1.7.7

तस्माद् विना कमण्डलुना नाध्वानं व्रजेन् न सीमन्तं न गृहाद् गृहम्

tasmād vinā kamaṇḍalunā nādhvānaṃ vrajen na sīmantaṃ na gṛhād gṛham

1.7.8

पदम् अपि न गच्छेद् इषुमात्राद् इत्य् एके

padam api na gacched iṣumātrād ity eke

1.7.9

यद् इच्छेद् धर्मसंततिम् इति बौधायनः

yad icched dharmasaṃtatim iti baudhāyanaḥ

1.7.10

ऋग्विधेनेति वाग् वदति ऋग्विधेनेति वाग् वदति

ṛgvidheneti vāg vadati ṛgvidheneti vāg vadati

1.8.1

अथातः शौचाधिष्ठानम्

athātaḥ śaucādhiṣṭhānam

1.8.2

अद्भिः शुध्यन्ति गात्राणि बुद्धिर् ज्ञानेन शुध्यति

adbhiḥ śudhyanti gātrāṇi buddhir jñānena śudhyati

1.8.2.2

अहिंसया च भूतात्मा मनः सत्येन शुध्यति

ahiṃsayā ca bhūtātmā manaḥ satyena śudhyati

1.8.2.3

इति

iti

1.8.3

मनःशुद्धिर् अन्तःशौचम्

manaḥśuddhir antaḥśaucam

1.8.4

बहिःशौचं व्याख्यास्यामः

bahiḥśaucaṃ vyākhyāsyāmaḥ

1.8.5

कौशं सौत्रं वा त्रिस्त्रिवृद् यज्ञोपवीतम्

kauśaṃ sautraṃ vā tristrivṛd yajñopavītam

1.8.6

आ नाभेः

ā nābheḥ

1.8.7

दक्षिणं बाहुम् उद्धृत्य सव्यम् अवधाय शिरो ऽवदध्यात्

dakṣiṇaṃ bāhum uddhṛtya savyam avadhāya śiro 'vadadhyāt

1.8.8

विपरीतं पितृभ्यः

viparītaṃ pitṛbhyaḥ

1.8.9

कण्ठे ऽवसक्तं निवीतम्

kaṇṭhe 'vasaktaṃ nivītam

1.8.10

अधो ऽवसक्तं अधोवीतम्

adho 'vasaktaṃ adhovītam

1.8.11

प्राङ्मुख उदङ्मुखो वासीनः शौचम् आरभेत शुचौ देशे दक्षिणम् बाहुं जान्वन्तरा कृत्वा प्रक्षाल्य पादौ पाणी चामणिबन्धात्

prāṅmukha udaṅmukho vāsīnaḥ śaucam ārabheta śucau deśe dakṣiṇam bāhuṃ jānvantarā kṛtvā prakṣālya pādau pāṇī cāmaṇibandhāt

1.8.12

पादप्रक्षालनोच्छेषणेन नाचामेत्

pādaprakṣālanoccheṣaṇena nācāmet

1.8.13

यद्य् आचामेद् भूमौ स्रावयित्वाचामेत्

yady ācāmed bhūmau srāvayitvācāmet

1.8.14

ब्राह्मेण तीर्थेनाचामेत्

brāhmeṇa tīrthenācāmet

Baudhāyanadharmasūtra