2.1

भूतो भूतेषु पय आ दधाति स भूतानाम् अधिपतिर् बभूव

bhūto bhūteṣu paya ā dadhāti sa bhūtānām adhipatir babhūva

2.1.2

स ते मृत्युश् चरति राजसूयं स राजा राज्यम् अनु मन्यताम् इदम्

sa te mṛtyuś carati rājasūyaṃ sa rājā rājyam anu manyatām idam

2.2

अभि प्रेहि वीरयस्वोग्रश् चेत्ता सपत्नहा

abhi prehi vīrayasvograś cettā sapatnahā

2.2.2

आ तिष्ठ मित्रवर्धन तुभ्यं देवा अधि ब्रुवन्

ā tiṣṭha mitravardhana tubhyaṃ devā adhi bruvan

2.3

आतिष्ठन्तं परि विश्वे अभूषञ् छ्रियं वसानश् चरति स्वरोचिः

ātiṣṭhantaṃ pari viśve abhūṣañ chriyaṃ vasānaś carati svarociḥ

2.3.2

महत् तद् वृष्णो असुरस्य नामा विश्वरूपो अमृतानि तस्थौ

mahat tad vṛṣṇo asurasya nāmā viśvarūpo amṛtāni tasthau

2.4

एना व्याघ्रं परिषस्वजानाः सिंहं हिन्वन्ति महते सौभगाय

enā vyāghraṃ pariṣasvajānāḥ siṃhaṃ hinvanti mahate saubhagāya

2.4.2

महिषं न सुभुवस् तस्थिवांसं मर्मृज्यन्ते द्वीपिनम् अप्स्व् अन्तः

mahiṣaṃ na subhuvas tasthivāṃsaṃ marmṛjyante dvīpinam apsv antaḥ

2.5

व्याघ्रो अधि वैयाघ्रे वि क्रमस्व दिशो महीः

vyāghro adhi vaiyāghre vi kramasva diśo mahīḥ

2.5.2

विशस् त्वा सर्वा आ यन्त्व् आपो दिव्याः पयस्वतीः

viśas tvā sarvā ā yantv āpo divyāḥ payasvatīḥ

2.6

या आपो दिव्याः पयसा मदन्ति या अन्तरिक्ष उत पार्थिवा याः

yā āpo divyāḥ payasā madanti yā antarikṣa uta pārthivā yāḥ

2.6.2

तासां त्वा सर्वासाम् अपाम् अभि षिञ्चामि वर्चसा

tāsāṃ tvā sarvāsām apām abhi ṣiñcāmi varcasā

2.7

अभि त्वा वर्चसासिचं दिव्येन पयसा सह

abhi tvā varcasāsicaṃ divyena payasā saha

2.7.2

यथासो मित्रवर्धनस् तथा त्वा सविता करत्

yathāso mitravardhanas tathā tvā savitā karat

3.1

यत् ते चन्द्रं कश्यप रोचनावद् यत् संहितं पुष्कलं चित्रभानु

yat te candraṃ kaśyapa rocanāvad yat saṃhitaṃ puṣkalaṃ citrabhānu

3.1.2

यस्मिन् सूर्या आर्पिताः सप्त साकं तस्मिन् राजानम् अधि वि श्रयेमम्

yasmin sūryā ārpitāḥ sapta sākaṃ tasmin rājānam adhi vi śrayemam

3.2

येभिः शिल्पैः पप्रथानाम् अदृंहो येभिर् दिवम् अभ्यपिंशः प्रविद्वान्

yebhiḥ śilpaiḥ paprathānām adṛṃho yebhir divam abhyapiṃśaḥ pravidvān

3.2.2

येभिर् वाचं पुष्कलैर् अव्ययस् तेन माग्ने वर्चसा सं सृजेह

yebhir vācaṃ puṣkalair avyayas tena māgne varcasā saṃ sṛjeha

3.3

येभिः सूर्य आतपति प्र केतुभिर् येभिर् अग्निर् ददृशे चित्रभानुः

yebhiḥ sūrya ātapati pra ketubhir yebhir agnir dadṛśe citrabhānuḥ

3.3.2

येभिर् आपश् चन्द्रवर्णा अजिन्वन् तेन माग्ने वर्चसा सं सृजेह

yebhir āpaś candravarṇā ajinvan tena māgne varcasā saṃ sṛjeha

Atharvaveda (Paippalāda)