1.48

व्रजन् पथि ददर्शाथ पुरुषं वृषवाहनम्

vrajan pathi dadarśātha puruṣaṃ vṛṣavāhanam

1.48.2

शुश्राव तस्माद्गोरस्य पुरीषं भक्षयेति च

śuśrāva tasmādgorasya purīṣaṃ bhakṣayeti ca

1.49

तद्वाक्याद् भक्षयित्वा तद्ययौ पौष्यनिकेतनम्

tadvākyād bhakṣayitvā tadyayau pauṣyaniketanam

1.49.2

तत्रान्तःपुरम् आसाद्य क्षत्रियां न ददर्श सः

tatrāntaḥpuram āsādya kṣatriyāṃ na dadarśa saḥ

1.50

ताम् अदृष्ट्वा नृपं प्राह त्वद्भार्या किं न दृश्यते

tām adṛṣṭvā nṛpaṃ prāha tvadbhāryā kiṃ na dṛśyate

1.50.2

तन्निशम्याब्रवीत् पौष्यस् तोषाद् अभ्यागतप्रियः

tanniśamyābravīt pauṣyas toṣād abhyāgatapriyaḥ

1.50.3

त्वं न पश्यसि मे जायामुच्छिष्टस्तां पतिव्रताम्

tvaṃ na paśyasi me jāyāmucchiṣṭastāṃ pativratām

1.51

श्रुत्वेत्युत्तङ्कः संस्मृत्य सत्यं गोमयभोजने

śrutvetyuttaṅkaḥ saṃsmṛtya satyaṃ gomayabhojane

1.51.2

भक्षिते न मयाचान्तमुच्छिष्टो ऽस्मीत्युवाच तम्

bhakṣite na mayācāntamucchiṣṭo 'smītyuvāca tam

1.52

अथोपविश्य विधिवत्समाचम्य ददर्श ताम्

athopaviśya vidhivatsamācamya dadarśa tām

1.52.2

क्षत्त्रियां तेजसो मूर्तां लक्ष्मीमिव पतिव्रताम्

kṣattriyāṃ tejaso mūrtāṃ lakṣmīmiva pativratām

1.53

निजवृत्तान्तमावेद्य याचिता तेन सा ददौ

nijavṛttāntamāvedya yācitā tena sā dadau

1.53.2

ते दिव्यकुण्डले तस्मै प्रभामण्डलमण्डिते

te divyakuṇḍale tasmai prabhāmaṇḍalamaṇḍite

1.54

तक्षको ऽर्थयते नित्यमिमे सत्कुण्डले द्विज

takṣako 'rthayate nityamime satkuṇḍale dvija

1.54.2

अप्रमत्तेन गन्तव्यमित्युत्तङ्कमुवाच सा

apramattena gantavyamityuttaṅkamuvāca sā

1.55

प्रतिगृह्य तया दत्ते रुचिरे मणिकुण्डले

pratigṛhya tayā datte rucire maṇikuṇḍale

1.55.2

पौष्येणामन्त्रितः श्राद्धे दृष्ट्वान्नं तं शशाप सः

pauṣyeṇāmantritaḥ śrāddhe dṛṣṭvānnaṃ taṃ śaśāpa saḥ

1.56

अशुच्यन्नमिदं पौष्य त्वया मे समुपाहृतम्

aśucyannamidaṃ pauṣya tvayā me samupāhṛtam

1.56.2

अन्धो भविष्यसीत्युक्ते तेन पौष्यः समभ्यधात्

andho bhaviṣyasītyukte tena pauṣyaḥ samabhyadhāt

1.56.3

भविष्यसि छिन्नवंशस्त्वम् अदुष्टान्नदूषणात्

bhaviṣyasi chinnavaṃśastvam aduṣṭānnadūṣaṇāt

Bhāratamañjarī