम् एव न मुञ्चति

nikṣiptakṣitirakṣas tu sarvam eva na muñcati

2.5

तस्माज् जिघांसता पापं पुण्यं चोपचिचीषता

tasmāj jighāṃsatā pāpaṃ puṇyaṃ copacicīṣatā

2.5.2

राजन् धन्याः प्रजाः कार्याः सुखं चानुबुभूषता

rājan dhanyāḥ prajāḥ kāryāḥ sukhaṃ cānububhūṣatā

2.6

न चेद् अर्थयमानानां वचनं नः करिष्यसि

na ced arthayamānānāṃ vacanaṃ naḥ kariṣyasi

2.6.2

ध्रुवं द्रक्ष्यसि संक्रान्ता देशान् राजन्वतः प्रजाः

dhruvaṃ drakṣyasi saṃkrāntā deśān rājanvataḥ prajāḥ

2.7

अवृत्तपूर्वम् अस्माभिर् उदासीने त्वयि श्रुतम्

avṛttapūrvam asmābhir udāsīne tvayi śrutam

2.7.2

बलाद् अग्निगृहान् नीतः पुरोडाशः शुना किल

balād agnigṛhān nītaḥ puroḍāśaḥ śunā kila

2.8

बटोश् च भ्राम्यतो भिक्षां भिक्षापात्राद् अनावृतात्

baṭoś ca bhrāmyato bhikṣāṃ bhikṣāpātrād anāvṛtāt

2.8.2

बटुत्वात् क्षिप्तचित्तस्य हृतः काकेन मोदकः

baṭutvāt kṣiptacittasya hṛtaḥ kākena modakaḥ

2.9

इति श्रुत्वा ससंत्रासो राजा ताडितदुन्दुभिः

iti śrutvā sasaṃtrāso rājā tāḍitadundubhiḥ

2.9.2

मृगेन्द्रासनम् अध्यास्ते सुमेरुं मघवान् इव

mṛgendrāsanam adhyāste sumeruṃ maghavān iva

Bṛhatkathāślokasaṃgraha