2.1

इयं पित्रे राष्ट्र्य् एत्य् अग्रे प्रथमाय जनुषे भूमनिष्ठाः

iyaṃ pitre rāṣṭry ety agre prathamāya januṣe bhūmaniṣṭhāḥ

2.1.2

तस्मा एतं सुरुचं ह्वारम् अह्यं घर्मं श्रीणन्ति प्रथमस्य धास्योः

tasmā etaṃ surucaṃ hvāram ahyaṃ gharmaṃ śrīṇanti prathamasya dhāsyoḥ

2.2

ब्रह्म जज्ञानं प्रथमं पुरस्ताद् वि सीमतः सुरुचो वेन आवः

brahma jajñānaṃ prathamaṃ purastād vi sīmataḥ suruco vena āvaḥ

2.2.2

स बुध्न्या उपमा अस्य विष्ठाः सतश् च योनिम् असतश् च वि वः

sa budhnyā upamā asya viṣṭhāḥ sataś ca yonim asataś ca vi vaḥ

2.3

प्र यो जज्ञे विद्वाṁ अस्य बन्धुं विश्वानि देवो जनिमा विवक्ति

pra yo jajñe vidvāṁ asya bandhuṃ viśvāni devo janimā vivakti

2.3.2

ब्रह्म ब्रह्मण उज् जभार मध्यान् नीचाद् उच्चा स्वधा अभि प्र तस्थौ

brahma brahmaṇa uj jabhāra madhyān nīcād uccā svadhā abhi pra tasthau

2.4

महान् मही अस्कभायद् वि जातो द्यां द्वितः पार्थिवं च रजः

mahān mahī askabhāyad vi jāto dyāṃ dvitaḥ pārthivaṃ ca rajaḥ

2.4.2

स बुध्नाद् आष्ट जनुषाभ्य् अग्रं बृहस्पतिर् देवता तस्य सम्राट्

sa budhnād āṣṭa januṣābhy agraṃ bṛhaspatir devatā tasya samrāṭ

2.5

नूनं तद् अस्य गव्यं हिनोति महो देवस्य पूर्वस्य महि

nūnaṃ tad asya gavyaṃ hinoti maho devasya pūrvasya mahi

2.5.2

एष जज्ञे बहुभिः साकम् इत्था पूर्वाद् अर्धाद् अविथुरश् च सन् नु

eṣa jajñe bahubhiḥ sākam itthā pūrvād ardhād avithuraś ca san nu

2.6

स हि दिवः स पृथिव्या ऋतेष्ठा महि क्षामन् रजसी वि ष्कभायति

sa hi divaḥ sa pṛthivyā ṛteṣṭhā mahi kṣāman rajasī vi ṣkabhāyati

2.6.2

अहर् यच् छुक्रं ज्योतिषो जनिष्टाधा द्युमन्तो वि वसन्त्व् अरिप्राः

ahar yac chukraṃ jyotiṣo janiṣṭādhā dyumanto vi vasantv ariprāḥ

2.7

एवाथर्वा पितरं विश्वदेवं बृहस्पतिर् नमसावोचद् अछ

evātharvā pitaraṃ viśvadevaṃ bṛhaspatir namasāvocad acha

2.7.2

त्वं विश्वस्य जनिता धास्य् अग्रे कविर् देवान् न दभाय स्वधावः

tvaṃ viśvasya janitā dhāsy agre kavir devān na dabhāya svadhāvaḥ

2.8

मूर्ध्ना यो अग्रम् अभ्यर्त्य् ओजसा बृहस्पतिम् आ विवासन्ति देवाः

mūrdhnā yo agram abhyarty ojasā bṛhaspatim ā vivāsanti devāḥ

2.8.2

भिनद् वलं वि मृधो दर्दरीति कनिक्रदद् गाः स्वर् अपो जिगाय

bhinad valaṃ vi mṛdho dardarīti kanikradad gāḥ svar apo jigāya

3.1

उद् अपप्तद् असौ सूर्यः पुरुदृष्टो अदृष्टहा

ud apaptad asau sūryaḥ purudṛṣṭo adṛṣṭahā

3.1.2

उदायन् रश्मिभिर् हन्तूदायन्न् अरसाṁ अकः

udāyan raśmibhir hantūdāyann arasāṁ akaḥ

3.2

न्य् अम्रुचद् असौ सूर्यो विश्वदृष्टो अदृष्टहा

ny amrucad asau sūryo viśvadṛṣṭo adṛṣṭahā

3.2.2

निम्रोचन् रश्मिभिर् हन्तु निम्रोचन्न् अरसाṁ अकः

nimrocan raśmibhir hantu nimrocann arasāṁ akaḥ

Atharvaveda (Paippalāda)