3.12.2

एवमुक्ते भगवान् शक्रं देवानामिन्द्रमेतदवोचत् एवमेतत्कौशिक एवम् एतत्

evamukte bhagavān śakraṃ devānāmindrametadavocat evametatkauśika evam etat

3.12.3

अल्पकास्ते जाम्बूद्वीपका मनुष्या ये बुद्धे ऽवेत्य प्रसादेन समन्वागताः ये धर्मे ऽवेत्य प्रसादेन समन्वागताः ये संघे ऽवेत्य प्रसादेन समन्वागताः

alpakāste jāmbūdvīpakā manuṣyā ye buddhe 'vetya prasādena samanvāgatāḥ ye dharme 'vetya prasādena samanvāgatāḥ ye saṃghe 'vetya prasādena samanvāgatāḥ

3.12.4

तेभ्यः कौशिक अल्पेभ्यो ऽल्पतरकास्ते ये स्रोतआपत्तिफलं प्राप्नुवन्ति ततः सकृदागामिफलमनागामिफलम्

tebhyaḥ kauśika alpebhyo 'lpatarakāste ye srotaāpattiphalaṃ prāpnuvanti tataḥ sakṛdāgāmiphalamanāgāmiphalam

3.12.5

तेभ्यो ऽप्यल्पेभ्यो ऽल्पतरकास्ते ये ऽर्हत्त्वं प्राप्नुवन्ति

tebhyo 'pyalpebhyo 'lpatarakāste ye 'rhattvaṃ prāpnuvanti

3.12.6

तेभ्यो ऽप्यल्पेभ्यो ऽल्पतरकास्ते ये प्रत्येकबोधिं साक्षात्कुर्वन्ति

tebhyo 'pyalpebhyo 'lpatarakāste ye pratyekabodhiṃ sākṣātkurvanti

3.12.7

तेभ्यो ऽप्यल्पेभ्यो ऽल्पतरकास्ते ये ऽनुत्तरायां सम्यक्संबोधौ चित्तान्युत्पादयन्ति

tebhyo 'pyalpebhyo 'lpatarakāste ye 'nuttarāyāṃ samyaksaṃbodhau cittānyutpādayanti

3.12.8

तेभ्यो ऽप्यल्पेभ्यो ऽल्पतरकास्ते ये ऽनुत्तरायां सम्यक्संबोधौ चित्तान्युत्पाद्य तं चित्तोत्पादं बृंहयन्ति

tebhyo 'pyalpebhyo 'lpatarakāste ye 'nuttarāyāṃ samyaksaṃbodhau cittānyutpādya taṃ cittotpādaṃ bṛṃhayanti

3.12.9

तेभ्यो ऽप्यल्पेभ्यो ऽल्पतरकास्ते ये ऽनुत्तरायां सम्यक्संबोधौ चित्तान्युत्पाद्य उपबृंहयित्वा च आरब्धवीर्या विहरन्ति

tebhyo 'pyalpebhyo 'lpatarakāste ye 'nuttarāyāṃ samyaksaṃbodhau cittānyutpādya upabṛṃhayitvā ca ārabdhavīryā viharanti

3.12.10

तेभ्यो ऽप्यल्पेभ्यो ऽल्पतरकास्ते ये प्रज्ञापारमितायां योगमापद्यन्ते

tebhyo 'pyalpebhyo 'lpatarakāste ye prajñāpāramitāyāṃ yogamāpadyante

3.12.11

तेभ्यो ऽप्यल्पेभ्यो ऽल्पतरकास्ते ये प्रज्ञापारमितायां चरन्ति

tebhyo 'pyalpebhyo 'lpatarakāste ye prajñāpāramitāyāṃ caranti

3.12.12

तेभ्यो ऽप्यल्पेभ्यो ऽल्पतरकास्ते ये प्रज्ञापारमितायां चरन्तो घटमाना अविनिवर्तनीयायां बोधिसत्त्वभूमाववतिष्ठन्ते

tebhyo 'pyalpebhyo 'lpatarakāste ye prajñāpāramitāyāṃ caranto ghaṭamānā avinivartanīyāyāṃ bodhisattvabhūmāvavatiṣṭhante

3.12.13

तेभ्यो ऽप्यल्पेभ्यो ऽल्पतरकास्ते ये प्रज्ञापारमितायां चरन्तो घटमाना अनुत्तरां सम्यक्संबोधिमभिसंभोत्स्यन्ते

tebhyo 'pyalpebhyo 'lpatarakāste ye prajñāpāramitāyāṃ caranto ghaṭamānā anuttarāṃ samyaksaṃbodhimabhisaṃbhotsyante

3.12.14

तेभ्यो ऽप्यल्पेभ्यो ऽल्पतरकास्ते ये प्रज्ञापारमितायां चरन्तो घटमाना अनुत्तरां सम्यक्संबोधिमभिसंबुध्यन्ते

tebhyo 'pyalpebhyo 'lpatarakāste ye prajñāpāramitāyāṃ caranto ghaṭamānā anuttarāṃ samyaksaṃbodhimabhisaṃbudhyante

