7.7.8

सचेदेवम् अपि भगवन् बोधिसत्त्वो महासत्त्वः संजानीते चरति प्रज्ञापारमितायाम्

sacedevam api bhagavan bodhisattvo mahāsattvaḥ saṃjānīte carati prajñāpāramitāyām

7.7.9

किं पुनरेवं संजानानः एवमहं सर्वज्ञज्ञानसमन्वागतः सत्त्वेभ्यो धर्मं देशयिष्यामि एवमिमान् सत्त्वान् परिनिर्वापयिष्यामीति

kiṃ punarevaṃ saṃjānānaḥ evamahaṃ sarvajñajñānasamanvāgataḥ sattvebhyo dharmaṃ deśayiṣyāmi evamimān sattvān parinirvāpayiṣyāmīti

7.7.10

तत्कस्य हेतोः न ह्येष प्रज्ञापारमितानिष्यन्दो य इमान् सत्त्वान् परिनिर्वापयिष्यामीति सत्त्वोपलम्भः

tatkasya hetoḥ na hyeṣa prajñāpāramitāniṣyando ya imān sattvān parinirvāpayiṣyāmīti sattvopalambhaḥ

7.7.11

एष एवास्य महानुपलम्भः स्यात्

eṣa evāsya mahānupalambhaḥ syāt

7.7.12

तत्कस्य हेतोः सत्त्वास्वभावजातिका हि प्रज्ञापारमिता वेदितव्या

tatkasya hetoḥ sattvāsvabhāvajātikā hi prajñāpāramitā veditavyā

7.7.13

सत्त्वास्वभावतया प्रज्ञापारमितास्वभावता वेदितव्या

sattvāsvabhāvatayā prajñāpāramitāsvabhāvatā veditavyā

7.7.14

सत्त्वविविक्ततया प्रज्ञापारमिताविविक्तता वेदितव्या

sattvaviviktatayā prajñāpāramitāviviktatā veditavyā

7.7.15

सत्त्वाचिन्त्यतया प्रज्ञापारमिताचिन्त्यता वेदितव्या

sattvācintyatayā prajñāpāramitācintyatā veditavyā

7.7.16

सत्त्वाविनाशधर्मतया प्रज्ञापारमिताविनाशधर्मता वेदितव्या

sattvāvināśadharmatayā prajñāpāramitāvināśadharmatā veditavyā

7.7.17

सत्त्वानभिसंबोधनतया प्रज्ञापारमितानभिसंबोधनता वेदितव्या

sattvānabhisaṃbodhanatayā prajñāpāramitānabhisaṃbodhanatā veditavyā

7.7.18

सत्त्वयथाभूतार्थानभिसंबोधनतया प्रज्ञापारमितायथाभूतार्थानभिसंबोधनता वेदितव्या

sattvayathābhūtārthānabhisaṃbodhanatayā prajñāpāramitāyathābhūtārthānabhisaṃbodhanatā veditavyā

7.7.19

सत्त्वबलसमुदागमनतया तथागतबलसमुदागमनता वेदितव्या

sattvabalasamudāgamanatayā tathāgatabalasamudāgamanatā veditavyā

7.7.20

अनेन भगवन् पर्यायेण महापारमितेयं यदुत प्रज्ञापारमिता

anena bhagavan paryāyeṇa mahāpāramiteyaṃ yaduta prajñāpāramitā

7.8

अथ खल्वायुष्मान् शारिपुत्रो भगवन्तमेतदवोचत् यो भगवन् इह गम्भीरायां प्रज्ञापारमितायां बोधिसत्त्वो महासत्त्वो ऽधिमोक्षयिष्यति न काङ्क्षिष्यति न विचिकित्सिष्यति न धन्धायिष्यति कुतः स भगवंश्च्युत इहोपपन्नो वेदितव्यः कियच्चिरचरितावी च स भगवन् बोधिसत्त्वो महासत्त्वो वेदितव्यः य इमां प्रज्ञापारमितामर्थतश् च धर्मतश् च अर्थनयतश् च धर्मनयतश् च अनुगमिष्यति अनुभोत्स्यते ऽनुबोधयिष्यति च एवमुक्ते भगवानायुष्मन्तं शारिपुत्रमेतदवोचत् स शारिपुत्र बोधिसत्त्वो महासत्त्वो ऽन्येभ्यो लोकधातुभ्यश्च्युतो बुद्धान् भगवतः पर्युपास्य परिपृच्छ्य इहोपपन्नो वेदितव्यः

atha khalvāyuṣmān śāriputro bhagavantametadavocat yo bhagavan iha gambhīrāyāṃ prajñāpāramitāyāṃ bodhisattvo mahāsattvo 'dhimokṣayiṣyati na kāṅkṣiṣyati na vicikitsiṣyati na dhandhāyiṣyati kutaḥ sa bhagavaṃścyuta ihopapanno veditavyaḥ kiyacciracaritāvī ca sa bhagavan bodhisattvo mahāsattvo veditavyaḥ ya imāṃ prajñāpāramitāmarthataś ca dharmataś ca arthanayataś ca dharmanayataś ca anugamiṣyati anubhotsyate 'nubodhayiṣyati ca evamukte bhagavānāyuṣmantaṃ śāriputrametadavocat sa śāriputra bodhisattvo mahāsattvo 'nyebhyo lokadhātubhyaścyuto buddhān bhagavataḥ paryupāsya paripṛcchya ihopapanno veditavyaḥ

