4.5.2

वृषाणं वृष्ण्यावन्तं प्रजायै त्वा नयामसि

vṛṣāṇaṃ vṛṣṇyāvantaṃ prajāyai tvā nayāmasi

4.6

यद् वेद राजा वरुणो वेद देवो बृहस्पतिः

yad veda rājā varuṇo veda devo bṛhaspatiḥ

4.6.2

इन्द्रो यद् वृत्रहा वेद तद् गर्भकरणं पिब

indro yad vṛtrahā veda tad garbhakaraṇaṃ piba

4.7

वि जिहीष्व बार्हत्सामे गर्भस् ते योनिम् आ शयाम्

vi jihīṣva bārhatsāme garbhas te yonim ā śayām

4.7.2

ददन् ते पुत्रं देवाः सोमपा उभयाविनम्

dadan te putraṃ devāḥ somapā ubhayāvinam

4.8

सोमस्य त्वर्त्वियेनोपैमि गर्भकृत्वने

somasya tvartviyenopaimi garbhakṛtvane

5.1

जायस्वाग्ने अश्वत्थाद् अस्मै क्षत्रायौजसे

jāyasvāgne aśvatthād asmai kṣatrāyaujase

5.1.2

उग्र आपतिकाद् अधि यो वृक्षाṁ अधि रोहति

ugra āpatikād adhi yo vṛkṣāṁ adhi rohati

5.2

विबाधं चित् सहमानं त्वाम् अग्ने जनयामसि

vibādhaṃ cit sahamānaṃ tvām agne janayāmasi

5.2.2

जाताञ् जनिष्यमाणान् सपत्नान् प्र णुदस्व मे

jātāñ janiṣyamāṇān sapatnān pra ṇudasva me

5.3

अश्वत्थस्यारोहस्य वृक्षस्यारणयः कृताः

aśvatthasyārohasya vṛkṣasyāraṇayaḥ kṛtāḥ

5.3.2

ततो जाताय ते ऽजनि वीडुजम्भाग्निर् अग्नये

tato jātāya te 'jani vīḍujambhāgnir agnaye

5.4

तं जातं जातवेदसम् आ दधाम्य् अमर्त्यम्

taṃ jātaṃ jātavedasam ā dadhāmy amartyam

5.4.2

पावकम् अग्निम् ऊतये शुचिमन्तं विषासहिम्

pāvakam agnim ūtaye śucimantaṃ viṣāsahim

5.6

वृषभं त्वा सजातानां सपत्नानां विषासहिम्

vṛṣabhaṃ tvā sajātānāṃ sapatnānāṃ viṣāsahim

5.6.2

हन्तारं शत्रूणां कृण्मो विराजं गोपतिं गवाम्

hantāraṃ śatrūṇāṃ kṛṇmo virājaṃ gopatiṃ gavām

5.7.2

व्याघ्रं सिंहं त्वा कृण्मो दमितारं पृतन्यताम्

vyāghraṃ siṃhaṃ tvā kṛṇmo damitāraṃ pṛtanyatām

5.8

इन्द्र इव दस्यून् अधरान् कृणुष्वोग्र इव वातो विशृणन् सपत्नान्

indra iva dasyūn adharān kṛṇuṣvogra iva vāto viśṛṇan sapatnān

5.8.2

ते शुष्यन्त्व् अप दावाद् इवाग्नेः पर्य् अवीवरथा एनान्

te śuṣyantv apa dāvād ivāgneḥ pary avīvarathā enān

5.9

सं वृश्चैनांस् ते शुष्यन्तु वृश्चैनान् मोपजां शिषः

saṃ vṛścaināṃs te śuṣyantu vṛścainān mopajāṃ śiṣaḥ

Atharvaveda (Paippalāda)