7.10.34

ते तस्यां तेजःसंवर्तन्यां प्रादुर्भूतायां पुनरेव ततश्च्युतास्तेनैव अक्षीणेन सावशेषेण कर्मणा इहैव लोकधातौ पुनः क्षेप्स्यन्ते

te tasyāṃ tejaḥsaṃvartanyāṃ prādurbhūtāyāṃ punareva tataścyutāstenaiva akṣīṇena sāvaśeṣeṇa karmaṇā ihaiva lokadhātau punaḥ kṣepsyante

7.10.35

क्षिप्ताः सन्तो महानिरयेषूपपत्स्यन्ते

kṣiptāḥ santo mahānirayeṣūpapatsyante

7.10.36

ते पुनरेव तानि महानिरयेषु महान्ति महानिरयदुःखानि प्रत्यनुभविष्यन्ति

te punareva tāni mahānirayeṣu mahānti mahānirayaduḥkhāni pratyanubhaviṣyanti

7.10.37

तावत्प्रत्यनुभविष्यन्ति यावत्पुनरेव तेजःसंवर्तनी प्रादुर्भविष्यति

tāvatpratyanubhaviṣyanti yāvatpunareva tejaḥsaṃvartanī prādurbhaviṣyati

7.10.38

एवं ते बहुदुःखवेदनीयं कर्म प्रत्यनुभविष्यन्ति

evaṃ te bahuduḥkhavedanīyaṃ karma pratyanubhaviṣyanti

7.10.39

तत्कस्य हेतोः यथापि नाम दुर्भाषितत्वाद्वाचः

tatkasya hetoḥ yathāpi nāma durbhāṣitatvādvācaḥ

7.11

अथ खल्वायुष्मान् शारिपुत्रो भगवन्तमेतदवोचत् पञ्च भगवन् आनन्तर्याणि कर्माणि कृतान्युपचितानि अस्य मनोदुश्चरितस्य वाग्दुश्चरितस्य च न प्रतिवर्णिकान्य् अपि न अनुरूपाण्य् अपि न प्रतिरूपाण्य् अपि

atha khalvāyuṣmān śāriputro bhagavantametadavocat pañca bhagavan ānantaryāṇi karmāṇi kṛtānyupacitāni asya manoduścaritasya vāgduścaritasya ca na prativarṇikāny api na anurūpāṇy api na pratirūpāṇy api

7.11.2

भगवानाह एवमेतच्छारिपुत्र एवम् एतत्

bhagavānāha evametacchāriputra evam etat

7.11.3

पञ्चानन्तर्याणि शारिपुत्र कर्माणि कृतान्युपचितान्यस्य मनोदुश्चरितस्य च वाग्दुश्चरितस्य च न प्रतिवर्णिकान्यपि न अनुरूपाण्य् अपि न प्रतिरूपाण्य् अपि अस्य कर्मणः कृतस्य संचितस्य आचितस्य

pañcānantaryāṇi śāriputra karmāṇi kṛtānyupacitānyasya manoduścaritasya ca vāgduścaritasya ca na prativarṇikānyapi na anurūpāṇy api na pratirūpāṇy api asya karmaṇaḥ kṛtasya saṃcitasya ācitasya

7.11.4

ये केचिदिमां गम्भीरां प्रज्ञापारमितां भाष्यमाणां देश्यमानाम् उपदिश्यमानामुद्दिश्यमानां प्रतिबाधितव्यां मंस्यन्ते प्रतिक्षेप्स्यन्ति प्रतिक्रोक्ष्यन्ति नात्र शिक्षितव्यमिति वक्ष्यन्ति नेयं तथागतभाषितेति वाचं भाषिष्यन्ते ततो ऽन्यान् अपि सत्त्वान् विवेचयिष्यन्ति

ye kecidimāṃ gambhīrāṃ prajñāpāramitāṃ bhāṣyamāṇāṃ deśyamānām upadiśyamānāmuddiśyamānāṃ pratibādhitavyāṃ maṃsyante pratikṣepsyanti pratikrokṣyanti nātra śikṣitavyamiti vakṣyanti neyaṃ tathāgatabhāṣiteti vācaṃ bhāṣiṣyante tato 'nyān api sattvān vivecayiṣyanti

7.11.5

ते स्वसंतानानुपहत्य परसंतानानुपहनिष्यन्ति

te svasaṃtānānupahatya parasaṃtānānupahaniṣyanti

7.11.6

ते स्वसंतानान् सविषान् कृत्वा परसंतानान् सविषान् करिष्यन्ति

te svasaṃtānān saviṣān kṛtvā parasaṃtānān saviṣān kariṣyanti

7.11.7

स्वयं नष्टाः परान् अपि नाशयिष्यन्ति

svayaṃ naṣṭāḥ parān api nāśayiṣyanti

7.11.8

स्वयं गम्भीरां प्रज्ञापारमिताम् अजानाना अनवबुध्यमानाः परान् अपि ग्राहयिष्यन्ति नात्र शिक्षितव्यमिति वाचं भाषिष्यन्ते

svayaṃ gambhīrāṃ prajñāpāramitām ajānānā anavabudhyamānāḥ parān api grāhayiṣyanti nātra śikṣitavyamiti vācaṃ bhāṣiṣyante

7.11.9

नाहं शारिपुत्र एवंरूपाणां पुद्गलानां दर्शनमप्यभ्यनुजानामि कुतस्तैः सह संवासं कुतो वा लाभसत्कारं कुतः स्थानम् तत्कस्य हेतोः धर्मदूषका हि ते शारिपुत्र तथारूपाः पुद्गला वेदितव्या इति

nāhaṃ śāriputra evaṃrūpāṇāṃ pudgalānāṃ darśanamapyabhyanujānāmi kutastaiḥ saha saṃvāsaṃ kuto vā lābhasatkāraṃ kutaḥ sthānam tatkasya hetoḥ dharmadūṣakā hi te śāriputra tathārūpāḥ pudgalā veditavyā iti

7.11.10

कसम्बकजातास्ते शारिपुत्र तथारूपाः पुद्गला वेदितव्याः

kasambakajātāste śāriputra tathārūpāḥ pudgalā veditavyāḥ

7.11.11

कृष्णानिर्जातिकाः कृष्णाहिजातिकास्ते शारिपुत्र तथारूपाः पुद्गला वेदितव्याः

kṛṣṇānirjātikāḥ kṛṣṇāhijātikāste śāriputra tathārūpāḥ pudgalā veditavyāḥ

7.11.12

तेषां शारिपुत्र तथारूपाणां पुद्गलानां ये श्रोतव्यं मंस्यन्ते सर्वे ते अनयेन व्यसनमापत्स्यन्ते

teṣāṃ śāriputra tathārūpāṇāṃ pudgalānāṃ ye śrotavyaṃ maṃsyante sarve te anayena vyasanamāpatsyante

7.11.13

ये च शारिपुत्र प्रज्ञापारमितां दूषयन्ति इमे ते शारिपुत्र धर्मदूषकाः पुद्गला वेदितव्याः

ye ca śāriputra prajñāpāramitāṃ dūṣayanti ime te śāriputra dharmadūṣakāḥ pudgalā veditavyāḥ

7.11.14

शारिपुत्र आह न भगवता तस्य पुद्गलस्य तत्रोपपन्नस्य महानिरयगतस्यात्मभावस्य प्रमाणमाख्यातम्

śāriputra āha na bhagavatā tasya pudgalasya tatropapannasya mahānirayagatasyātmabhāvasya pramāṇamākhyātam

Aṣṭasāhasrikā