112.5

शतपाशां वि तनोम्य् ऊरुभ्यां जघनेन च

śatapāśāṃ vi tanomy ūrubhyāṃ jaghanena ca

112.5.2

तस्मिन् यो बध्यते बन्धे स मे अस्तु न्यक्षकः

tasmin yo badhyate bandhe sa me astu nyakṣakaḥ

1.1

हिरण्यगर्भः सम् अवर्तताग्रे भूतस्य जातः पतिर् एक आसीत्

hiraṇyagarbhaḥ sam avartatāgre bhūtasya jātaḥ patir eka āsīt

1.1.2

स दाधार पृथिवीं द्याम् उतामुं तस्मै देवाय हविषा विधेम

sa dādhāra pṛthivīṃ dyām utāmuṃ tasmai devāya haviṣā vidhema

1.2

य ओजोदा बलदा यस्य विश्व उपासते प्रशिषं यस्य देवाः

ya ojodā baladā yasya viśva upāsate praśiṣaṃ yasya devāḥ

1.2.2

यस्य छायामृतं यस्य मृत्युस् तस्मै देवाय हविषा विधेम

yasya chāyāmṛtaṃ yasya mṛtyus tasmai devāya haviṣā vidhema

1.3

यः प्राणतो निमिषतो विधर्ता पतिर् विश्वस्य जगतो बभूव

yaḥ prāṇato nimiṣato vidhartā patir viśvasya jagato babhūva

1.3.2

य ईशे ऽस्य द्विपदो यश् चतुष्पदस् तस्मै देवाय हविषा विधेम

ya īśe 'sya dvipado yaś catuṣpadas tasmai devāya haviṣā vidhema

1.4

येन द्यौर् उग्रा पृथिवी च दृढा येन स्व स्तभितं येन नाकः

yena dyaur ugrā pṛthivī ca dṛḍhā yena sva stabhitaṃ yena nākaḥ

1.4.2

यो अन्तरिक्षं विममे वरीयस् तस्मै देवाय हविषा विधेम

yo antarikṣaṃ vimame varīyas tasmai devāya haviṣā vidhema

1.5

य इमे द्यावापृथिवी तस्तभाने अधारयद् अवसा रेजमाने

ya ime dyāvāpṛthivī tastabhāne adhārayad avasā rejamāne

1.5.2

यस्मिन्न् अधि वितत एति सूर्यस् तस्मै देवाय हविषा विधेम

yasminn adhi vitata eti sūryas tasmai devāya haviṣā vidhema

1.6

यस्य विश्वे हिमवन्तो महित्वा समुद्रं यस्य रसया सहाहुः

yasya viśve himavanto mahitvā samudraṃ yasya rasayā sahāhuḥ

1.6.2

दिशो यस्य प्रदिशः पञ्च देवीस् तस्मै देवाय हविषा विधेम

diśo yasya pradiśaḥ pañca devīs tasmai devāya haviṣā vidhema

1.7

आपो ह यस्य विश्वम् आयुर् दधाना गर्भं जनयन्त मातरः

āpo ha yasya viśvam āyur dadhānā garbhaṃ janayanta mātaraḥ

1.7.2

तत्र देवानाम् अधिदेव आस्त एकस्थूणे विमिते दृढ उग्रे

tatra devānām adhideva āsta ekasthūṇe vimite dṛḍha ugre

1.8

आपो गर्भं जनयन्तीर् वत्सम् अग्रे सम् ऐरयन्

āpo garbhaṃ janayantīr vatsam agre sam airayan

1.8.2

तस्योत जायमानस्योल्ब आसीद् धिरण्ययः

tasyota jāyamānasyolba āsīd dhiraṇyayaḥ

1.9

हिरण्य उल्ब आसीद् यो अग्रे वत्सो अजायत

hiraṇya ulba āsīd yo agre vatso ajāyata

1.9.2

तं योन्योर् विद्रवन्त्योः पर्य् अपश्यद् दितिर् मही

taṃ yonyor vidravantyoḥ pary apaśyad ditir mahī

Atharvaveda (Paippalāda)