7.8.2

तत्कस्य हेतोः यः कश्चिच्छारिपुत्र बोधिसत्त्वो महासत्त्वो ऽन्येभ्यो लोकधातुभ्यश्च्युतो बुद्धान् भगवतः पर्युपास्य परिपृच्छ्य इहोपपन्नो भवति स इमां गम्भीरां प्रज्ञापारमितां भाष्यमाणां देश्यमानाम् उपदिश्यमानाम् उद्दिश्यमानां शृणुयात् इमां प्रज्ञापारमितां श्रुत्वा अत्र शास्तृसंज्ञां प्रज्ञापारमितायामुत्पादयेत् शास्ता मे संमुखीभूत् इति शास्ता मे दृष्ट इति चित्तमुत्पादयति

tatkasya hetoḥ yaḥ kaścicchāriputra bodhisattvo mahāsattvo 'nyebhyo lokadhātubhyaścyuto buddhān bhagavataḥ paryupāsya paripṛcchya ihopapanno bhavati sa imāṃ gambhīrāṃ prajñāpāramitāṃ bhāṣyamāṇāṃ deśyamānām upadiśyamānām uddiśyamānāṃ śṛṇuyāt imāṃ prajñāpāramitāṃ śrutvā atra śāstṛsaṃjñāṃ prajñāpāramitāyāmutpādayet śāstā me saṃmukhībhūt iti śāstā me dṛṣṭa iti cittamutpādayati

7.8.3

प्रज्ञापारमितायां भाष्यमाणायां देश्यमानायाम् उपदिश्यमानायाम् उद्दिश्यमानायां श्रोत्रमवदधाति सत्कृत्य शृणोति कथां नोपच्छिनत्ति

prajñāpāramitāyāṃ bhāṣyamāṇāyāṃ deśyamānāyām upadiśyamānāyām uddiśyamānāyāṃ śrotramavadadhāti satkṛtya śṛṇoti kathāṃ nopacchinatti

7.8.4

चिरचरितावी स शारिपुत्र तथारूपो बोधिसत्त्वो महासत्त्वो वेदितव्यः

ciracaritāvī sa śāriputra tathārūpo bodhisattvo mahāsattvo veditavyaḥ

7.8.5

बहुबुद्धपर्युपासितः स शारिपुत्र तथारूपो बोधिसत्त्वो महासत्त्वो वेदितव्यः

bahubuddhaparyupāsitaḥ sa śāriputra tathārūpo bodhisattvo mahāsattvo veditavyaḥ

7.9

अथ खल्वायुष्मान् सुभूतिर्भगवन्तमेतदवोचत् शक्या पुनर्भगवन् प्रज्ञापारमिता श्रोतुं वा उपलक्षयितुं वा समन्वाहर्तुं वा उपपादयितुं वा उपधारयितुं वा इयं सा प्रज्ञापारमिता इह वा सा प्रज्ञापारमिता अमुत्र वा सा प्रज्ञापारमिता अनेन वा आकारेण लिङ्गेन निमित्तेनेति शक्या निर्देष्टुं वा श्रोतुं वा भगवानाह नो हीदं सुभूते

atha khalvāyuṣmān subhūtirbhagavantametadavocat śakyā punarbhagavan prajñāpāramitā śrotuṃ vā upalakṣayituṃ vā samanvāhartuṃ vā upapādayituṃ vā upadhārayituṃ vā iyaṃ sā prajñāpāramitā iha vā sā prajñāpāramitā amutra vā sā prajñāpāramitā anena vā ākāreṇa liṅgena nimitteneti śakyā nirdeṣṭuṃ vā śrotuṃ vā bhagavānāha no hīdaṃ subhūte

7.9.2

नेयं सुभूते प्रज्ञापारमिता स्कन्धशो वा धातुशो वा आयतनशो वा शक्या निर्देष्टुं वा श्रोतुं वा उपलक्षयितुं वा समन्वाहर्तुं वा उपपादयितुं वा उपधारयितुं वा

neyaṃ subhūte prajñāpāramitā skandhaśo vā dhātuśo vā āyatanaśo vā śakyā nirdeṣṭuṃ vā śrotuṃ vā upalakṣayituṃ vā samanvāhartuṃ vā upapādayituṃ vā upadhārayituṃ vā

Aṣṭasāhasrikā