5.2.8

इमा ब्रह्म बृहद्दिवः कृणवद् इन्द्राय शूषम् अग्रियः स्वर्षाः

imā brahma bṛhaddivaḥ kṛṇavad indrāya śūṣam agriyaḥ svarṣāḥ

5.2.8.2

महो गोत्रस्य क्षयति स्वराजा तुरश् चिद् विश्वम् अर्णवत् तपस्वान्

maho gotrasya kṣayati svarājā turaś cid viśvam arṇavat tapasvān

5.2.9

एवा महान् बृहद्दिवो अथर्वावोचत् स्वां तन्वम् इन्द्रम् एव

evā mahān bṛhaddivo atharvāvocat svāṃ tanvam indram eva

5.2.9.2

स्वसारौ मातरिभ्वरी अरिप्रे हिन्वन्ति चैने शवसा वर्धयन्ति च

svasārau mātaribhvarī aripre hinvanti caine śavasā vardhayanti ca

5.3.1

ममाग्ने वर्चो विहवेष्व् अस्तु वयं त्वेन्धानास् तन्वम् पुषेम

mamāgne varco vihaveṣv astu vayaṃ tvendhānās tanvam puṣema

5.3.1.2

मह्यं नमन्तां प्रदिशश् चतस्रस् त्वयाध्यक्षेण पृतना जयेम

mahyaṃ namantāṃ pradiśaś catasras tvayādhyakṣeṇa pṛtanā jayema

5.3.2

अग्ने मन्युं प्रतिनुदन् परेषां त्वं नो गोपाः परि पाहि विश्वतः

agne manyuṃ pratinudan pareṣāṃ tvaṃ no gopāḥ pari pāhi viśvataḥ

5.3.2.2

अपाञ्चो यन्तु निवता दुरस्यवो ऽमैषां चित्तं प्रबुधां वि नेशत्

apāñco yantu nivatā durasyavo 'maiṣāṃ cittaṃ prabudhāṃ vi neśat

5.3.3

मम देवा विहवे सन्तु सर्व इन्द्रवन्तो मरुतो विष्णुर् अग्निः

mama devā vihave santu sarva indravanto maruto viṣṇur agniḥ

5.3.3.2

ममान्तरिक्षम् उरुलोकम् अस्तु मह्यं वातः पवतां कामायास्मै

mamāntarikṣam urulokam astu mahyaṃ vātaḥ pavatāṃ kāmāyāsmai

5.3.4

मह्यं यजन्तां मम यानीष्टाकूतिः सत्या मनसो मे अस्तु

mahyaṃ yajantāṃ mama yānīṣṭākūtiḥ satyā manaso me astu

5.3.4.2

एनो मा नि गां कतमच् चनाहं विश्वे देवा अभि रक्षन्तु मेह

eno mā ni gāṃ katamac canāhaṃ viśve devā abhi rakṣantu meha

5.3.5

मयि देवा द्रविणम् आ यजन्तां मयि आशीर् अस्तु मयि देवहूतिः

mayi devā draviṇam ā yajantāṃ mayi āśīr astu mayi devahūtiḥ

5.3.5.2

दैवाः होतारः सनिषन् न एतद् अरिष्टाः स्याम तन्वा सुवीराः

daivāḥ hotāraḥ saniṣan na etad ariṣṭāḥ syāma tanvā suvīrāḥ

5.3.6

दैवीः षड् उर्वीर् उरु नः कृणोत विश्वे देवास इह मादयध्वम्

daivīḥ ṣaḍ urvīr uru naḥ kṛṇota viśve devāsa iha mādayadhvam

5.3.6.2

मा नो विदद् अभिभा मो अशस्तिर् मा नो विदद् वृजिना द्वेष्या या

mā no vidad abhibhā mo aśastir mā no vidad vṛjinā dveṣyā yā

5.3.7

तिस्रो देवीर् महि नः शर्म यच्छत प्रजायै नस् तन्वे यच् च पुष्टम्

tisro devīr mahi naḥ śarma yacchata prajāyai nas tanve yac ca puṣṭam

5.3.7.2

मा हास्महि प्रजया मा तनूभिर् मा रधाम द्विषते सोम राजन्

mā hāsmahi prajayā mā tanūbhir mā radhāma dviṣate soma rājan

5.3.8

उरुव्यचा नो महिषः शर्म यच्छत्व् अस्मिन् हवे पुरुहूतः पुरुक्षु

uruvyacā no mahiṣaḥ śarma yacchatv asmin have puruhūtaḥ purukṣu

5.3.8.2

स नः प्रजायै हर्यश्व मृडेन्द्र मा नो रीरिषो मा परा दाः

sa naḥ prajāyai haryaśva mṛḍendra mā no rīriṣo mā parā dāḥ

Atharvaveda (Śaunaka)