7.83.4

प्रास्मत् पाशान् वरुण मुञ्च सर्वान् य उत्तमा अधमा वारुणा ये

prāsmat pāśān varuṇa muñca sarvān ya uttamā adhamā vāruṇā ye

7.83.4.2

दुष्वप्न्यं दुरितं निष्वास्मद् अथ गच्छेम सुकृतस्य लोकम्

duṣvapnyaṃ duritaṃ niṣvāsmad atha gacchema sukṛtasya lokam

7.84.1

अनाधृष्यो जातवेदा अमर्त्यो विराड् अग्ने क्षत्रभृद् दीदिहीह

anādhṛṣyo jātavedā amartyo virāḍ agne kṣatrabhṛd dīdihīha

7.84.1.2

विश्वा अमीवाः प्रमुञ्चन् मानुषीभिः शिवाभिर् अद्य परिपाहि नो गयम्

viśvā amīvāḥ pramuñcan mānuṣībhiḥ śivābhir adya paripāhi no gayam

7.84.2

इन्द्र क्षत्रम् अभि वामम् ओजो ऽजायथा वृषभ चर्षणीनाम्

indra kṣatram abhi vāmam ojo 'jāyathā vṛṣabha carṣaṇīnām

7.84.2.2

अपानुदो जनम् अमित्रयन्तम् उरुं देवेभ्यो अकृणोर् उ लोकम्

apānudo janam amitrayantam uruṃ devebhyo akṛṇor u lokam

7.84.3

मृगो न भीमः कुचरो गिरिष्ठाः परावत आ जगम्यात् परस्याः

mṛgo na bhīmaḥ kucaro giriṣṭhāḥ parāvata ā jagamyāt parasyāḥ

7.84.3.2

सृकं संशाय पविम् इन्द्र तिग्मं वि शत्रून् ताढि वि मृधो नुदस्व

sṛkaṃ saṃśāya pavim indra tigmaṃ vi śatrūn tāḍhi vi mṛdho nudasva

7.85.1

त्यम् ऊ षु वाजिनं देवजूतं सहोवानं तरुतारं रथानाम्

tyam ū ṣu vājinaṃ devajūtaṃ sahovānaṃ tarutāraṃ rathānām

7.85.1.2

अरिष्टनेमिं पृतनाजिम् आशुं स्वस्तये तार्क्ष्यम् इहा हुवेम

ariṣṭanemiṃ pṛtanājim āśuṃ svastaye tārkṣyam ihā huvema

7.86.1

त्रातारम् इन्द्रम् अवितारम् इन्द्रं हवे हवे सुहवं शूरम् इन्द्रम्

trātāram indram avitāram indraṃ have have suhavaṃ śūram indram

7.86.1.2

हुवे नु शक्रं पुरुहूतम् इन्द्रं स्वस्ति न इन्द्रो मघवान् कृणोतु

huve nu śakraṃ puruhūtam indraṃ svasti na indro maghavān kṛṇotu

7.87.1

यः अग्नौ रुद्रः यः अप्सु अन्तर् यः ओषधीः वीरुधः आविवेश यः इमा विश्वा भुवनानि चाक्ﾱपे तस्मै रुद्राय नमः अस्तु अग्नये

yaḥ agnau rudraḥ yaḥ apsu antar yaḥ oṣadhīḥ vīrudhaḥ āviveśa yaḥ imā viśvā bhuvanāni cākﾱpe tasmai rudrāya namaḥ astu agnaye

7.88.1

अपेह्य् अरिर् अस्य् अरिर् वा असि विषे विषम् अपृक्था विषम् इद् वा अपृक्थाः

apehy arir asy arir vā asi viṣe viṣam apṛkthā viṣam id vā apṛkthāḥ

7.88.1.2

अहिम् एवाभ्यपेहि तं जहि

ahim evābhyapehi taṃ jahi

7.88.1

अपेह्य् अरिर् अस्य् अरिर् वा असि विषे विषम् अपृक्था विषम् इद् वा अपृक्थाः

apehy arir asy arir vā asi viṣe viṣam apṛkthā viṣam id vā apṛkthāḥ

7.88.1.2

अहिम् एवाभ्यपेहि तं जहि

ahim evābhyapehi taṃ jahi

7.89.1

अपो दिव्या अचायिषम् रसेन सम् अपृक्ष्महि

apo divyā acāyiṣam rasena sam apṛkṣmahi

7.89.1.2

पयस्वान् अग्न आगमं तम् मा सं सृज वर्चसा

payasvān agna āgamaṃ tam mā saṃ sṛja varcasā

7.89.2

सं माग्ने वर्चसा सृज सं प्रजया सम् आयुषा

saṃ māgne varcasā sṛja saṃ prajayā sam āyuṣā

Atharvaveda (Śaunaka)