8.18.5

अथ विरहितो भविष्यति प्रज्ञापारमितया लप्स्यन्ते ऽस्य अवतारप्रेक्षिणो ऽवतारगवेषिणो मनुष्याश् च अमनुष्याश् च अवतारम्

atha virahito bhaviṣyati prajñāpāramitayā lapsyante 'sya avatāraprekṣiṇo 'vatāragaveṣiṇo manuṣyāś ca amanuṣyāś ca avatāram

8.18.6

अपि च कौशिक आकाशस्य स रक्षावरणगुप्तिं संविधातव्यां मन्येत यो बोधिसत्त्वस्य महासत्त्वस्य रक्षावरणगुप्तिं संविधातव्यां मन्येत प्रज्ञापारमितायां चरतः

api ca kauśika ākāśasya sa rakṣāvaraṇaguptiṃ saṃvidhātavyāṃ manyeta yo bodhisattvasya mahāsattvasya rakṣāvaraṇaguptiṃ saṃvidhātavyāṃ manyeta prajñāpāramitāyāṃ carataḥ

8.18.7

तत्किं मन्यसे कौशिक प्रतिबलस्त्वं प्रतिश्रुत्काया रक्षावरणगुप्तिं संविधातुम् शक्र आह न ह्येतदार्य सुभूते

tatkiṃ manyase kauśika pratibalastvaṃ pratiśrutkāyā rakṣāvaraṇaguptiṃ saṃvidhātum śakra āha na hyetadārya subhūte

8.18.8

सुभूतिराह एवमेव कौशिक बोधिसत्त्वो महासत्त्वः प्रज्ञापारमितायां चरन् विहरन् प्रतिश्रुत्कोपमाः सर्वधर्मा इति परिजानाति

subhūtirāha evameva kauśika bodhisattvo mahāsattvaḥ prajñāpāramitāyāṃ caran viharan pratiśrutkopamāḥ sarvadharmā iti parijānāti

8.18.9

स च तान्न मन्यते न समनुपश्यति न जानाति न संजानीते

sa ca tānna manyate na samanupaśyati na jānāti na saṃjānīte

8.18.10

ते च धर्मा न विद्यन्ते न संदृश्यन्ते न संविद्यन्ते नोपलभ्यन्ते इति विहरति

te ca dharmā na vidyante na saṃdṛśyante na saṃvidyante nopalabhyante iti viharati

8.18.11

सचेदेवं विहरति चरति प्रज्ञापारमितायाम्

sacedevaṃ viharati carati prajñāpāramitāyām

8.19

अथ खलु बुद्धानुभावेन ये त्रिसाहस्रमहासाहस्रे लोकधातौ चत्वारो महाराजानः सर्वे च शक्रा देवेन्द्राः सर्वे च महाब्रह्माणः सहापतिश् च महाब्रह्मा ते सर्वे येन भगवांस्तेनोपसंक्रान्ताः

atha khalu buddhānubhāvena ye trisāhasramahāsāhasre lokadhātau catvāro mahārājānaḥ sarve ca śakrā devendrāḥ sarve ca mahābrahmāṇaḥ sahāpatiś ca mahābrahmā te sarve yena bhagavāṃstenopasaṃkrāntāḥ

8.19.2

उपसंक्रम्य भगवतः पादौ शिरसाभिवन्द्य भगवन्तं त्रिः प्रदक्षिणीकृत्य एकान्ते ऽतिष्ठन्

upasaṃkramya bhagavataḥ pādau śirasābhivandya bhagavantaṃ triḥ pradakṣiṇīkṛtya ekānte 'tiṣṭhan

8.19.3

एकान्ते स्थिताश् च ते महाराजानः सर्वे च शक्रा देवेन्द्राः सर्वे च ब्रह्मकायिका देवा महाब्रह्माणश्च सहापतिश् च महाब्रह्मा बुद्धानुभावेन बुद्धाधिष्ठानेन बुद्धसहस्रं समन्वाहरन्ति स्म

ekānte sthitāś ca te mahārājānaḥ sarve ca śakrā devendrāḥ sarve ca brahmakāyikā devā mahābrahmāṇaśca sahāpatiś ca mahābrahmā buddhānubhāvena buddhādhiṣṭhānena buddhasahasraṃ samanvāharanti sma

8.19.4

एभिरेव नामभिरेभिरेव पदैरेभिरेवाक्षरैः सुभूतिनामधेयैरेव भिक्षुभिरियमेव प्रज्ञापारमितोपदिष्टा अयमेव प्रज्ञापारमितापरिवर्तः

ebhireva nāmabhirebhireva padairebhirevākṣaraiḥ subhūtināmadheyaireva bhikṣubhiriyameva prajñāpāramitopadiṣṭā ayameva prajñāpāramitāparivartaḥ

8.19.5

तत्रापि शक्रा एव देवेन्द्राः परिपृच्छन्ति स्म परिप्रश्नयन्ति स्म अस्मिन् एव पृथिवीप्रदेशे इयमेव प्रज्ञापारमिता भाषिता

tatrāpi śakrā eva devendrāḥ paripṛcchanti sma paripraśnayanti sma asmin eva pṛthivīpradeśe iyameva prajñāpāramitā bhāṣitā

8.19.6

मैत्रेयो ऽपि बोधिसत्त्वो महासत्त्वो ऽनुत्तरां सम्यक्संबोधिमभिसंबुध्य अस्मिन् एव पृथिवीप्रदेशे एनामेव प्रज्ञापारमितां भाषिष्यते इति

maitreyo 'pi bodhisattvo mahāsattvo 'nuttarāṃ samyaksaṃbodhimabhisaṃbudhya asmin eva pṛthivīpradeśe enāmeva prajñāpāramitāṃ bhāṣiṣyate iti

9.1

अथ खल्वायुष्मान् सुभूतिर्भगवन्तमेतदवोचत् प्रज्ञापारमितेति भगवन् नामधेयमात्रम् एतत्

atha khalvāyuṣmān subhūtirbhagavantametadavocat prajñāpāramiteti bhagavan nāmadheyamātram etat

9.1.2

तच्च नाम इदमिति नोपलभ्यते

tacca nāma idamiti nopalabhyate

9.1.3

वाग्वस्त्वेव नामेत्युच्यते

vāgvastveva nāmetyucyate

9.1.4

सापि प्रज्ञापारमिता न विद्यते नोपलभ्यते

sāpi prajñāpāramitā na vidyate nopalabhyate

9.1.5

यथैव नाम तथैव प्रज्ञापारमिता

yathaiva nāma tathaiva prajñāpāramitā

9.1.6

यथा प्रज्ञापारमिता तथा नाम

yathā prajñāpāramitā tathā nāma

9.1.7

धर्मद्वयमेतन्न विद्यते नोपलभ्यते

dharmadvayametanna vidyate nopalabhyate

Aṣṭasāhasrikā