13.4

यावत् पश्यति भगवान् संबहुलान् वणिजो व्यसनसंकटसंबाधप्राप्तान्

yāvat paśyati bhagavān saṃbahulān vaṇijo vyasanasaṃkaṭasaṃbādhaprāptān

13.4.2

ततश् चक्षुःसंप्रेषणमात्रेण जेतवने ऽन्तर्हितो भिक्षुगणपरिवृतस् तं प्रदेशम् अनुप्राप्तः

tataś cakṣuḥsaṃpreṣaṇamātreṇa jetavane 'ntarhito bhikṣugaṇaparivṛtas taṃ pradeśam anuprāptaḥ

13.4.3

ददृशुस् ते वणिजो भगवन्तं सभिक्षुसंघम्

dadṛśus te vaṇijo bhagavantaṃ sabhikṣusaṃgham

13.4.4

दृष्ट्वा च उच्चैर् नादं मुक्तवन्तः

dṛṣṭvā ca uccair nādaṃ muktavantaḥ

13.4.5

ततो भगवता लौकिकं चित्तम् उत्पादितम् अहो बत शक्रो देवेन्द्रो माहेन्द्रं वर्षम् उत्सृजतु शीतलाश् च वायवो वान्त्व् इति

tato bhagavatā laukikaṃ cittam utpāditam aho bata śakro devendro māhendraṃ varṣam utsṛjatu śītalāś ca vāyavo vāntv iti

13.4.6

सहचित्तोत्पादाद् भगवतः शक्रेण माहेन्द्रं वर्षम् उत्सृष्टम् शीतलाश् च वायवः प्रेषिताः यतस् तेषां वणिजां तृषा विगता दाहश् च प्रशान्तः

sahacittotpādād bhagavataḥ śakreṇa māhendraṃ varṣam utsṛṣṭam śītalāś ca vāyavaḥ preṣitāḥ yatas teṣāṃ vaṇijāṃ tṛṣā vigatā dāhaś ca praśāntaḥ

13.4.7

ततस् तैर् वणिग्भिः संज्ञा प्रतिलब्धा

tatas tair vaṇigbhiḥ saṃjñā pratilabdhā

13.4.8

भगवता चैषां मार्ग आख्यातो येन श्रावस्तीम् अनुप्राप्ताः

bhagavatā caiṣāṃ mārga ākhyāto yena śrāvastīm anuprāptāḥ

13.5

ते मार्गश्रमं प्रतिविनोद्य ततो भगवत्सकाशम् उपसंक्रान्ताः

te mārgaśramaṃ prativinodya tato bhagavatsakāśam upasaṃkrāntāḥ

13.5.2

तेषां भगवता तादृशी चतुरार्यसत्यसंप्रतिवेधिकी धर्मदेशना कृता यां श्रुत्वा कैश्चित् स्रोतआपत्तिफलम् अधिगतम् कैश्चित् सकृदागामिफलम् कैश्चिद् अनागामिफलम् कैश्चित् प्रव्रज्य सर्वक्लेशप्रहाणाद् अर्हत्त्वं साक्षात्कृतम् कैश्चिच्छ्रावकबोधौ चित्तान्य् उत्पादितानि कैश्चित् प्रत्येकायां बोधौ कैश्चिद् अनुत्तरायां सम्यक्संबोधौ

teṣāṃ bhagavatā tādṛśī caturāryasatyasaṃprativedhikī dharmadeśanā kṛtā yāṃ śrutvā kaiścit srotaāpattiphalam adhigatam kaiścit sakṛdāgāmiphalam kaiścid anāgāmiphalam kaiścit pravrajya sarvakleśaprahāṇād arhattvaṃ sākṣātkṛtam kaiścicchrāvakabodhau cittāny utpāditāni kaiścit pratyekāyāṃ bodhau kaiścid anuttarāyāṃ samyaksaṃbodhau

13.5.3

यद्भूयसा च सा पर्षद् बुद्धनिम्ना धर्मप्रवणा संघप्राग्भारा व्यवस्थिता

yadbhūyasā ca sā parṣad buddhanimnā dharmapravaṇā saṃghaprāgbhārā vyavasthitā

13.6

भिक्षवः संशयजाताः सर्वसंशयच्छेत्तारं बुद्धं भगवन्तं पप्रच्छुः आश्चर्यं भगवन् यावद् इमे वणिजो भगवता कान्तारमार्गात् परित्राताः

bhikṣavaḥ saṃśayajātāḥ sarvasaṃśayacchettāraṃ buddhaṃ bhagavantaṃ papracchuḥ āścaryaṃ bhagavan yāvad ime vaṇijo bhagavatā kāntāramārgāt paritrātāḥ

13.6.2

सहचित्तोत्पादाच् च माहेन्द्रवर्षं वृष्टम्

sahacittotpādāc ca māhendravarṣaṃ vṛṣṭam

13.6.3

शीतलाश् च वायवः प्रवाता इति

śītalāś ca vāyavaḥ pravātā iti

13.6.4

भगवान् आह तथागतेनैव भिक्षवः पूर्वम् अन्यासु जातिषु कर्माणि कृतान्य् उपचितानि लब्धसंभाराणि परिणतप्रत्ययानि ओघवत् प्रत्युपस्थितान्य् अवश्यंभावीनि

bhagavān āha tathāgatenaiva bhikṣavaḥ pūrvam anyāsu jātiṣu karmāṇi kṛtāny upacitāni labdhasaṃbhārāṇi pariṇatapratyayāni oghavat pratyupasthitāny avaśyaṃbhāvīni

13.6.5

मयैतानि कर्माणि कृतान्य् उपचितानि

mayaitāni karmāṇi kṛtāny upacitāni

13.6.6

को ऽन्यः प्रत्यनुभविष्यति न भिक्षवः कर्माणि कृतान्य् उपचितानि बाह्ये पृथिवीधातौ विपच्यन्ते नाब्धातौ न तेजोधातौ न वायुधातौ अपि तूपात्तेष्व् एव स्कन्धधात्वायतनेषु कर्माणि कृतानि विपच्यन्ते शुभान्य् अशुभानि च

ko 'nyaḥ pratyanubhaviṣyati na bhikṣavaḥ karmāṇi kṛtāny upacitāni bāhye pṛthivīdhātau vipacyante nābdhātau na tejodhātau na vāyudhātau api tūpātteṣv eva skandhadhātvāyataneṣu karmāṇi kṛtāni vipacyante śubhāny aśubhāni ca

13.6.7

न प्रणश्यन्ति कर्माण्य् अपि कल्पशतैर् अपि

na praṇaśyanti karmāṇy api kalpaśatair api

13.6.8

सामग्रीं प्राप्य कालं च फलन्ति खलु देहिनाम्

sāmagrīṃ prāpya kālaṃ ca phalanti khalu dehinām

13.7

भूतपूर्वं भिक्षवो ऽतीते ऽध्वनि चन्दनो नाम सम्यक्संबुद्धो लोक उदपादि तथागतो ऽर्हन् सम्यक्संबुद्धो विद्याचरणसम्पन्नः सुगतो लोकविद् अनुत्तरः पुरुषदम्यसारथिः शास्ता देवमनुष्याणां बुद्धो भगवान्

bhūtapūrvaṃ bhikṣavo 'tīte 'dhvani candano nāma samyaksaṃbuddho loka udapādi tathāgato 'rhan samyaksaṃbuddho vidyācaraṇasampannaḥ sugato lokavid anuttaraḥ puruṣadamyasārathiḥ śāstā devamanuṣyāṇāṃ buddho bhagavān

Avadānaśataka