6.2

उप न एहि वाचस्पते देवेन मनसा सह

upa na ehi vācaspate devena manasā saha

6.2.2

असोष्पते नि रमय मय्य् एव तन्वं मम

asoṣpate ni ramaya mayy eva tanvaṃ mama

6.3

इहैवाभि वि तनूभे आर्त्नी इव ज्यया

ihaivābhi vi tanūbhe ārtnī iva jyayā

6.3.2

वाचस्पतिर् नि यछतु मय्य् एव तन्वं मम

vācaspatir ni yachatu mayy eva tanvaṃ mama

6.4

उपहूतो वाचस्पतिर् उपहूतो ऽहं वाचस्पत्युः

upahūto vācaspatir upahūto 'haṃ vācaspatyuḥ

6.4.2

सं श्रुतेन राधिषीय मा श्रुतेन वि राधिषि

saṃ śrutena rādhiṣīya mā śrutena vi rādhiṣi

7.1

दिव्यो गन्धर्वो भुवनस्य यस् पतिर् एकायुवो नमसा विक्ष्व् ईड्यः

divyo gandharvo bhuvanasya yas patir ekāyuvo namasā vikṣv īḍyaḥ

7.1.2

तं त्वा यौमि ब्रह्मणा देव दिव्य नमस् ते अस्तु दिवि ते सधस्थम्

taṃ tvā yaumi brahmaṇā deva divya namas te astu divi te sadhastham

7.2

दिव स्पृष्टो यजतः सूर्यत्वग् अवयाता हरसो दैव्यस्य

diva spṛṣṭo yajataḥ sūryatvag avayātā haraso daivyasya

7.2.2

एकायुवो नमस्यः सुशेवो मृडाद् गन्धर्वो भुवनस्य यस् पतिः

ekāyuvo namasyaḥ suśevo mṛḍād gandharvo bhuvanasya yas patiḥ

7.3

अनवद्याभिः सम् उ जग्म आभिर् अप्सराभिर् अपि गन्धर्व आसु

anavadyābhiḥ sam u jagma ābhir apsarābhir api gandharva āsu

7.3.2

समुद्र आसां सदनं म आहुर् यतः सद्य आ च परा च यन्ति

samudra āsāṃ sadanaṃ ma āhur yataḥ sadya ā ca parā ca yanti

7.4

अभ्रिये दिद्युन् नक्षत्रिये या विश्वावसुं गन्धर्वं सचध्वे

abhriye didyun nakṣatriye yā viśvāvasuṃ gandharvaṃ sacadhve

7.4.2

ताभ्यो वो देवीर् नम इत् कृणोमि

tābhyo vo devīr nama it kṛṇomi

7.5

याः क्लन्दास् तमिषीचयो अक्षकामा मनोमुहः

yāḥ klandās tamiṣīcayo akṣakāmā manomuhaḥ

7.5.2

ताभ्यो गन्धर्वपत्नीभ्यो अप्सराभ्यो ऽकरं नमः

tābhyo gandharvapatnībhyo apsarābhyo 'karaṃ namaḥ

8.1

अमुष्माद् अधि पर्वताद् अवत्कम् असि भेषजम्

amuṣmād adhi parvatād avatkam asi bheṣajam

8.1.2

भेषजं सुभेषजं यत् ते कृणोमि भेषजम्

bheṣajaṃ subheṣajaṃ yat te kṛṇomi bheṣajam

8.2

आद् अङ्गा कुविद् अङ्गा शतं यद् भेषजानि ते सहस्रं वा घ यानि ते

ād aṅgā kuvid aṅgā śataṃ yad bheṣajāni te sahasraṃ vā gha yāni te

8.2.2

तेषाम् असि त्वम् उत्तमम् अनास्रावम् अरोगणम्

teṣām asi tvam uttamam anāsrāvam arogaṇam

Atharvaveda (Paippalāda)