3.3

ये च दृष्टा ये चादृष्टा उभयेहाविष्यवः

ye ca dṛṣṭā ye cādṛṣṭā ubhayehāviṣyavaḥ

3.3.2

तेषां वो अग्रभं नाम सर्वे साकं नि जस्यत

teṣāṃ vo agrabhaṃ nāma sarve sākaṃ ni jasyata

3.4

अदृष्टहननी वीरुद् अमितौजा विषासहि

adṛṣṭahananī vīrud amitaujā viṣāsahi

3.4.2

चुकाकणि त्वं जज्ञिषे सादृष्टाञ् जातशो जहि

cukākaṇi tvaṃ jajñiṣe sādṛṣṭāñ jātaśo jahi

3.5

जहि ज्येष्ठम् अदृष्टानां सर्पाणां मोघचारिणाम्

jahi jyeṣṭham adṛṣṭānāṃ sarpāṇāṃ moghacāriṇām

3.5.2

क्रिमीणां सर्वा जातानि पौञ्जष्ट इव यवं मृण

krimīṇāṃ sarvā jātāni pauñjaṣṭa iva yavaṃ mṛṇa

3.6

यश् च तोदो यश् च सर्प एकादशश् च यो वृषा

yaś ca todo yaś ca sarpa ekādaśaś ca yo vṛṣā

3.6.2

चुकाकणि त्वं तान् वृश्च वृक्षं परशुमान् इव

cukākaṇi tvaṃ tān vṛśca vṛkṣaṃ paraśumān iva

3.7

सं वृश्चैनांश् चुकाकणि वृक्षं परशुमान् इव

saṃ vṛścaināṃś cukākaṇi vṛkṣaṃ paraśumān iva

3.7.2

क्रिमीणां सर्वा जातानि सं दहाग्निर् इवोलपम्

krimīṇāṃ sarvā jātāni saṃ dahāgnir ivolapam

3.8

मेथिष्ठा अग्निर् अघलस् त्विषीमान् क्रिमीणां जातानि प्र दुनोतु सर्वा

methiṣṭhā agnir aghalas tviṣīmān krimīṇāṃ jātāni pra dunotu sarvā

3.8.2

बृहस्पतेर् मेदिने जातवेदा अदृष्टान् हन्तु दृषदेव माषान्

bṛhaspater medine jātavedā adṛṣṭān hantu dṛṣadeva māṣān

4.1

ममाग्ने वर्चो विहवेष्व् अस्तु वयं त्वेन्धानास् तन्वं पुषेम

mamāgne varco vihaveṣv astu vayaṃ tvendhānās tanvaṃ puṣema

4.1.2

मह्यं नमन्तां प्रदिशश् चतस्रस् त्वयाध्यक्षेण पृतना जयेम

mahyaṃ namantāṃ pradiśaś catasras tvayādhyakṣeṇa pṛtanā jayema

4.2

अग्ने मन्युं प्रतिनुदन् परेषां त्वं नो गोपाः परि पाहि विश्वतः

agne manyuṃ pratinudan pareṣāṃ tvaṃ no gopāḥ pari pāhi viśvataḥ

4.2.2

अपाञ्चो यन्तु प्रबुधा दुरस्यवो ऽमैषां चित्तं बहुधा वि नश्यतु

apāñco yantu prabudhā durasyavo 'maiṣāṃ cittaṃ bahudhā vi naśyatu

4.3

मम देवा विहवे सन्तु सर्व इन्द्रवन्तो मरुतो विष्णुर् अग्निः

mama devā vihave santu sarva indravanto maruto viṣṇur agniḥ

4.3.2

ममान्तरिक्षम् उरुलोकम् अस्तु मह्यं वातः पवतां कामे अस्मिन्

mamāntarikṣam urulokam astu mahyaṃ vātaḥ pavatāṃ kāme asmin

4.4

मह्यं यजन्तां मम यानीष्टाकूतिः सत्या मनसो मे अस्तु

mahyaṃ yajantāṃ mama yānīṣṭākūtiḥ satyā manaso me astu

4.4.2

एनो मा नि गां कतमच् चनाहं विश्वे देवा अभि रक्षन्तु माम् इह

eno mā ni gāṃ katamac canāhaṃ viśve devā abhi rakṣantu mām iha

Atharvaveda (Paippalāda)