1.7.4

अथैनयोः प्रैषकृद् अञ्जली उदकेन पूरयति

athainayoḥ praiṣakṛd añjalī udakena pūrayati

1.7.5

अथास्याञ्जलिनाञ्जलाव् उदकम् आनयति

athāsyāñjalināñjalāv udakam ānayati

1.7.5.2

शं नो देवीर् अभिष्टय आपो भवन्तु पीतये

śaṃ no devīr abhiṣṭaya āpo bhavantu pītaye

1.7.5.3

शं योर् अभिस्रवन्तु न इति

śaṃ yor abhisravantu na iti

1.7.6

अथास्य दक्षिणेन हस्तेन दक्षिणं हस्तम् अभीवाङ्गुष्ठम् अभीव लोमानि गृह्णाति

athāsya dakṣiṇena hastena dakṣiṇaṃ hastam abhīvāṅguṣṭham abhīva lomāni gṛhṇāti

1.7.6.2

देवस्य त्वा सवितुः प्रसवे ऽश्विनोर् बाहुभ्यां पूष्णो हस्ताभ्यां हस्तेन ते हस्तं गृह्णामि सवित्रा प्रसूतः को नामासीति

devasya tvā savituḥ prasave 'śvinor bāhubhyāṃ pūṣṇo hastābhyāṃ hastena te hastaṃ gṛhṇāmi savitrā prasūtaḥ ko nāmāsīti

1.7.7

असाव् इतीतरः प्रत्याह

asāv itītaraḥ pratyāha

1.7.8

तस्य नामाभिपद्य जपति

tasya nāmābhipadya japati

1.7.8.2

असौ सविता ते हस्तम् अग्रभीद् अग्निष्ट आचार्यः कस्य ब्रह्मचार्यसि कस्मै त्वा काय त्वा कम् उपनयाम्य् आगन्ता मा रिषेण्यतः प्रस्थावानो मावस्थातु समन्यवो दृढाश् चिद् अमरिष्णवः कृशाश् चिद् अमरिष्णव आगन्त संरभावहै प्रेतो मृत्युं नुदावहै न मृत्युश्

asau savitā te hastam agrabhīd agniṣṭa ācāryaḥ kasya brahmacāryasi kasmai tvā kāya tvā kam upanayāmy āgantā mā riṣeṇyataḥ prasthāvāno māvasthātu samanyavo dṛḍhāś cid amariṣṇavaḥ kṛśāś cid amariṣṇava āganta saṃrabhāvahai preto mṛtyuṃ nudāvahai na mṛtyuś

1.8.1

प्राणाय त्वाचार्याय परिददामि कुबेराय त्वा महाराजाय परिददामि तक्षकाय त्वा वैशालेयाय परिददाम्य् अग्नये त्वा परिददामि वायवे त्वा परिददामि सूर्याय त्वा परिददामि प्रजापतये त्वा परिददामि प्रजापत इमं गोपायामुम् इति परिदायाथास्य दक्षिणम् अंसं प्रति बाहुम् अन्ववहृत्य नाभिदेशम् अभिमृशति

prāṇāya tvācāryāya paridadāmi kuberāya tvā mahārājāya paridadāmi takṣakāya tvā vaiśāleyāya paridadāmy agnaye tvā paridadāmi vāyave tvā paridadāmi sūryāya tvā paridadāmi prajāpataye tvā paridadāmi prajāpata imaṃ gopāyāmum iti paridāyāthāsya dakṣiṇam aṃsaṃ prati bāhum anvavahṛtya nābhideśam abhimṛśati

1.8.1.2

युवा सुवासाः परिवीत आगात् स उ श्रेयान् भवति जायमानः

yuvā suvāsāḥ parivīta āgāt sa u śreyān bhavati jāyamānaḥ

1.8.1.3

तं धीरासः कवय उन्नयन्ति स्वाधियो मनसा देवयन्त इति

taṃ dhīrāsaḥ kavaya unnayanti svādhiyo manasā devayanta iti

1.8.2

अथास्य दक्षिणं कर्णम् आजपति भूस्त्वयि दधामि भुवस्त्वयि दधामीत्य् उत्तरम्

athāsya dakṣiṇaṃ karṇam ājapati bhūstvayi dadhāmi bhuvastvayi dadhāmīty uttaram

1.8.3

सुवस्त्वयि दधामीति दक्षिणम्

suvastvayi dadhāmīti dakṣiṇam

1.8.4

अपि वोत्तरमेव द्विः सकृद् एव दक्षिणम्

api vottarameva dviḥ sakṛd eva dakṣiṇam

1.8.5

अथैनम् अश्मानम् आस्थापयत्य् आतिष्ठेमम् अश्मानम् अश्मेव त्वं स्थिरो भव प्रमृणीहि दुरस्यून् सहस्व पृतन्यत इति

athainam aśmānam āsthāpayaty ātiṣṭhemam aśmānam aśmeva tvaṃ sthiro bhava pramṛṇīhi durasyūn sahasva pṛtanyata iti

1.8.6

ततः समिधम् आधापयत्य् अग्नये समिधम् आहारिषं बृहते जातवेदसे यथा त्वम् अग्ने समिधा समिध्यस एवं मामायुषा वर्चसा सन्या मेधया प्रजया पशुभिर् ब्रह्मवर्चसेनान्नाद्येन समेधय स्वाहेति

tataḥ samidham ādhāpayaty agnaye samidham āhāriṣaṃ bṛhate jātavedase yathā tvam agne samidhā samidhyasa evaṃ māmāyuṣā varcasā sanyā medhayā prajayā paśubhir brahmavarcasenānnādyena samedhaya svāheti

1.8.7

एकाम् आदधाति

ekām ādadhāti

1.8.8

तिस्र एके

tisra eke

1.8.9

सप्तैके

saptaike

Bhāradvājagṛhyasūtra