8.5.2

भगवानाह साधु साधु सुभूते

bhagavānāha sādhu sādhu subhūte

8.5.3

एवम् एतत् सुभूते एवम् एतत्

evam etat subhūte evam etat

8.5.4

तत्कस्य हेतोः नामतो ऽपि हि सुभूते सङ्गो निमित्ततो ऽपि सङ्गः

tatkasya hetoḥ nāmato 'pi hi subhūte saṅgo nimittato 'pi saṅgaḥ

8.5.5

एवमुक्ते आयुष्मान् सुभूतिर्भगवन्तमेतदवोचत् आश्चर्यं भगवन् यावदियं प्रज्ञापारमिता स्वाख्याता सुनिर्दिष्टा सुपरिनिष्ठिता यत्र हि नाम भगवता इमे ऽपि सङ्गा आख्याताः

evamukte āyuṣmān subhūtirbhagavantametadavocat āścaryaṃ bhagavan yāvadiyaṃ prajñāpāramitā svākhyātā sunirdiṣṭā supariniṣṭhitā yatra hi nāma bhagavatā ime 'pi saṅgā ākhyātāḥ

8.5.6

अथ खल्वायुष्मान् शारिपुत्र आयुष्मन्तं सुभूतिमेतदवोचत् कतमे ते आयुष्मन् सुभूते सङ्गाः सुभूतिराह रूपमायुष्मन् शारिपुत्र शून्यमिति सङ्गः

atha khalvāyuṣmān śāriputra āyuṣmantaṃ subhūtimetadavocat katame te āyuṣman subhūte saṅgāḥ subhūtirāha rūpamāyuṣman śāriputra śūnyamiti saṅgaḥ

8.5.7

एवं वेदनासंज्ञासंस्काराः

evaṃ vedanāsaṃjñāsaṃskārāḥ

8.5.8

विज्ञानमायुष्मन् शारिपुत्र शून्यमिति सङ्गः

vijñānamāyuṣman śāriputra śūnyamiti saṅgaḥ

8.5.9

अतीतेषु धर्मेष्वतीता धर्मा इति संजानीते सङ्गः

atīteṣu dharmeṣvatītā dharmā iti saṃjānīte saṅgaḥ

8.5.10

अनागतेषु धर्मेष्वनागता धर्मा इति संजानीते सङ्गः

anāgateṣu dharmeṣvanāgatā dharmā iti saṃjānīte saṅgaḥ

8.5.11

प्रत्युत्पन्नेषु धर्मेषु प्रत्युत्पन्ना धर्मा इति संजानीते सङ्गः

pratyutpanneṣu dharmeṣu pratyutpannā dharmā iti saṃjānīte saṅgaḥ

8.5.12

इयन्तं पुण्यस्कन्धं प्रसूयते बोधिसत्त्वयानिकः पुद्गलः प्रथमेन चित्तोत्पादेनेति संजानीते सङ्गः

iyantaṃ puṇyaskandhaṃ prasūyate bodhisattvayānikaḥ pudgalaḥ prathamena cittotpādeneti saṃjānīte saṅgaḥ

8.6

अथ खलु शक्रो देवानामिन्द्र आयुष्मन्तं सुभूतिमेतदवोचत् कतमेन आर्य सुभूते पर्यायेण सङ्गः सुभूतिराह सचेत्कौशिक तद्बोधिचित्तं संजानीते इदं तत्प्रथमं बोधिचित्तमिति अनुत्तरायां सम्यक्संबोधौ परिणामयामीति परिणामयति

atha khalu śakro devānāmindra āyuṣmantaṃ subhūtimetadavocat katamena ārya subhūte paryāyeṇa saṅgaḥ subhūtirāha sacetkauśika tadbodhicittaṃ saṃjānīte idaṃ tatprathamaṃ bodhicittamiti anuttarāyāṃ samyaksaṃbodhau pariṇāmayāmīti pariṇāmayati

8.6.2

न च चित्तप्रकृतिः शक्या परिणामयितुं तेन कुलपुत्रेण वा कुलदुहित्रा वा महायानसम्प्रस्थितेन

na ca cittaprakṛtiḥ śakyā pariṇāmayituṃ tena kulaputreṇa vā kuladuhitrā vā mahāyānasamprasthitena

8.6.3

तस्मात्तर्हि कौशिक परं संदर्शयता समादापयता समुत्तेजयता संप्रहर्षयता अनुत्तरायां सम्यक्संबोधौ भूतानुगमेन संदर्शयितव्यं समादापयितव्यं समुत्तेजयितव्यं संप्रहर्षयितव्यम्

tasmāttarhi kauśika paraṃ saṃdarśayatā samādāpayatā samuttejayatā saṃpraharṣayatā anuttarāyāṃ samyaksaṃbodhau bhūtānugamena saṃdarśayitavyaṃ samādāpayitavyaṃ samuttejayitavyaṃ saṃpraharṣayitavyam

8.6.4

एवमात्मानं च न क्षिणोति बुद्धानुज्ञातया च समादापनया परं समादापयति स कुलपुत्रो वा कुलदुहिता वा

evamātmānaṃ ca na kṣiṇoti buddhānujñātayā ca samādāpanayā paraṃ samādāpayati sa kulaputro vā kuladuhitā vā

8.6.5

इमाश्चास्य सर्वाः सङ्गकोट्यो विवर्जिता भवन्ति

imāścāsya sarvāḥ saṅgakoṭyo vivarjitā bhavanti

8.7

अथ खलु भगवानायुष्मते सुभूतये साधुकारमदात् साधु साधु सुभूते यस्त्वं बोधिसत्त्वान् महासत्त्वानिमाः सङ्गकोटीर्बोधयसि

atha khalu bhagavānāyuṣmate subhūtaye sādhukāramadāt sādhu sādhu subhūte yastvaṃ bodhisattvān mahāsattvānimāḥ saṅgakoṭīrbodhayasi

8.7.2

तेन हि सुभूते अन्यान् अपि सूक्ष्मतरान् सङ्गानाख्यास्यामि तान् शृणु साधु च सुष्ठु च मनसि कुरु

tena hi subhūte anyān api sūkṣmatarān saṅgānākhyāsyāmi tān śṛṇu sādhu ca suṣṭhu ca manasi kuru

8.7.3

भाषिष्ये ऽहं ते

bhāṣiṣye 'haṃ te

8.7.4

साधु भगवन् इत्यायुष्मान् सुभूतिर्भगवतः प्रत्यश्रौषीत्

sādhu bhagavan ityāyuṣmān subhūtirbhagavataḥ pratyaśrauṣīt

Aṣṭasāhasrikā