4.2.4

स इमां चिन्ताम् आपेदे को मे उपायः स्याद्येन धनार्जनं कुर्याम् इति

sa imāṃ cintām āpede ko me upāyaḥ syādyena dhanārjanaṃ kuryām iti

4.2.5

तस्यैतद् अभवत् अयं बुद्धो भगवान् सर्वदेवप्रतिविशिष्टतरः आत्महितपरहितप्रतिपन्नः कारुणिको महाधर्मकामः प्रजावत्सलः यन्न्वहम् इदानीम् अस्य नाम्ना पुनर् अपि महासमुद्रम् अवतरेयम्

tasyaitad abhavat ayaṃ buddho bhagavān sarvadevaprativiśiṣṭataraḥ ātmahitaparahitapratipannaḥ kāruṇiko mahādharmakāmaḥ prajāvatsalaḥ yannvaham idānīm asya nāmnā punar api mahāsamudram avatareyam

4.2.6

सिद्धयानपात्रस् त्व् आगच्छेयं चेद् उपार्धेन धनेनास्य पूजां कुर्याम् इति

siddhayānapātras tv āgaccheyaṃ ced upārdhena dhanenāsya pūjāṃ kuryām iti

4.3

स एवं कृतव्यवसायः पुनर् अपि महासमुद्रम् अवतीर्णः

sa evaṃ kṛtavyavasāyaḥ punar api mahāsamudram avatīrṇaḥ

4.3.2

बुद्धानुभावेन च रत्नद्वीपं सम्प्राप्य महारत्नसंग्रहं कृत्वा कुशलस्वस्तिना स्वगृहम् अनुप्राप्तः

buddhānubhāvena ca ratnadvīpaṃ samprāpya mahāratnasaṃgrahaṃ kṛtvā kuśalasvastinā svagṛham anuprāptaḥ

4.3.3

स मार्गश्रमं प्रतिविनोद्य भाण्डं प्रत्यवेक्षितुम् आरब्धः

sa mārgaśramaṃ prativinodya bhāṇḍaṃ pratyavekṣitum ārabdhaḥ

4.3.4

तस्य नानाविचित्राणि रत्नानि दृष्ट्वा महांल्लाभ उत्पन्नः

tasya nānāvicitrāṇi ratnāni dṛṣṭvā mahāṃllābha utpannaḥ

4.3.5

चिन्तयति च मया ईदृशानां रत्नानां श्रमणस्य गौतमस्य उपार्धं दातव्यं भविष्यति

cintayati ca mayā īdṛśānāṃ ratnānāṃ śramaṇasya gautamasya upārdhaṃ dātavyaṃ bhaviṣyati

4.3.6

यन्न्वहम् एतानि स्वस्याः पत्न्या आयः

yannvaham etāni svasyāḥ patnyā āyaḥ

4.3.7

तेन कार्षापणद्वयेन विक्रीय भगवतो गन्धं दद्याम् इति

tena kārṣāpaṇadvayena vikrīya bhagavato gandhaṃ dadyām iti

4.3.8

स कार्षापणद्वयेनागरुं क्रीत्वा जेतवनं गतः

sa kārṣāpaṇadvayenāgaruṃ krītvā jetavanaṃ gataḥ

4.3.9

ततो ऽपत्रपमाणरूपो द्वारकोष्ठके स्थित्वागरुं धूपितवान्

tato 'patrapamāṇarūpo dvārakoṣṭhake sthitvāgaruṃ dhūpitavān

4.4

अथ भगवांस्तद् रूपम् ऋद्ध्यभिसंस्कारम् अभिसंस्कृतवान् येन स धूप उपरि विहायसम् अभ्युद्गम्य सर्वां च श्रावस्तीं स्फुरित्वा महदभ्रकूटवद् अवस्थितः

atha bhagavāṃstad rūpam ṛddhyabhisaṃskāram abhisaṃskṛtavān yena sa dhūpa upari vihāyasam abhyudgamya sarvāṃ ca śrāvastīṃ sphuritvā mahadabhrakūṭavad avasthitaḥ

