7.9.3

तत्कस्य हेतोः सर्वधर्मविविक्तत्वात्सुभूते अत्यन्तविविक्तत्वात्सुभूते सर्वधर्माणां न शक्या प्रज्ञापारमिता निर्देष्टुं वा श्रोतुं वा उपलक्षयितुं वा समन्वाहर्तुं वा उपपादयितुं वा उपधारयितुं वा

tatkasya hetoḥ sarvadharmaviviktatvātsubhūte atyantaviviktatvātsubhūte sarvadharmāṇāṃ na śakyā prajñāpāramitā nirdeṣṭuṃ vā śrotuṃ vā upalakṣayituṃ vā samanvāhartuṃ vā upapādayituṃ vā upadhārayituṃ vā

7.9.4

न चान्यत्र स्कन्धधात्वायतनेभ्यः प्रज्ञापारमिता अवबोद्धव्या

na cānyatra skandhadhātvāyatanebhyaḥ prajñāpāramitā avaboddhavyā

7.9.5

तत्कस्य हेतोः स्कन्धधात्वायतनमेव हि सुभूते शून्यं विविक्तं शान्तम्

tatkasya hetoḥ skandhadhātvāyatanameva hi subhūte śūnyaṃ viviktaṃ śāntam

7.9.6

इति हि प्रज्ञापारमिता च स्कन्धधात्वायतनं च अद्वयम् एतद् अद्वैधीकारं शून्यत्वाद्विविक्तत्वात्

iti hi prajñāpāramitā ca skandhadhātvāyatanaṃ ca advayam etad advaidhīkāraṃ śūnyatvādviviktatvāt

7.9.7

एवं शान्तत्वान्नोपलभ्यते

evaṃ śāntatvānnopalabhyate

7.9.8

यो ऽनुपलम्भः सर्वधर्माणाम् सा प्रज्ञापारमितेत्युच्यते

yo 'nupalambhaḥ sarvadharmāṇām sā prajñāpāramitetyucyate

7.9.9

यदा न भवति संज्ञा समज्ञा प्रज्ञप्तिर्व्यवहारः तदा प्रज्ञापारमितेत्युच्यते

yadā na bhavati saṃjñā samajñā prajñaptirvyavahāraḥ tadā prajñāpāramitetyucyate

7.10

स्थविरः सुभूतिराह कियच्चिरचरितावी स भगवन् बोधिसत्त्वो महासत्त्वो वेदितव्यो य इह गम्भीरायां प्रज्ञापारमितायां योगमापत्स्यते भगवानाह विभज्य व्याकरणीयमेतत्सुभूते बोधिसत्त्वानां महासत्त्वानामिन्द्रियाधिमात्रतया

sthaviraḥ subhūtirāha kiyacciracaritāvī sa bhagavan bodhisattvo mahāsattvo veditavyo ya iha gambhīrāyāṃ prajñāpāramitāyāṃ yogamāpatsyate bhagavānāha vibhajya vyākaraṇīyametatsubhūte bodhisattvānāṃ mahāsattvānāmindriyādhimātratayā

7.10.2

स्यात्खलु पुनः सुभूते पर्यायो येन पर्यायेण बोधिसत्त्वा बहूनि बुद्धशतानि बहूनि बुद्धसहस्राणि बहूनि बुद्धशतसहस्राणि दृष्ट्वा तेषामन्तिके ब्रह्मचर्यं चरित्वा इमां प्रज्ञापारमितां न श्रद्दध्युर्नाधिमुञ्चेयुः

syātkhalu punaḥ subhūte paryāyo yena paryāyeṇa bodhisattvā bahūni buddhaśatāni bahūni buddhasahasrāṇi bahūni buddhaśatasahasrāṇi dṛṣṭvā teṣāmantike brahmacaryaṃ caritvā imāṃ prajñāpāramitāṃ na śraddadhyurnādhimuñceyuḥ

7.10.3

तत्कस्य हेतोः पूर्वम् अपि तेषां बुद्धानां भगवतामन्तिकादस्यां गम्भीरायां प्रज्ञापारमितायां भाष्यमाणायां देश्यमानायाम् उपदिश्यमानायाम् अगौरवता अभूत्

tatkasya hetoḥ pūrvam api teṣāṃ buddhānāṃ bhagavatāmantikādasyāṃ gambhīrāyāṃ prajñāpāramitāyāṃ bhāṣyamāṇāyāṃ deśyamānāyām upadiśyamānāyām agauravatā abhūt

7.10.4

अगौरवतया अशुश्रूषणता अशुश्रूषणतया अपर्युपासनता अपर्युपासनतया अपरिपृच्छनता अपरिपृच्छनतया अश्रद्दधानता अश्रद्दधानतया ततः पर्षद्ध्यो ऽपक्रान्ताः ते ततोनिदानं धर्मव्यसनसंवर्तनीयेन कर्मणा कृतेन संचितेन आचितेन उपचितेन एतर्ह्य् अपि गम्भीरायां प्रज्ञापारमितायां भाष्यमाणायां देश्यमानायाम् उपदिश्यमानायाम्

agauravatayā aśuśrūṣaṇatā aśuśrūṣaṇatayā aparyupāsanatā aparyupāsanatayā aparipṛcchanatā aparipṛcchanatayā aśraddadhānatā aśraddadhānatayā tataḥ parṣaddhyo 'pakrāntāḥ te tatonidānaṃ dharmavyasanasaṃvartanīyena karmaṇā kṛtena saṃcitena ācitena upacitena etarhy api gambhīrāyāṃ prajñāpāramitāyāṃ bhāṣyamāṇāyāṃ deśyamānāyām upadiśyamānāyām

7.10.5

अगौरवतया अश्रद्दधाना अनधिमुञ्चन्तो न कायेन न चित्तेन सामग्रीं ददति

agauravatayā aśraddadhānā anadhimuñcanto na kāyena na cittena sāmagrīṃ dadati

7.10.6

ते सामग्रीम् अददाना इमां प्रज्ञापारमितां न जानन्ति न पश्यन्ति न बुध्यन्ते न वेदयन्ते

te sāmagrīm adadānā imāṃ prajñāpāramitāṃ na jānanti na paśyanti na budhyante na vedayante

7.10.7

एवं ते प्रज्ञापारमितां न श्रद्दधति

evaṃ te prajñāpāramitāṃ na śraddadhati

7.10.8

अश्रद्दधाना न शृण्वन्ति

aśraddadhānā na śṛṇvanti

7.10.9

अशृण्वन्तो न जानन्ति

aśṛṇvanto na jānanti

7.10.10

अजानन्तो न पश्यन्ति

ajānanto na paśyanti

7.10.11

अपश्यन्तो न

na budhyante

7.10.12

अबुध्यमाना धर्मव्यसनसंवर्तनीयं कर्म कुर्वन्ति संचिन्वन्ति आचिन्वन्ति उपचिन्वन्ति

abudhyamānā dharmavyasanasaṃvartanīyaṃ karma kurvanti saṃcinvanti ācinvanti upacinvanti

7.10.13

ते तेन धर्मव्यसनसंवर्तनीयेन कर्मणा कृतेन संचितेन आचितेन उपचितेन दुष्प्रज्ञसंवर्तनीयं कर्माभिसंस्करिष्यन्ति

te tena dharmavyasanasaṃvartanīyena karmaṇā kṛtena saṃcitena ācitena upacitena duṣprajñasaṃvartanīyaṃ karmābhisaṃskariṣyanti

Aṣṭasāhasrikā