15.5

यः सुन्वन्तम् अवति यः पचन्तं यः शंसन्तं यः शशमानम् ऊती

yaḥ sunvantam avati yaḥ pacantaṃ yaḥ śaṃsantaṃ yaḥ śaśamānam ūtī

15.5.2

यस्य ब्रह्म वर्धनं यस्य सोमो यस्येदं राधः स जनास इन्द्रः

yasya brahma vardhanaṃ yasya somo yasyedaṃ rādhaḥ sa janāsa indraḥ

15.6

यः सुन्वते पचते दुध्र आ चिद् वाजं दर्दर्षि स किलासि सत्यः

yaḥ sunvate pacate dudhra ā cid vājaṃ dardarṣi sa kilāsi satyaḥ

15.6.2

वयं त इन्द्र विश्वह प्रियासः सुवीरासो विदथम् आ वदेम

vayaṃ ta indra viśvaha priyāsaḥ suvīrāso vidatham ā vadema

15.7

जातो व्य् अख्यत् पित्रोर् उपस्थे भुवो न वेद जनितुः परस्य

jāto vy akhyat pitror upasthe bhuvo na veda janituḥ parasya

15.7.2

तविष्यमाणो ऽन्व् ओजो अख्यद् व्रता देवानां स जनास इन्द्रः

taviṣyamāṇo 'nv ojo akhyad vratā devānāṃ sa janāsa indraḥ

15.8

यः सोमकामो हर्यश्व आशुर् यस्माद् रेजन्ते भुवनानि विश्वा

yaḥ somakāmo haryaśva āśur yasmād rejante bhuvanāni viśvā

15.8.2

यो जघान शम्बरं यश् च शुष्णं य एकवीरः स जनास इन्द्रः

yo jaghāna śambaraṃ yaś ca śuṣṇaṃ ya ekavīraḥ sa janāsa indraḥ

16.1

शं न इन्द्राग्नी भवताम् अवोभिः शं न इन्द्रावरुणा रातहव्या

śaṃ na indrāgnī bhavatām avobhiḥ śaṃ na indrāvaruṇā rātahavyā

16.1.2

शम् इन्द्रासोमा सुविताय शं योः शं न इन्द्रापूषणा वाजसातौ

śam indrāsomā suvitāya śaṃ yoḥ śaṃ na indrāpūṣaṇā vājasātau

16.2

शं नो भगः शम् उ नः शंसो अस्तु शं नः पुरन्धिः शम् उ सन्तु रायः

śaṃ no bhagaḥ śam u naḥ śaṃso astu śaṃ naḥ purandhiḥ śam u santu rāyaḥ

16.2.2

शं नः सत्यस्य सुयमस्य शंसः शं नो अर्यमा पुरुजातो अस्तु

śaṃ naḥ satyasya suyamasya śaṃsaḥ śaṃ no aryamā purujāto astu

16.3

शं नो धाता शम् उ धर्ता नो अस्तु शं न उरूची भवतु स्वधाभिः

śaṃ no dhātā śam u dhartā no astu śaṃ na urūcī bhavatu svadhābhiḥ

16.3.2

शं रोदसी बृहती शं नो अद्रिः शं नो देवानां सुहवानि सन्तु

śaṃ rodasī bṛhatī śaṃ no adriḥ śaṃ no devānāṃ suhavāni santu

16.4

शं नो अग्निर् ज्योतिरनीको अस्तु शं मित्रावरुणाव् अश्विना शम्

śaṃ no agnir jyotiranīko astu śaṃ mitrāvaruṇāv aśvinā śam

16.4.2

शं नः सुकृतां सुकृतानि सन्तु शं न इषिरो अभि वातु वातः

śaṃ naḥ sukṛtāṃ sukṛtāni santu śaṃ na iṣiro abhi vātu vātaḥ

16.5

शं नो द्यावापृथिवी पूर्वहूतौ शम् अन्तरिक्षं दृशये नो अस्तु

śaṃ no dyāvāpṛthivī pūrvahūtau śam antarikṣaṃ dṛśaye no astu

16.5.2

शं न ओषधीर् वनिनो भवन्तु शं नो रजसः पतिर् अस्तु जिष्णुः

śaṃ na oṣadhīr vanino bhavantu śaṃ no rajasaḥ patir astu jiṣṇuḥ

16.6

शं न इन्द्रो वसुभिर् देवो अस्तु शम् आदित्येभिर् वरुणः सुशंसः

śaṃ na indro vasubhir devo astu śam ādityebhir varuṇaḥ suśaṃsaḥ

16.6.2

शं नो रुद्रो रुद्रेभिर् जलाषः शं नस् त्वष्टा ग्नाभिर् इह शृणोतु

śaṃ no rudro rudrebhir jalāṣaḥ śaṃ nas tvaṣṭā gnābhir iha śṛṇotu

Atharvaveda (Paippalāda)