3.2.5

ॐ

oṃ

3.2.6

ॐ पूर्वाः व्याहृतयः

oṃ pūrvāḥ vyāhṛtayaḥ

3.2.7

सावित्रीम् अन्वाह पच्छस् अर्धर्चशः सर्वाम् इति तृतीयम्

sāvitrīm anvāha pacchas ardharcaśaḥ sarvām iti tṛtīyam

3.3.1

अथ स्वाध्यायम् अधीयीतर्चो यजूंषि सामान्य् अथर्वाङ्गिरसो ब्राह्मणानि कल्पान् गाथा नाराशंसीर् इतिहासपुराणानीति

atha svādhyāyam adhīyītarco yajūṃṣi sāmāny atharvāṅgiraso brāhmaṇāni kalpān gāthā nārāśaṃsīr itihāsapurāṇānīti

3.3.2

यद् ऋचो ऽधीते पयआहुतिभिर् एव तद् देवतास् तर्पयति यद् यजूंषि घृताहुतिभिर् यत् सामानि मध्वाहुतिभिर् यद् अथर्वाङ्गिरसः सोमाहुतिभिर् यद् ब्राह्मणानि कल्पान् गाथा नाराशंसीर् इतिहासपुराणानीत्य् अमृताहुतिभिः

yad ṛco 'dhīte payaāhutibhir eva tad devatās tarpayati yad yajūṃṣi ghṛtāhutibhir yat sāmāni madhvāhutibhir yad atharvāṅgirasaḥ somāhutibhir yad brāhmaṇāni kalpān gāthā nārāśaṃsīr itihāsapurāṇānīty amṛtāhutibhiḥ

3.3.3

यद् ऋचो ऽधीते पयसः कुल्या अस्य पितॄन्त् स्वधा उपक्षरन्ति यद् यजूंषि घृतस्य कुल्या यत् सामानि मध्वः कुल्या यद् अथर्वाङ्गिरसः सोमस्य कुल्या यद् ब्राह्मणानि कल्पान् गाथा नाराशंसीर् इतिहासपुराणानीत्यमृतस्य कुल्याः

yad ṛco 'dhīte payasaḥ kulyā asya pitṝnt svadhā upakṣaranti yad yajūṃṣi ghṛtasya kulyā yat sāmāni madhvaḥ kulyā yad atharvāṅgirasaḥ somasya kulyā yad brāhmaṇāni kalpān gāthā nārāśaṃsīr itihāsapurāṇānītyamṛtasya kulyāḥ

3.3.4

स यावन् मन्येत तावद् अधीत्यैतया परिदधाति नमो ब्रह्मणे नमो अस्त्व् अग्नये नमः पृथिव्यै नम ओषधीभ्यः

sa yāvan manyeta tāvad adhītyaitayā paridadhāti namo brahmaṇe namo astv agnaye namaḥ pṛthivyai nama oṣadhībhyaḥ

3.3.4.2

नमो वाचे नमो वाचस्पतये नमो विष्णवे महते करोमीति

namo vāce namo vācaspataye namo viṣṇave mahate karomīti

3.4.1

देवतास् तर्पयति प्रजापतिर् ब्रह्मा वेदा देवा ऋषयः सर्वाणि छन्दांस्य् ॐकारो वषट्कारो व्याहृतयः सावित्री यज्ञा द्यावापृथिवी अन्तरिक्षम् अहोरात्राणि संख्याः सिद्धाः समुद्रा नद्यो गिरयः क्षेत्रौषधिवनस्पतिगन्धर्वाप्सरसो नागा वयांसि गावः साध्या विप्रा यक्षा रक्षांसि भूतान्य् एवमन्तानि

devatās tarpayati prajāpatir brahmā vedā devā ṛṣayaḥ sarvāṇi chandāṃsy oṃkāro vaṣaṭkāro vyāhṛtayaḥ sāvitrī yajñā dyāvāpṛthivī antarikṣam ahorātrāṇi saṃkhyāḥ siddhāḥ samudrā nadyo girayaḥ kṣetrauṣadhivanaspatigandharvāpsaraso nāgā vayāṃsi gāvaḥ sādhyā viprā yakṣā rakṣāṃsi bhūtāny evamantāni

