Bhāvaprakāśa

āyurveda

Notable Lemmas:

tikta (63 Occurences)laghu (55 Occurences)kapha (52 Occurences)rasa (43 Occurences)kṛ (43 Occurences)viṣa (43 Occurences)uṣṇa (42 Occurences)

701–720 of 1839 verses

6.Karpūrādivarga.86.2

अमृणालं च सेव्यं च समगन्धिकम् इत्यपि

amṛṇālaṃ ca sevyaṃ ca samagandhikam ityapi

6.Karpūrādivarga.87

उशीरं पाचनं शीतं स्तम्भनं लघु तिक्तकम्

uśīraṃ pācanaṃ śītaṃ stambhanaṃ laghu tiktakam

6.Karpūrādivarga.88

मधुरं ज्वरहृद् वान्तिमदनुत् कफपित्तहृत्

madhuraṃ jvarahṛd vāntimadanut kaphapittahṛt

6.Karpūrādivarga.88.2

तृष्णास्रविषवीसर्पदाहकृच्छ्रव्रणापहम्

tṛṣṇāsraviṣavīsarpadāhakṛcchravraṇāpaham

6.Karpūrādivarga.89

जटामांसी भूतजटा जटिला च तपस्विनी

jaṭāmāṃsī bhūtajaṭā jaṭilā ca tapasvinī

6.Karpūrādivarga.89.2

मांसी तिक्ता कषाया च मेध्या कान्तिबलप्रदा

māṃsī tiktā kaṣāyā ca medhyā kāntibalapradā

6.Karpūrādivarga.89.3

स्वाद्वी हिमा त्रिदोषास्रदाहवीसर्पकुष्ठनुत्

svādvī himā tridoṣāsradāhavīsarpakuṣṭhanut

6.Karpūrādivarga.90

शैलेयं तु शिलापुष्पं वृद्धं कालानुसार्यकम्

śaileyaṃ tu śilāpuṣpaṃ vṛddhaṃ kālānusāryakam

6.Karpūrādivarga.91

शैलेयं शीतलं हृद्यं कफपित्तहरं लघु

śaileyaṃ śītalaṃ hṛdyaṃ kaphapittaharaṃ laghu

6.Karpūrādivarga.91.2

कण्डूकुष्ठाश्मरीदाहविषहृद् गुदरक्तहृत्

kaṇḍūkuṣṭhāśmarīdāhaviṣahṛd gudaraktahṛt

6.Karpūrādivarga.92

मुस्तकं न स्त्रियां मुस्तं त्रिषु वारिदनामकम्

mustakaṃ na striyāṃ mustaṃ triṣu vāridanāmakam

6.Karpūrādivarga.92.2

कुरुविन्दश्च संख्यातो ऽपरः क्रोडकसेरुकः

kuruvindaśca saṃkhyāto 'paraḥ kroḍakaserukaḥ

6.Karpūrādivarga.93

भद्रमुस्तं च गुन्द्रा च तथा नागरमुस्तकः

bhadramustaṃ ca gundrā ca tathā nāgaramustakaḥ

6.Karpūrādivarga.93.2

मुस्तं कटु हिमं ग्राहि तिक्तं दीपनपाचनम्

mustaṃ kaṭu himaṃ grāhi tiktaṃ dīpanapācanam

6.Karpūrādivarga.94

कषायं कफपित्तास्रतृड्ज्वरारुचिजन्तुहृत्

kaṣāyaṃ kaphapittāsratṛḍjvarārucijantuhṛt

6.Karpūrādivarga.94.2

अनूपदेशे यज्जातं मुस्तकं तत्प्रशस्यते

anūpadeśe yajjātaṃ mustakaṃ tatpraśasyate

6.Karpūrādivarga.94.3

तत्रापि मुनिभिः प्रोक्तं वरं नागरमुस्तकम्

tatrāpi munibhiḥ proktaṃ varaṃ nāgaramustakam

6.Karpūrādivarga.95

कर्चूरो वेधमुख्यश्च द्राविडः कल्पकः शटी

karcūro vedhamukhyaśca drāviḍaḥ kalpakaḥ śaṭī

6.Karpūrādivarga.95.2

कर्चूरो दीपनो रुच्यः कटुकस्तिक्त एव च

karcūro dīpano rucyaḥ kaṭukastikta eva ca

6.Karpūrādivarga.96

सुगन्धिः कटुपाकः स्यात् कुष्ठार्शोव्रणकासनुत्

sugandhiḥ kaṭupākaḥ syāt kuṣṭhārśovraṇakāsanut