3.4

आयं भातु प्रदिशः पञ्च देवीर् इन्द्र इव ज्येष्ठो भवतु प्रजानाम्

āyaṃ bhātu pradiśaḥ pañca devīr indra iva jyeṣṭho bhavatu prajānām

3.4.2

अस्मिन् धेहि पुष्कलं चित्रभान्व् अयं पृणातु रजसोर् उपस्थम्

asmin dhehi puṣkalaṃ citrabhānv ayaṃ pṛṇātu rajasor upastham

3.5

अनु त्वेन्द्रो अवत्व् अनु बृहस्पतिर् अनु त्वा सोमो अन्व् अग्निर् आवीत्

anu tvendro avatv anu bṛhaspatir anu tvā somo anv agnir āvīt

3.5.2

अनु त्वा विश्वे अवन्तु देवाः सप्त राजानो य उदाभिषिक्ताः

anu tvā viśve avantu devāḥ sapta rājāno ya udābhiṣiktāḥ

3.6

अनु त्वा मित्रावरुणेहावताम् अनु द्यावापृथिवी ओषधीभिः

anu tvā mitrāvaruṇehāvatām anu dyāvāpṛthivī oṣadhībhiḥ

3.6.2

सूर्यो अहोभिर् अनु त्वावतु चन्द्रमा नक्षत्रैर् अनु त्वेदम् आवीत्

sūryo ahobhir anu tvāvatu candramā nakṣatrair anu tvedam āvīt

3.7

द्यौश् च त्वा पृथिवी च प्रचेतसौ शुक्रो बृहन् दक्षिणा त्वा पिपर्तु

dyauś ca tvā pṛthivī ca pracetasau śukro bṛhan dakṣiṇā tvā pipartu

3.7.2

अनु स्वधा चिकितां सोमो अग्निः पूषा त्वावतु सविता सवेन

anu svadhā cikitāṃ somo agniḥ pūṣā tvāvatu savitā savena

4.1

स्तुवानम् अग्न आ नय यातुधानं किमीदिनम्

stuvānam agna ā naya yātudhānaṃ kimīdinam

4.1.2

त्वं हि देवान्तितो हन्ता दस्योर् बभूविथ

tvaṃ hi devāntito hantā dasyor babhūvitha

4.2

आज्यस्य परमेष्ठिन् जातवेदस् तनूवशिन्

ājyasya parameṣṭhin jātavedas tanūvaśin

4.2.2

अग्ने तौलस्य प्राशान यातुधानान् वि लापय

agne taulasya prāśāna yātudhānān vi lāpaya

4.3

वि लपन्तु यातुधाना अत्रिणो ये किमीदिनः

vi lapantu yātudhānā atriṇo ye kimīdinaḥ

4.3.2

अथेदम् अग्ने नो हविर् इन्द्रश् च प्रति हर्यतम्

athedam agne no havir indraś ca prati haryatam

4.4

अग्निः पुरस्ताद् आ यच्छतु प्रेन्द्रो नुदतु बाहुमान्

agniḥ purastād ā yacchatu prendro nudatu bāhumān

4.4.2

ब्रवीतु सर्वो यातुमान् अयम् अस्मीत्य् एत्य

bravītu sarvo yātumān ayam asmīty etya

4.5

पश्यामि ते वीर्या जातवेदः प्र णो ब्रूहि यातुधानान् नृचक्षः

paśyāmi te vīryā jātavedaḥ pra ṇo brūhi yātudhānān nṛcakṣaḥ

4.5.2

त्वया सर्वे परितप्ताः पुरस्ताद् आ यन्तु प्रब्रुवाणा उपेदम्

tvayā sarve paritaptāḥ purastād ā yantu prabruvāṇā upedam

4.6

आ रभस्व जातवेदो हृदः कामाय रन्धय

ā rabhasva jātavedo hṛdaḥ kāmāya randhaya

4.6.2

दूतो नो अग्न उत् तिष्ठ यातुधानान् इहा नय

dūto no agna ut tiṣṭha yātudhānān ihā naya

Atharvaveda (Paippalāda)