9.1

बुद्धो भगवान् सत्कृतो गुरुकृतो मानितः पूजितो राजभी राजमात्रैर् धनिभिः पौरैः श्रेष्ठिभिः सार्थवाहैर् देवैर् नागैर् यक्षैर् असुरैर् गरुडैः किन्नरैर् महोरगैर् इति देवनागयक्षासुरगरुडकिन्नरमहोरगाभ्यर्चितो बुद्धो भगवान् ज्ञातो महापुण्यो लाभी चीवरपिण्डपातशयनासनग्लानप्रत्ययभैषज्यपरिष्काराणां सश्रावकसंघः श्रावस्त्यां विहरति जेतवने ऽनाथपिण्डदस्यारामे

buddho bhagavān satkṛto gurukṛto mānitaḥ pūjito rājabhī rājamātrair dhanibhiḥ pauraiḥ śreṣṭhibhiḥ sārthavāhair devair nāgair yakṣair asurair garuḍaiḥ kinnarair mahoragair iti devanāgayakṣāsuragaruḍakinnaramahoragābhyarcito buddho bhagavān jñāto mahāpuṇyo lābhī cīvarapiṇḍapātaśayanāsanaglānapratyayabhaiṣajyapariṣkārāṇāṃ saśrāvakasaṃghaḥ śrāvastyāṃ viharati jetavane 'nāthapiṇḍadasyārāme

9.2

तेन खलु समयेन श्रावस्त्यां द्वौ श्रेष्ठिनौ

tena khalu samayena śrāvastyāṃ dvau śreṣṭhinau

9.2.2

ताव् अन्योन्यं प्रतिविरुद्धौ बभूवतुः

tāv anyonyaṃ prativiruddhau babhūvatuḥ

9.2.3

ताभ्याम् एकः पूरणे ऽभिप्रसन्नः द्वितीयो बुद्धे भगवति

tābhyām ekaḥ pūraṇe 'bhiprasannaḥ dvitīyo buddhe bhagavati

9.2.4

ततस् तयोः परस्परं कथासांकथ्यविनिश्चये वर्तमाने पूरणोपासक आह बुद्धात् पूरणो विशिष्टतर इति

tatas tayoḥ parasparaṃ kathāsāṃkathyaviniścaye vartamāne pūraṇopāsaka āha buddhāt pūraṇo viśiṣṭatara iti

9.2.5

बुद्धोपासक आह भगवान् सम्यक्संबुद्धो विशिष्टतर इति

buddhopāsaka āha bhagavān samyaksaṃbuddho viśiṣṭatara iti

9.2.6

ततस् ताभ्यां सर्वस्वापहरणे बन्धनिक्षेपः कृतः

tatas tābhyāṃ sarvasvāpaharaṇe bandhanikṣepaḥ kṛtaḥ

9.3

यावद् राज्ञः प्रसेनजितः श्रुतम्

yāvad rājñaḥ prasenajitaḥ śrutam

9.3.2

तेनामात्यानाम् आज्ञा दत्ता तयोर् मीमांसा कर्तव्येति

tenāmātyānām ājñā dattā tayor mīmāṃsā kartavyeti

9.3.3

ततस् तैर् अमात्यैः सर्वविजिते घण्टावघोषणं कारितम् सप्तमे दिवसे बुद्धतीर्थिकोपासकयोर् मीमांसा भविष्यति ये चाद्भुतानि द्रष्टुकामास् ते आगच्छन्त्व् इति

tatas tair amātyaiḥ sarvavijite ghaṇṭāvaghoṣaṇaṃ kāritam saptame divase buddhatīrthikopāsakayor mīmāṃsā bhaviṣyati ye cādbhutāni draṣṭukāmās te āgacchantv iti

9.3.4

ततः सप्तमे दिवसे विस्तीर्णावकाशे पृथिवीप्रदेशे ऽनेकेषु प्राणिशतसहस्रेषु संनिपतितेषु गगनतले चानेकेषु देवतासहस्रेषु संनिपतितेषु गोमयमण्डलके क्ﾱप्ते सर्वगन्धमाल्येषूपहृतेषु पूर्वतरं तीर्थिकोपासकेन सत्योपयाचनं कृतम् येन सत्येन पूरणप्रभृतयः षट् शास्तारो लोके श्रेष्ठाः अनेन सत्येनेमानि पुष्पाणि अयं च धूपः इदं च पानीयं तान् उपगच्छन्त्व् इति

tataḥ saptame divase vistīrṇāvakāśe pṛthivīpradeśe 'nekeṣu prāṇiśatasahasreṣu saṃnipatiteṣu gaganatale cānekeṣu devatāsahasreṣu saṃnipatiteṣu gomayamaṇḍalake kﾱpte sarvagandhamālyeṣūpahṛteṣu pūrvataraṃ tīrthikopāsakena satyopayācanaṃ kṛtam yena satyena pūraṇaprabhṛtayaḥ ṣaṭ śāstāro loke śreṣṭhāḥ anena satyenemāni puṣpāṇi ayaṃ ca dhūpaḥ idaṃ ca pānīyaṃ tān upagacchantv iti