3.12.15

ते ते कौशिक बोधिसत्त्वा महासत्त्वा ये अविनिवर्तनीयायां बोधिसत्त्वभूमौ स्थित्वा अनुत्तरां सम्यक्संबोधिमभिसंबुध्य अन्येषामध्याशयसम्पन्नानां कुलपुत्राणां कुलदुहितॄणां च प्रज्ञापारमितायां शिक्षमाणानां घटमानानां प्रज्ञापारमितामुपदिशन्ति च उद्दिशन्ति

te te kauśika bodhisattvā mahāsattvā ye avinivartanīyāyāṃ bodhisattvabhūmau sthitvā anuttarāṃ samyaksaṃbodhimabhisaṃbudhya anyeṣāmadhyāśayasampannānāṃ kulaputrāṇāṃ kuladuhitṝṇāṃ ca prajñāpāramitāyāṃ śikṣamāṇānāṃ ghaṭamānānāṃ prajñāpāramitāmupadiśanti ca uddiśanti

3.12.16

ते चोद्गृह्णन्ति धारयन्ति वाचयन्ति पर्यवाप्नुवन्ति प्रवर्तयन्ति उपदेशयन्ति उपदिशन्ति उद्दिशन्ति स्वाध्यायन्ति

te codgṛhṇanti dhārayanti vācayanti paryavāpnuvanti pravartayanti upadeśayanti upadiśanti uddiśanti svādhyāyanti

3.12.17

तां चैनां प्रज्ञापारमितां पुष्पैर् धूपैर् गन्धैर् माल्यैर् विलेपनैश्चूर्णैर् वस्त्रैश्छत्रैर् ध्वजैर्घण्टाभिः पताकाभिः समन्ताच्च दीपमालाभिः बहुविधाभिश् च पूजाभिः सत्कुर्वन्ति गुरुकुर्वन्ति मानयन्ति पूजयन्ति अर्चयन्ति अपचायन्ति

tāṃ caināṃ prajñāpāramitāṃ puṣpair dhūpair gandhair mālyair vilepanaiścūrṇair vastraiśchatrair dhvajairghaṇṭābhiḥ patākābhiḥ samantācca dīpamālābhiḥ bahuvidhābhiś ca pūjābhiḥ satkurvanti gurukurvanti mānayanti pūjayanti arcayanti apacāyanti

3.12.18

सन्ति खलु पुनः कौशिक अप्रमेया असंख्येयाः सत्त्वाः ये बोधिचित्तमुत्पादयन्ति बोधिचित्तमुत्पाद्य बोधिचित्तमुपबृंहयन्ति बोधिचित्तमुपबृंहयित्वा बोधाय चरन्ति

santi khalu punaḥ kauśika aprameyā asaṃkhyeyāḥ sattvāḥ ye bodhicittamutpādayanti bodhicittamutpādya bodhicittamupabṛṃhayanti bodhicittamupabṛṃhayitvā bodhāya caranti

3.12.19

तेषां खलु पुनः कौशिक अप्रमेयाणामसंख्येयानां सत्त्वानां बोधाय चरताम् अपि यद्येको वा द्वौ वा अविनिवर्तनीयायां बोधिसत्त्वभूमाववतिष्ठेयाताम्

teṣāṃ khalu punaḥ kauśika aprameyāṇāmasaṃkhyeyānāṃ sattvānāṃ bodhāya caratām api yadyeko vā dvau vā avinivartanīyāyāṃ bodhisattvabhūmāvavatiṣṭheyātām

3.12.20

तत्कस्य हेतोः दुरभिसंभवा हि कौशिक अनुत्तरा सम्यक्संबोधिर्हीनवीर्यैः कुसीदैर्हीनसत्त्वैर् हीनचित्तैर्हीनसंज्ञैर् हीनाधिमुक्तिकैर्हीनप्रज्ञैः

tatkasya hetoḥ durabhisaṃbhavā hi kauśika anuttarā samyaksaṃbodhirhīnavīryaiḥ kusīdairhīnasattvair hīnacittairhīnasaṃjñair hīnādhimuktikairhīnaprajñaiḥ

3.12.21

तस्मात्तर्हि कौशिक कुलपुत्रेण वा कुलदुहित्रा वा क्षिप्रं चानुत्तरां सम्यक्संबोधिम् अभिसंबोद्धुकामेन इयमेव प्रज्ञापारमिता सुखं अभीक्ष्णं श्रोतव्या उद्ग्रहीतव्या धारयितव्या वाचयितव्या पर्यवाप्तव्या प्रवर्तयितव्या देशयितव्या उपदेष्टव्या उद्देष्टव्या स्वाध्यातव्या परिप्रष्टव्या

tasmāttarhi kauśika kulaputreṇa vā kuladuhitrā vā kṣipraṃ cānuttarāṃ samyaksaṃbodhim abhisaṃboddhukāmena iyameva prajñāpāramitā sukhaṃ abhīkṣṇaṃ śrotavyā udgrahītavyā dhārayitavyā vācayitavyā paryavāptavyā pravartayitavyā deśayitavyā upadeṣṭavyā uddeṣṭavyā svādhyātavyā paripraṣṭavyā

Aṣṭasāhasrikā