4.4.2

तस्य तद् अत्यद्भुतं देवमनुष्यावर्जनकरं प्रातिहार्यं दृष्ट्वा महान् प्रसाद उत्पन्नः

tasya tad atyadbhutaṃ devamanuṣyāvarjanakaraṃ prātihāryaṃ dṛṣṭvā mahān prasāda utpannaḥ

4.4.3

स स्वचित्तं परिभाषितवान् नैतन् मम प्रतिरूपं स्याद् यद् अहं भगवन्तं रत्नैर् नाभ्यर्चयेयम् इति

sa svacittaṃ paribhāṣitavān naitan mama pratirūpaṃ syād yad ahaṃ bhagavantaṃ ratnair nābhyarcayeyam iti

4.5

अथ तेन सार्थवाहेन भगवान् सश्रावकसंघो ऽन्तर्निवेशने भक्तेनोपनिमन्त्रितः

atha tena sārthavāhena bhagavān saśrāvakasaṃgho 'ntarniveśane bhaktenopanimantritaḥ

4.5.2

ततः प्रणीतेनाहारेण संतर्प्य महारत्नैर् अवकीर्णः

tataḥ praṇītenāhāreṇa saṃtarpya mahāratnair avakīrṇaḥ

4.5.3

ततस् तानि रत्नानि उपरि विहायसम् अभ्युद्गम्य मूर्ध्नि भगवतो रत्नकूटागारो रत्नच्छत्रं रत्नमण्डपश् चावस्थितः यन् न शक्यं सुशिक्षितेन कर्मकारेण कर्मान्तेवासिना वा कर्तुम् यथापि तद् बुद्धस्य बुद्धानुभावेन देवतानां च देवतानुभावेन

tatas tāni ratnāni upari vihāyasam abhyudgamya mūrdhni bhagavato ratnakūṭāgāro ratnacchatraṃ ratnamaṇḍapaś cāvasthitaḥ yan na śakyaṃ suśikṣitena karmakāreṇa karmāntevāsinā vā kartum yathāpi tad buddhasya buddhānubhāvena devatānāṃ ca devatānubhāvena

4.6

अथ सार्थवाहो द्विगुणजातप्रसादस् तत्प्रतिहार्यदर्शनान् मूलनिकृत्त इव द्रुमो भगवतः पादयोर् निपत्य प्रणिधानं कर्तुम् आरब्धः अनेनाहं कुशलमूलेन चित्तोत्पादेन देयधर्मपरित्यागेन च अन्धे लोके अनायके अपरिणायके बुद्धो भूयासम् अतीर्णानां सत्त्वानां तारयिता अमुक्तानां मोचयिता अनाश्वस्तानाम् आश्वासयिता अपरिनिर्वृतानां परिनिर्वापयितेति

atha sārthavāho dviguṇajātaprasādas tatpratihāryadarśanān mūlanikṛtta iva drumo bhagavataḥ pādayor nipatya praṇidhānaṃ kartum ārabdhaḥ anenāhaṃ kuśalamūlena cittotpādena deyadharmaparityāgena ca andhe loke anāyake apariṇāyake buddho bhūyāsam atīrṇānāṃ sattvānāṃ tārayitā amuktānāṃ mocayitā anāśvastānām āśvāsayitā aparinirvṛtānāṃ parinirvāpayiteti

4.7

अथ भगवांस् तस्य सार्थवाहस्य हेतुपरंपरां कर्मपरंपरां च ज्ञात्वा स्मितं प्राविष्कार्षीत्

atha bhagavāṃs tasya sārthavāhasya hetuparaṃparāṃ karmaparaṃparāṃ ca jñātvā smitaṃ prāviṣkārṣīt

Avadānaśataka