9.4

ततो महाजनकायेन किलकिलाप्रक्ष्वेडोच्चैर् नादो मुक्तः यम् अभिवीक्ष्य तीर्थ्योपासकस् तुष्णीभूतो मङ्कुभूतः स्रस्तस्कन्धो ऽधोमुखो निष्प्रतिभानः प्रध्यानपरमः करे कपोलं दत्त्वा चिन्तापरो व्यवस्थितः

tato mahājanakāyena kilakilāprakṣveḍoccair nādo muktaḥ yam abhivīkṣya tīrthyopāsakas tuṣṇībhūto maṅkubhūtaḥ srastaskandho 'dhomukho niṣpratibhānaḥ pradhyānaparamaḥ kare kapolaṃ dattvā cintāparo vyavasthitaḥ

9.5

ततो भगवच्छ्रावकेण हर्षोत्कण्ठजातेन प्रसादविकसिताभ्यां नयनाभ्याम् एकांसम् उत्तरासङ्गं कृत्वा दक्षिणजानुमण्डलं पृथिव्यां प्रतिष्ठाप्य सत्योपयाचनं कृतम् येन सत्येन भगवान् सर्वसत्त्वानाम् अग्र्यः अनेन सत्येनेमानि पुष्पाणि धूप उदकं भगवन्तम् उपगच्छन्त्व् इति

tato bhagavacchrāvakeṇa harṣotkaṇṭhajātena prasādavikasitābhyāṃ nayanābhyām ekāṃsam uttarāsaṅgaṃ kṛtvā dakṣiṇajānumaṇḍalaṃ pṛthivyāṃ pratiṣṭhāpya satyopayācanaṃ kṛtam yena satyena bhagavān sarvasattvānām agryaḥ anena satyenemāni puṣpāṇi dhūpa udakaṃ bhagavantam upagacchantv iti

9.5.2

एवं प्रव्याहृतमात्रे तानि पुष्पाणि हंसपङ्क्तिर् इवाकाशे जेतवनाभिमुखं सम्प्रस्थितानि धूपो ऽभ्रकूटवत् उदकं वैडूर्यशलाकवत्

evaṃ pravyāhṛtamātre tāni puṣpāṇi haṃsapaṅktir ivākāśe jetavanābhimukhaṃ samprasthitāni dhūpo 'bhrakūṭavat udakaṃ vaiḍūryaśalākavat

9.5.3

अथ स महाजनकायस् तत् प्रातिहार्यं दृष्ट्वा किलकिलाप्रक्ष्वेडोच्चैःशब्दं कुर्वंस् तेषां सम्प्रस्थितानां पृष्ठतः पृष्ठतः समनुबद्धः

atha sa mahājanakāyas tat prātihāryaṃ dṛṣṭvā kilakilāprakṣveḍoccaiḥśabdaṃ kurvaṃs teṣāṃ samprasthitānāṃ pṛṣṭhataḥ pṛṣṭhataḥ samanubaddhaḥ

9.6

ततस् तानि पुष्पाणि भगवत उपरि स्थितानि धूप उदकं चाग्रतः

tatas tāni puṣpāṇi bhagavata upari sthitāni dhūpa udakaṃ cāgrataḥ

9.6.2

ततः स महाजनकायो लब्धप्रसादो भगवतः पादाभिवन्दनं कृत्वा पुरस्तान् निषण्णो धर्मश्रवणाय

tataḥ sa mahājanakāyo labdhaprasādo bhagavataḥ pādābhivandanaṃ kṛtvā purastān niṣaṇṇo dharmaśravaṇāya

9.6.3

तेषां भगवान् इदं सूत्रं भाषते स्म

teṣāṃ bhagavān idaṃ sūtraṃ bhāṣate sma

9.6.4

तिस्र इमा ब्राह्मणगृहपतयो ऽग्रप्रज्ञप्तयः

tisra imā brāhmaṇagṛhapatayo 'graprajñaptayaḥ

9.6.5

कतमास् तिस्रः बुद्धे अग्रप्रज्ञप्तिः धर्मे संघे अग्रप्रज्ञप्तिः

katamās tisraḥ buddhe agraprajñaptiḥ dharme saṃghe agraprajñaptiḥ

Avadānaśataka