1.20

अथ खल्वायुष्मान् सुभूतिर्भगवन्तमेतदवोचत् यो भगवन् एवं परिपृच्छेत् किमयं मायापुरुषाः सर्वज्ञतायां शिक्षिष्यते सर्वज्ञताया आसन्नीभविष्यति सर्वज्ञतायां निर्यास्यतीति तस्य भगवन् एवं परिपृच्छतः कथं निर्देष्टव्यं स्यात् एवमुक्ते भगवानायुष्मन्तं सुभूतिमेतदवोचत् तेन हि सुभूते त्वामेवात्र प्रतिप्रक्ष्यामि

atha khalvāyuṣmān subhūtirbhagavantametadavocat yo bhagavan evaṃ paripṛcchet kimayaṃ māyāpuruṣāḥ sarvajñatāyāṃ śikṣiṣyate sarvajñatāyā āsannībhaviṣyati sarvajñatāyāṃ niryāsyatīti tasya bhagavan evaṃ paripṛcchataḥ kathaṃ nirdeṣṭavyaṃ syāt evamukte bhagavānāyuṣmantaṃ subhūtimetadavocat tena hi subhūte tvāmevātra pratiprakṣyāmi

1.20.2

यथा ते क्षमते तथा व्याकुर्याः

yathā te kṣamate tathā vyākuryāḥ

1.20.3

साधु भगवन्नित्यायुष्मान् सुभूतिर्भगवतः प्रत्यश्रौषीत्

sādhu bhagavannityāyuṣmān subhūtirbhagavataḥ pratyaśrauṣīt

1.20.4

भगवानेतदवोचत् तत्किं मन्यसे सुभूते अन्या सा माया अन्यत्तद्रूपम् अन्या सा माया अन्या सा वेदना

bhagavānetadavocat tatkiṃ manyase subhūte anyā sā māyā anyattadrūpam anyā sā māyā anyā sā vedanā

1.20.5

अन्या सा संज्ञा अन्ये ते संस्काराः

anyā sā saṃjñā anye te saṃskārāḥ

1.20.6

अन्या सा माया अन्यत्तद्विज्ञानम् सुभूतिराह न ह्येतद्भगवन्

anyā sā māyā anyattadvijñānam subhūtirāha na hyetadbhagavan

1.20.7

न हि भगवन् अन्या सा माया अन्यत्तद्रूपम्

na hi bhagavan anyā sā māyā anyattadrūpam

1.20.8

रूपमेव भगवन् माया मायैव रूपम्

rūpameva bhagavan māyā māyaiva rūpam

1.20.9

न हि भगवन् अन्या सा माया अन्या सा वेदना अन्या सा संज्ञा अन्ये ते संस्काराः

na hi bhagavan anyā sā māyā anyā sā vedanā anyā sā saṃjñā anye te saṃskārāḥ

1.20.10

वेदना संज्ञा संस्कारा एव भगवन् माया मायैव वेदनासंज्ञासंस्काराः

vedanā saṃjñā saṃskārā eva bhagavan māyā māyaiva vedanāsaṃjñāsaṃskārāḥ

1.20.11

न भगवन् अन्या सा माया अन्यत्तद्विज्ञानम्

na bhagavan anyā sā māyā anyattadvijñānam

1.20.12

विज्ञानमेव भगवन् माया मायैव विज्ञानम्

vijñānameva bhagavan māyā māyaiva vijñānam

1.21

भगवानाह तत्किं मन्यसे सुभूते अत्रैषां संज्ञा समज्ञा प्रज्ञप्तिर्व्यवहारः पञ्चसूपादानस्कन्धेषु यदुत बोधिसत्त्व इति एवमुक्ते आयुष्मान् सुभूतिर्भगवन्तमेतदवोचत् एवमेतद्भगवन् एवमेतत्सुगत

bhagavānāha tatkiṃ manyase subhūte atraiṣāṃ saṃjñā samajñā prajñaptirvyavahāraḥ pañcasūpādānaskandheṣu yaduta bodhisattva iti evamukte āyuṣmān subhūtirbhagavantametadavocat evametadbhagavan evametatsugata

1.21.2

तेन हि भगवन् बोधिसत्त्वेन महासत्त्वेन प्रज्ञापारमितायां शिक्षमाणेन मायापुरुषेणेव शिक्षितव्यं भवत्यनुत्तरायां सम्यक्संबोधौ

tena hi bhagavan bodhisattvena mahāsattvena prajñāpāramitāyāṃ śikṣamāṇena māyāpuruṣeṇeva śikṣitavyaṃ bhavatyanuttarāyāṃ samyaksaṃbodhau

1.21.3

तत्कस्य हेतोः स एव हि भगवन् मायापुरुषो धारयितव्यो यदुत पञ्चोपादानस्कन्धाः

tatkasya hetoḥ sa eva hi bhagavan māyāpuruṣo dhārayitavyo yaduta pañcopādānaskandhāḥ

1.21.4

तत्कस्य हेतोः तथा हि भगवन् मायोपमं रूपमुक्तं भगवता

tatkasya hetoḥ tathā hi bhagavan māyopamaṃ rūpamuktaṃ bhagavatā

1.21.5

यच्च रूपं तत्षडिन्द्रियं ते पञ्च स्कन्धाः

yacca rūpaṃ tatṣaḍindriyaṃ te pañca skandhāḥ

1.21.6

तथा हि भगवन् मायोपमा वेदनासंज्ञासंस्कारा उक्ताः

tathā hi bhagavan māyopamā vedanāsaṃjñāsaṃskārā uktāḥ

1.21.7

तथा हि भगवन् मायोपमं विज्ञानमुक्तं भगवता

tathā hi bhagavan māyopamaṃ vijñānamuktaṃ bhagavatā

1.21.8

यच्च विज्ञानं तत्षडिन्द्रियं ते पञ्च स्कन्धाः

yacca vijñānaṃ tatṣaḍindriyaṃ te pañca skandhāḥ

Aṣṭasāhasrikā