8.14.9

तद्यथापि नाम सुभूते मायापुरुषो भाष्यमाणे ऽपि वर्णे नानुनीयते न संक्लिश्यते अभाष्यमाणे ऽपि वर्णे न प्रतिहन्यते न संक्लिश्यते

tadyathāpi nāma subhūte māyāpuruṣo bhāṣyamāṇe 'pi varṇe nānunīyate na saṃkliśyate abhāṣyamāṇe 'pi varṇe na pratihanyate na saṃkliśyate

8.14.10

एवमेव सुभूते या धर्माणां धर्मता सा देश्यमानापि तावत्येव अदेश्यमानापि तावत्येव

evameva subhūte yā dharmāṇāṃ dharmatā sā deśyamānāpi tāvatyeva adeśyamānāpi tāvatyeva

8.15

स्थविरः सुभूतिराह दुष्करकारको भगवन् बोधिसत्त्वो महासत्त्वो यो गम्भीरायां प्रज्ञापारमितायां चरन् प्रज्ञापारमितां भावयन् न संसीदति नोत्प्लवते

sthaviraḥ subhūtirāha duṣkarakārako bhagavan bodhisattvo mahāsattvo yo gambhīrāyāṃ prajñāpāramitāyāṃ caran prajñāpāramitāṃ bhāvayan na saṃsīdati notplavate

8.15.2

अत्र च नाम योगमापद्यते न च प्रत्युदावर्तते

atra ca nāma yogamāpadyate na ca pratyudāvartate

8.15.3

आकाशभावनैषा भगवन् यदुत प्रज्ञापारमिताभावना

ākāśabhāvanaiṣā bhagavan yaduta prajñāpāramitābhāvanā

8.15.4

नमस्कर्तव्यास्ते भगवन् बोधिसत्त्वा महासत्त्वाः यैरयं संनाहः संनद्धः

namaskartavyāste bhagavan bodhisattvā mahāsattvāḥ yairayaṃ saṃnāhaḥ saṃnaddhaḥ

8.15.5

तत्कस्य हेतोः आकाशेन सार्धं स भगवन् संनद्धुकामो यः सत्त्वानां कृतशः संनाहं बध्नाति

tatkasya hetoḥ ākāśena sārdhaṃ sa bhagavan saṃnaddhukāmo yaḥ sattvānāṃ kṛtaśaḥ saṃnāhaṃ badhnāti

8.15.6

महासंनाहसंनद्धो भगवन् बोधिसत्त्वो महासत्त्वः

mahāsaṃnāhasaṃnaddho bhagavan bodhisattvo mahāsattvaḥ

8.15.7

शूरो भगवन् बोधिसत्त्वो महासत्त्वो य आकाशसमानां सत्त्वानां धर्मधातुसमानां सत्त्वानां कृतशः संनाहं संनद्धुकामो ऽनुत्तरां सम्यक्संबोधिमभिसंबोद्धुकामः

śūro bhagavan bodhisattvo mahāsattvo ya ākāśasamānāṃ sattvānāṃ dharmadhātusamānāṃ sattvānāṃ kṛtaśaḥ saṃnāhaṃ saṃnaddhukāmo 'nuttarāṃ samyaksaṃbodhimabhisaṃboddhukāmaḥ

8.15.8

आकाशं स भगवन् परिमोचयितुकामः

ākāśaṃ sa bhagavan parimocayitukāmaḥ

8.15.9

आकाशं स भगवन् उत्क्षेप्तुकामः

ākāśaṃ sa bhagavan utkṣeptukāmaḥ

8.15.10

महावीर्यपारमितासंनाहप्राप्तः स भगवन् बोधिसत्त्वो महासत्त्वो य आकाशसमानां धर्मधातुसमानां सत्त्वानां कृतशः संनाहं संनह्यते

mahāvīryapāramitāsaṃnāhaprāptaḥ sa bhagavan bodhisattvo mahāsattvo ya ākāśasamānāṃ dharmadhātusamānāṃ sattvānāṃ kṛtaśaḥ saṃnāhaṃ saṃnahyate

8.16

अथ खल्वन्यतमो भिक्षुर्येन भगवांस्तेनाञ्जलिं प्रणम्य भगवन्तमेतदवोचत् नमस्करोमि भगवन् प्रज्ञापारमितायै

atha khalvanyatamo bhikṣuryena bhagavāṃstenāñjaliṃ praṇamya bhagavantametadavocat namaskaromi bhagavan prajñāpāramitāyai

8.16.2

तथा हि भगवन् प्रज्ञापारमिता न कंचिद्धर्ममुत्पादयति न कंचिद्धर्मं निरोधयति

tathā hi bhagavan prajñāpāramitā na kaṃciddharmamutpādayati na kaṃciddharmaṃ nirodhayati

8.17

अथ खलु शक्रो देवानामिन्द्र आयुष्मन्तं सुभूतिमेतदवोचत् य आर्य सुभूते अत्र प्रज्ञापारमितायामेव योगमापत्स्यते क्व स योगमापत्स्यते सुभूतिराह आकाशे स कौशिक योगमापत्स्यते यः प्रज्ञापारमितायां योगमापत्स्यते

atha khalu śakro devānāmindra āyuṣmantaṃ subhūtimetadavocat ya ārya subhūte atra prajñāpāramitāyāmeva yogamāpatsyate kva sa yogamāpatsyate subhūtirāha ākāśe sa kauśika yogamāpatsyate yaḥ prajñāpāramitāyāṃ yogamāpatsyate

8.17.2

अभ्यवकाशे स कौशिक योगमापत्स्यते यः प्रज्ञापारमितायां शिक्षितव्यं योगमापत्तव्यं मंस्यते

abhyavakāśe sa kauśika yogamāpatsyate yaḥ prajñāpāramitāyāṃ śikṣitavyaṃ yogamāpattavyaṃ maṃsyate

8.18

अथ खलु शक्रो देवानामिन्द्रो भगवन्तमेतदवोचत् आज्ञापयतु भगवान्

atha khalu śakro devānāmindro bhagavantametadavocat ājñāpayatu bhagavān

8.18.2

तस्य कुलपुत्रस्य वा कुलदुहितुर्वा रक्षावरणगुप्तिं करोमि य इमां प्रज्ञापारमितां धारयति

tasya kulaputrasya vā kuladuhiturvā rakṣāvaraṇaguptiṃ karomi ya imāṃ prajñāpāramitāṃ dhārayati

8.18.3

अथ खल्वायुष्मान् सुभूतिः शक्रं देवानामिन्द्रमेतदवोचत् समनुपश्यसि त्वं कौशिक तं धर्मं यस्य धर्मस्य रक्षावरणगुप्तिं करिष्यसि शक्र आह नो हीदमार्य सुभूते

atha khalvāyuṣmān subhūtiḥ śakraṃ devānāmindrametadavocat samanupaśyasi tvaṃ kauśika taṃ dharmaṃ yasya dharmasya rakṣāvaraṇaguptiṃ kariṣyasi śakra āha no hīdamārya subhūte

8.18.4

सुभूतिराह एवं कौशिक सचेद्बोधिसत्त्वो महासत्त्वो यथानिर्दिष्टायां प्रज्ञापारमितायां स्थास्यति सैव तस्य रक्षावरणगुप्तिर्भविष्यति

subhūtirāha evaṃ kauśika sacedbodhisattvo mahāsattvo yathānirdiṣṭāyāṃ prajñāpāramitāyāṃ sthāsyati saiva tasya rakṣāvaraṇaguptirbhaviṣyati

Aṣṭasāhasrikā