9.7.42

सर्वशून्यतापारमितेयं भगवन् अनन्तापर्यन्ततामुपादाय

sarvaśūnyatāpāramiteyaṃ bhagavan anantāparyantatāmupādāya

9.7.43

स्मृत्युपस्थानादिबोधिपक्षधर्मपारमितेयं भगवंस्तेषामनुपलब्धितामुपादाय

smṛtyupasthānādibodhipakṣadharmapāramiteyaṃ bhagavaṃsteṣāmanupalabdhitāmupādāya

9.7.44

शून्यतानिमित्ताप्रणिहितपारमितेयं भगवन् त्रिविमोक्षमुखानुपलब्धितामुपादाय

śūnyatānimittāpraṇihitapāramiteyaṃ bhagavan trivimokṣamukhānupalabdhitāmupādāya

9.7.45

अष्टविमोक्षपारमितेयं भगवंस्तेषामनुपलब्धितामुपादाय

aṣṭavimokṣapāramiteyaṃ bhagavaṃsteṣāmanupalabdhitāmupādāya

9.7.46

नवानुपूर्वविहारपारमितेयं भगवन् प्रथमध्यानादीनाम् अनुपलब्धिताम् उपादाय

navānupūrvavihārapāramiteyaṃ bhagavan prathamadhyānādīnām anupalabdhitām upādāya

9.7.47

चतुःसत्यपारमितेयं भगवन् दुःखादीनामनुपलब्धितामुपादाय

catuḥsatyapāramiteyaṃ bhagavan duḥkhādīnāmanupalabdhitāmupādāya

9.7.48

दशपारमितेयं भगवन् दानादीनाम् अनुपलब्धिताम् उपादाय

daśapāramiteyaṃ bhagavan dānādīnām anupalabdhitām upādāya

9.7.49

बलपारमितेयं भगवन् अनवमृद्यताम् उपादाय

balapāramiteyaṃ bhagavan anavamṛdyatām upādāya

9.7.50

वैशारद्यपारमितेयं भगवन् अत्यन्तानवलीनताम् उपादाय

vaiśāradyapāramiteyaṃ bhagavan atyantānavalīnatām upādāya

9.7.51

प्रतिसंवित्पारमितेयं भगवन् सर्वज्ञतासङ्गाप्रतिघातिताम् उपादाय

pratisaṃvitpāramiteyaṃ bhagavan sarvajñatāsaṅgāpratighātitām upādāya

9.7.52

सर्वबुद्धधर्मावेणिकपारमितेयं भगवन् गणनासमतिक्रमतामुपादाय

sarvabuddhadharmāveṇikapāramiteyaṃ bhagavan gaṇanāsamatikramatāmupādāya

9.7.53

तथागततथतापारमितेयं भगवन् सर्वधर्मावितथतामुपादाय

tathāgatatathatāpāramiteyaṃ bhagavan sarvadharmāvitathatāmupādāya

9.7.54

स्वयंभूपारमितेयं भगवन् सर्वधर्मास्वभावताम् उपादाय

svayaṃbhūpāramiteyaṃ bhagavan sarvadharmāsvabhāvatām upādāya

9.7.55

सर्वज्ञज्ञानपारमितेयं भगवन् यदुत प्रज्ञापारमिता सर्वधर्मस्वभावसर्वाकारपरिज्ञानताम् उपादायेति

sarvajñajñānapāramiteyaṃ bhagavan yaduta prajñāpāramitā sarvadharmasvabhāvasarvākāraparijñānatām upādāyeti

10.1

अथ खलु शक्रस्य देवानामिन्द्रस्यैतदभूत् पूर्वजिनकृताधिकारास्ते कुलपुत्राः कुलदुहितरश्च भविष्यन्ति बहुबुद्धावरोपितकुशलमूलाः कल्याणमित्रपरिगृहीताश्च भविष्यन्ति येषामियं प्रज्ञापारमिता श्रोत्रावभासमप्यागमिष्यति

atha khalu śakrasya devānāmindrasyaitadabhūt pūrvajinakṛtādhikārāste kulaputrāḥ kuladuhitaraśca bhaviṣyanti bahubuddhāvaropitakuśalamūlāḥ kalyāṇamitraparigṛhītāśca bhaviṣyanti yeṣāmiyaṃ prajñāpāramitā śrotrāvabhāsamapyāgamiṣyati

10.1.2

कः पुनर्वादो य एनामेवं गम्भीरां प्रज्ञापारमितामुद्ग्रहीष्यन्ति धारयिष्यन्ति वाचयिष्यन्ति पर्यवाप्स्यन्ति प्रवर्तयिष्यन्ति देशयिष्यन्त्युपदेक्ष्यन्त्युद्देक्ष्यन्ति स्वाध्यास्यन्ति

kaḥ punarvādo ya enāmevaṃ gambhīrāṃ prajñāpāramitāmudgrahīṣyanti dhārayiṣyanti vācayiṣyanti paryavāpsyanti pravartayiṣyanti deśayiṣyantyupadekṣyantyuddekṣyanti svādhyāsyanti

10.1.3

उद्गृह्य धारयित्वा वाचयित्वा पर्यवाप्य प्रवर्त्य देशयित्वोपदिश्योद्दिश्य स्वाध्याय्य तथत्वाय शिक्षिष्यन्ते तथत्वाय प्रतिपत्स्यन्ते तथत्वाय योगमापत्स्यन्ते

udgṛhya dhārayitvā vācayitvā paryavāpya pravartya deśayitvopadiśyoddiśya svādhyāyya tathatvāya śikṣiṣyante tathatvāya pratipatsyante tathatvāya yogamāpatsyante

10.1.4

न ते अवरमात्रकेण कुशलमूलेन समन्वागता भविष्यन्ति

na te avaramātrakeṇa kuśalamūlena samanvāgatā bhaviṣyanti

10.1.5

बहुबुद्धपर्युपासितास्ते कुलपुत्राः कुलदुहितरश्च भविष्यन्ति

bahubuddhaparyupāsitāste kulaputrāḥ kuladuhitaraśca bhaviṣyanti

10.1.6

परिपृष्टाः परिप्रश्नीकृताश्च ते बुद्धा भगवन्तो भविष्यन्ति कुलपुत्रैः कुलदुहितृभिश्चैनामेव प्रज्ञापारमिताम्

paripṛṣṭāḥ paripraśnīkṛtāśca te buddhā bhagavanto bhaviṣyanti kulaputraiḥ kuladuhitṛbhiścaināmeva prajñāpāramitām

Aṣṭasāhasrikā