13.7.2

अथ चन्दनः सम्यक्संबुद्धो जनपदचारिकां चरन्न् अन्यतमां राजधानीम् अनुप्राप्तः

atha candanaḥ samyaksaṃbuddho janapadacārikāṃ carann anyatamāṃ rājadhānīm anuprāptaḥ

13.7.3

अथ राजा क्षत्रियो मूर्धाभिषिक्तो येन चन्दनः सम्यक्संबुद्धस् तेनोपसंक्रान्तः

atha rājā kṣatriyo mūrdhābhiṣikto yena candanaḥ samyaksaṃbuddhas tenopasaṃkrāntaḥ

13.7.4

उपसंक्रम्य चन्दनस्य सम्यक्संबुद्धस्य पादौ शिरसा वन्दित्वैकान्ते न्यषीदत्

upasaṃkramya candanasya samyaksaṃbuddhasya pādau śirasā vanditvaikānte nyaṣīdat

13.7.5

एकान्ते निषण्णं राजानं क्षत्रियं मूर्धाभिषिक्तं चन्दनः सम्यक्संबुद्धो बोधिकरकैर् धर्मैः समादापयति

ekānte niṣaṇṇaṃ rājānaṃ kṣatriyaṃ mūrdhābhiṣiktaṃ candanaḥ samyaksaṃbuddho bodhikarakair dharmaiḥ samādāpayati

13.7.6

अथ राजा क्षत्रियो मूर्धाभिषिक्त उत्थायासनाद् एकांसम् उत्तरासङ्गं कृत्वा दक्षिणं जानुमण्डलं पृथिव्यां प्रतिष्ठाप्य येन चन्दनः सम्यक्संबुद्धस् तेनाञ्जलिं प्रणम्य चन्दनं सम्यक्संबुद्धम् इदम् अवोचत् अधिवासयतु मे भगवान् अस्यां राजधान्यां त्रैमास्यवासाय सार्धं भिक्षुसंघेनेति

atha rājā kṣatriyo mūrdhābhiṣikta utthāyāsanād ekāṃsam uttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya yena candanaḥ samyaksaṃbuddhas tenāñjaliṃ praṇamya candanaṃ samyaksaṃbuddham idam avocat adhivāsayatu me bhagavān asyāṃ rājadhānyāṃ traimāsyavāsāya sārdhaṃ bhikṣusaṃgheneti

13.7.7

अधिवासयति चन्दनः सम्यक्संबुद्धो राज्ञस् तूष्णीभावेन

adhivāsayati candanaḥ samyaksaṃbuddho rājñas tūṣṇībhāvena

13.7.8

तत्र च समयेन महती अनावृष्टिः प्रादुर्भूता यया नद्युदपानान्य् अल्पसलिलानि संवृत्तानि पुष्पफलवियुक्ताश् च पादपाः

tatra ca samayena mahatī anāvṛṣṭiḥ prādurbhūtā yayā nadyudapānāny alpasalilāni saṃvṛttāni puṣpaphalaviyuktāś ca pādapāḥ

13.8

ततो राजा चन्दनं सम्यक्संबुद्धम् अध्येषितुं प्रवृत्तः

tato rājā candanaṃ samyaksaṃbuddham adhyeṣituṃ pravṛttaḥ

13.8.2

भगवन्न् अस्मिन् नगरमध्ये पुष्करिणीं गन्धोदकपरिपूर्णां कारयिष्यामि यत्र भगवान् सश्रावकसंघः स्नास्यति

bhagavann asmin nagaramadhye puṣkariṇīṃ gandhodakaparipūrṇāṃ kārayiṣyāmi yatra bhagavān saśrāvakasaṃghaḥ snāsyati

13.8.3

अप्य् एव नाम भगवतः स्नानाद् अस्मिन् मे विजिते देवो वर्षेद् इति

apy eva nāma bhagavataḥ snānād asmin me vijite devo varṣed iti

13.8.4

अधिवासयति भगवांश् चन्दनः सम्यक्संबुद्धो राज्ञस् तुष्णीभावेन

adhivāsayati bhagavāṃś candanaḥ samyaksaṃbuddho rājñas tuṣṇībhāvena

13.8.5

ततो राज्ञा क्षत्रियेण मूर्धाभिषिक्तेनामात्येभ्य आज्ञा दत्ता गन्धोदकं सज्जीकुर्वन्तु भवन्तः रत्नमयांश् च कुम्भान् येन वयं भगवन्तं सश्रावकसंघं स्नापयिष्याम इति

tato rājñā kṣatriyeṇa mūrdhābhiṣiktenāmātyebhya ājñā dattā gandhodakaṃ sajjīkurvantu bhavantaḥ ratnamayāṃś ca kumbhān yena vayaṃ bhagavantaṃ saśrāvakasaṃghaṃ snāpayiṣyāma iti

13.8.6

ततो राज्ञा अमात्यगणपरिवृतेन तन् नगरम् अपगतपाषाणशर्करकठल्लं व्यवस्थापितम् उच्छ्रितध्वजपताकं नानापुष्पावकीर्णं गन्धोदकपरिषिक्तं विचित्रधूपधूपितम्

tato rājñā amātyagaṇaparivṛtena tan nagaram apagatapāṣāṇaśarkarakaṭhallaṃ vyavasthāpitam ucchritadhvajapatākaṃ nānāpuṣpāvakīrṇaṃ gandhodakapariṣiktaṃ vicitradhūpadhūpitam

13.8.7

पुष्करिणी चास्य कारिता

puṣkariṇī cāsya kāritā

13.8.8

ततो भगवांश् चन्दनः सम्यक्संबुद्धः सर्वानुग्रहार्थम् एकचीवरकः पुष्करिण्यां स्थितः

tato bhagavāṃś candanaḥ samyaksaṃbuddhaḥ sarvānugrahārtham ekacīvarakaḥ puṣkariṇyāṃ sthitaḥ

13.8.9

ततो राज्ञामात्यगणपरिवृतेन चन्दनः सम्यक्संबुद्धः सश्रावकसंघो नानागन्धपरिभावितेनोदकेन स्नापितः

tato rājñāmātyagaṇaparivṛtena candanaḥ samyaksaṃbuddhaḥ saśrāvakasaṃgho nānāgandhaparibhāvitenodakena snāpitaḥ

13.8.10

सहस्नानाद् एव चन्दनस्य सम्यक्संबुद्धस्य शक्रेण देवेन्द्रेण तथाविधं माहेन्द्रं वर्षम् उत्सृष्टं येन सर्वसस्यानि निष्पन्नानि

sahasnānād eva candanasya samyaksaṃbuddhasya śakreṇa devendreṇa tathāvidhaṃ māhendraṃ varṣam utsṛṣṭaṃ yena sarvasasyāni niṣpannāni

13.8.11

तद्धैतुकं च महाजनकायेन बुद्धे भगवति श्रद्धा प्रतिलब्धा

taddhaitukaṃ ca mahājanakāyena buddhe bhagavati śraddhā pratilabdhā

13.8.12

अनेके च गन्धस्तूपाः प्रतिष्ठापिताः

aneke ca gandhastūpāḥ pratiṣṭhāpitāḥ

13.8.13

ये च तत्र चन्दनं सम्यक्संबुद्धं शरणं गताः सर्वे ते परिनिर्वृताः

ye ca tatra candanaṃ samyaksaṃbuddhaṃ śaraṇaṃ gatāḥ sarve te parinirvṛtāḥ

Avadānaśataka