3.4.2

अथर्षयः शतर्चिनो माध्यमा गृत्समदो विश्वामित्रो वामदेवो ऽत्रिर् भारद्वाजो वसिष्ठः प्रगाथाः पावमान्यः क्षुद्रसूक्ता महासूक्ता इति

atharṣayaḥ śatarcino mādhyamā gṛtsamado viśvāmitro vāmadevo 'trir bhāradvājo vasiṣṭhaḥ pragāthāḥ pāvamānyaḥ kṣudrasūktā mahāsūktā iti

3.4.3

प्राचीनावीती

prācīnāvītī

3.4.4

सुमन्तुजैमिनिवैशम्पायनपैलसूत्रभाष्यभारतमहाभारतधर्माचार्या जानन्ति बाहविगार्ग्यगौतमशाकल्यबाभ्रव्यमाण्डव्यमाण्डूकेया गर्गी वाचक्नवी वडवा प्रातीथेयी सुलभा मैत्रेयी कहोलं कौषीतकं महाकौषीतकं पैङ्ग्यं महापैङ्ग्यं सुयज्ञं शाङ्खायनम् ऐतरेयं महैतरेयं शाकलं बाष्कलं सुजातवक्त्रम् औदवाहिं महौदवाहिं सौजामिं शौनकम् आश्वलायनं ये चान्ये आचार्यास् ते सर्वे तृप्यन्त्व् इति

sumantujaiminivaiśampāyanapailasūtrabhāṣyabhāratamahābhāratadharmācāryā jānanti bāhavigārgyagautamaśākalyabābhravyamāṇḍavyamāṇḍūkeyā gargī vācaknavī vaḍavā prātītheyī sulabhā maitreyī kaholaṃ kauṣītakaṃ mahākauṣītakaṃ paiṅgyaṃ mahāpaiṅgyaṃ suyajñaṃ śāṅkhāyanam aitareyaṃ mahaitareyaṃ śākalaṃ bāṣkalaṃ sujātavaktram audavāhiṃ mahaudavāhiṃ saujāmiṃ śaunakam āśvalāyanaṃ ye cānye ācāryās te sarve tṛpyantv iti

3.4.5

प्रतिपुरुषं पितॄंस् तर्पयित्वा गृहान् एत्य यद् ददाति सा दक्षिणा

pratipuruṣaṃ pitṝṃs tarpayitvā gṛhān etya yad dadāti sā dakṣiṇā

3.4.6

अथापि विज्ञायते स यदि तिष्ठन् व्रजन्न् आसीनः शयानो वा यं यं क्रतुम् अधीते तेन तेन हास्य क्रतुनेष्टं भवति

athāpi vijñāyate sa yadi tiṣṭhan vrajann āsīnaḥ śayāno vā yaṃ yaṃ kratum adhīte tena tena hāsya kratuneṣṭaṃ bhavati

3.4.7

विज्ञायते तस्य द्वावनध्यायौ यद् आत्मा अशुचिर् यद् देशः

vijñāyate tasya dvāvanadhyāyau yad ātmā aśucir yad deśaḥ

3.5.1

अथातो ऽध्यायोपाकरणम्

athāto 'dhyāyopākaraṇam

3.5.2

ओषधीनां प्रादुर्भावे श्रवणेन श्रावणस्य

oṣadhīnāṃ prādurbhāve śravaṇena śrāvaṇasya

3.5.3

पञ्चम्यां हस्तेन वा

pañcamyāṃ hastena vā

3.5.4

आज्यभागौ हुत्वाज्याहुतीर् जुहुयात् सावित्र्यै ब्रह्मणे श्रद्धायै मेधायै प्रज्ञायै धारणायै सदसस्पतये ऽनुमतये छन्दोभ्य ऋषिभ्यश् चेति

ājyabhāgau hutvājyāhutīr juhuyāt sāvitryai brahmaṇe śraddhāyai medhāyai prajñāyai dhāraṇāyai sadasaspataye 'numataye chandobhya ṛṣibhyaś ceti

3.5.5

अथ दधिसक्तून् जुहोति

atha dadhisaktūn juhoti

Āśvalāyanagṛhyasūtra