9.3.25

सचेदेवम् अपि सुभूते बोधिसत्त्वो महासत्त्वो न संजानीते चरति प्रज्ञापारमितायाम्

sacedevam api subhūte bodhisattvo mahāsattvo na saṃjānīte carati prajñāpāramitāyām

9.3.26

सा खलु पुनरियं सुभूते प्रज्ञापारमिता न कस्यचिद्धर्मस्यावेशिका वा निवेशिका वा संदर्शिका वा निदर्शिका वा आवाहिका वा निर्वाहिका वा

sā khalu punariyaṃ subhūte prajñāpāramitā na kasyaciddharmasyāveśikā vā niveśikā vā saṃdarśikā vā nidarśikā vā āvāhikā vā nirvāhikā vā

9.4

अथ खलु संबहुलानि देवपुत्रसहस्राणि अन्तरीक्षे किलकिलाप्रक्ष्वेडितेन चैलविक्षेपानकार्षुः द्वितीयं बतेदं धर्मचक्रप्रवर्तनं जम्बूद्वीपे पश्याम इति चावोचन्

atha khalu saṃbahulāni devaputrasahasrāṇi antarīkṣe kilakilāprakṣveḍitena cailavikṣepānakārṣuḥ dvitīyaṃ batedaṃ dharmacakrapravartanaṃ jambūdvīpe paśyāma iti cāvocan

9.4.2

अथ खलु भगवानायुष्मन्तं सुभूतिं स्थविरमेतदवोचत् नेदं सुभूते द्वितीयं धर्मचक्रप्रवर्तनं नापि कस्यचिद्धर्मस्य प्रवर्तनं वा निवर्तनं वा

atha khalu bhagavānāyuṣmantaṃ subhūtiṃ sthavirametadavocat nedaṃ subhūte dvitīyaṃ dharmacakrapravartanaṃ nāpi kasyaciddharmasya pravartanaṃ vā nivartanaṃ vā

9.4.3

एवमियं सुभूते बोधिसत्त्वस्य महासत्त्वस्य प्रज्ञापारमिता

evamiyaṃ subhūte bodhisattvasya mahāsattvasya prajñāpāramitā

9.5

एवमुक्ते आयुष्मान् सुभूतिर्भगवन्तमेतदवोचत् महापारमितेयं भगवंस्तस्य बोधिसत्त्वस्य महासत्त्वस्य यस्यासङ्गता सर्वधर्मेषु यो ऽसावनुत्तरां सम्यक्संबोधिमभिसंबोद्धुकामो न च कंचिद्धर्ममभिसंबुध्यते धर्मचक्रं च प्रवर्तयिष्यति न च कंचिद्धर्मं संदर्शयिष्यति

evamukte āyuṣmān subhūtirbhagavantametadavocat mahāpāramiteyaṃ bhagavaṃstasya bodhisattvasya mahāsattvasya yasyāsaṅgatā sarvadharmeṣu yo 'sāvanuttarāṃ samyaksaṃbodhimabhisaṃboddhukāmo na ca kaṃciddharmamabhisaṃbudhyate dharmacakraṃ ca pravartayiṣyati na ca kaṃciddharmaṃ saṃdarśayiṣyati

9.5.2

तत्कस्य हेतोः न हि कश्चिद्धर्मो य उपलभ्यते यो वा धर्मः सूच्यते

tatkasya hetoḥ na hi kaściddharmo ya upalabhyate yo vā dharmaḥ sūcyate

9.5.3

नापि कश्चिद्धर्मं प्रवर्तयिष्यति

nāpi kaściddharmaṃ pravartayiṣyati

9.5.4

तत्कस्य हेतोः अत्यन्तानभिनिर्वृत्ता हि भगवन् सर्वधर्माः

tatkasya hetoḥ atyantānabhinirvṛttā hi bhagavan sarvadharmāḥ

9.5.5

नापि कंचिद्धर्मं निवर्तयिष्यति

nāpi kaṃciddharmaṃ nivartayiṣyati

9.5.6

तत्कस्य हेतोः आद्यनभिनिर्वृत्ता हि भगवन् सर्वधर्माः प्रकृतिविविक्तत्वात्सर्वधर्माणाम्

tatkasya hetoḥ ādyanabhinirvṛttā hi bhagavan sarvadharmāḥ prakṛtiviviktatvātsarvadharmāṇām

9.6

एवमुक्ते भगवानायुष्मन्तं सुभूतिमेतदवोचत् एवमेतत्सुभूते एवम् एतत्

evamukte bhagavānāyuṣmantaṃ subhūtimetadavocat evametatsubhūte evam etat

9.6.2

न हि सुभूते शून्यता प्रवर्तते वा निवर्तते वा

na hi subhūte śūnyatā pravartate vā nivartate vā

9.6.3

नापि सुभूते अनिमित्तं प्रवर्तते वा निवर्तते वा

nāpi subhūte animittaṃ pravartate vā nivartate vā

9.6.4

नापि सुभूते अप्रणिहितं प्रवर्तते वा निवर्तते वा

nāpi subhūte apraṇihitaṃ pravartate vā nivartate vā

9.6.5

या सुभूते एवं देशना इयं सा सर्वधर्माणां देशना

yā subhūte evaṃ deśanā iyaṃ sā sarvadharmāṇāṃ deśanā

9.6.6

नैव च केनचिद्देशिता नापि केनचिच्छ्रुता नापि केनचित्प्रतीच्छिता नापि केनचित्साक्षात्कृता नापि केनचित्साक्षात्क्रियते नापि केनचित् साक्षात्करिष्यते

naiva ca kenaciddeśitā nāpi kenacicchrutā nāpi kenacitpratīcchitā nāpi kenacitsākṣātkṛtā nāpi kenacitsākṣātkriyate nāpi kenacit sākṣātkariṣyate

9.6.7

नाप्यनया धर्मदेशनया कश्चित्परिनिर्वृतो नापि परिनिर्वास्यति नापि परिनिर्वाति

nāpyanayā dharmadeśanayā kaścitparinirvṛto nāpi parinirvāsyati nāpi parinirvāti

9.6.8

नाप्यनया धर्मदेशनया कश्चिद्दक्षिणीयः कृतः

nāpyanayā dharmadeśanayā kaściddakṣiṇīyaḥ kṛtaḥ

9.7

एवमुक्ते आयुष्मान् सुभूतिर्भगवन्तमेतदवोचत् असत्पारमितेयं भगवन् आकाशसत्तामुपादाय

evamukte āyuṣmān subhūtirbhagavantametadavocat asatpāramiteyaṃ bhagavan ākāśasattāmupādāya

Aṣṭasāhasrikā