2.18.8

विज्ञानस्य हि कौशिक नान्तो न मध्यं न पर्यवसानमुपलभ्यते

vijñānasya hi kauśika nānto na madhyaṃ na paryavasānamupalabhyate

2.18.9

अनेनापि कौशिक पर्यायेण आरम्बणानन्ततया अनन्तपारमितेयं यदुत प्रज्ञापारमिता

anenāpi kauśika paryāyeṇa ārambaṇānantatayā anantapāramiteyaṃ yaduta prajñāpāramitā

2.19

पुनरपरं कौशिक सत्त्वो ऽनन्तो ऽपर्यन्तः

punaraparaṃ kauśika sattvo 'nanto 'paryantaḥ

2.19.2

तत्कस्य हेतोः न हि सत्त्वस्यान्तो वा मध्यं वा पर्यवसानं वोपलभ्यते

tatkasya hetoḥ na hi sattvasyānto vā madhyaṃ vā paryavasānaṃ vopalabhyate

2.19.3

तस्मात्कौशिक सत्त्वानन्ततया अनन्तपारमितेयं यदुत प्रज्ञापारमिता

tasmātkauśika sattvānantatayā anantapāramiteyaṃ yaduta prajñāpāramitā

2.19.4

अथ खलु शक्रो देवानामिन्द्र आयुष्मन्तं सुभूतिमेतदवोचत् कथमायुष्मन् सुभूते सत्त्वानन्ततया अनन्तपारमितेयं यदुत प्रज्ञापारमिता स्थविरः सुभूतिराह न हि कौशिक गणनायोगेन वा गणनाबहुत्वेन वा सत्त्वानन्ततया अनन्तपारमितेयं यदुत प्रज्ञापारमिता

atha khalu śakro devānāmindra āyuṣmantaṃ subhūtimetadavocat kathamāyuṣman subhūte sattvānantatayā anantapāramiteyaṃ yaduta prajñāpāramitā sthaviraḥ subhūtirāha na hi kauśika gaṇanāyogena vā gaṇanābahutvena vā sattvānantatayā anantapāramiteyaṃ yaduta prajñāpāramitā

2.20

शक्र आह कथं तर्हीदानीमार्य सुभूते सत्त्वानन्ततया अनन्तपारमितेयं यदुत प्रज्ञापारमिता स्थविरः सुभूतिराह तत्कं मन्यसे कौशिक कतमस्यैतद्धर्मस्याधिवचनं यदुत सत्त्वः सत्त्व इति शक्र आह नैतदार्य सुभूते धर्मस्याधिवचनं न अधर्माधिवचनं यदुत सत्त्वः सत्त्व इति

śakra āha kathaṃ tarhīdānīmārya subhūte sattvānantatayā anantapāramiteyaṃ yaduta prajñāpāramitā sthaviraḥ subhūtirāha tatkaṃ manyase kauśika katamasyaitaddharmasyādhivacanaṃ yaduta sattvaḥ sattva iti śakra āha naitadārya subhūte dharmasyādhivacanaṃ na adharmādhivacanaṃ yaduta sattvaḥ sattva iti

2.20.2

आगन्तुकमेतन्नामधेयं प्रक्षिप्तम्

āgantukametannāmadheyaṃ prakṣiptam

2.20.3

अवस्तुकमेतन्नामधेयं प्रक्षिप्तम्

avastukametannāmadheyaṃ prakṣiptam

2.20.4

अनात्मीयम् एतन्नामधेयं प्रक्षिप्तम्

anātmīyam etannāmadheyaṃ prakṣiptam

2.20.5

अनारम्बणमेतन्नामधेयं प्रक्षिप्तं यदुत सत्त्वः सत्त्व इति

anārambaṇametannāmadheyaṃ prakṣiptaṃ yaduta sattvaḥ sattva iti

2.20.6

स्थविरः सुभूतिराह तत्किं मन्यसे कौशिक काचिदत्र सत्त्वपरिदीपना कृता शक्र आह नो हीदमार्य सुभूते

sthaviraḥ subhūtirāha tatkiṃ manyase kauśika kācidatra sattvaparidīpanā kṛtā śakra āha no hīdamārya subhūte

2.20.7

सुभूतिराह यत्र कौशिक न काचित्सत्त्वपरिदीपना कृता तत्र का सत्त्वानन्तता सचेत्कौशिक तथागतो ऽर्हन् सम्यक्संबुद्धो ऽनन्तविज्ञप्तिघोषेण गम्भीरनिर्घोषेण स्वरेण गङ्गानदीवालुकोपमान् कल्पान् अपि वितिष्ठमानः सत्त्वः सत्त्व इति वाचं भाषेत अपि नु तत्र कश्चित्सत्त्व उत्पन्नो व उत्पत्स्यते वा उत्पद्यते वा निरुद्धो वा निरोत्स्यते वा निरुध्यते वा शक्र आह नो हीदमार्य सुभूते

subhūtirāha yatra kauśika na kācitsattvaparidīpanā kṛtā tatra kā sattvānantatā sacetkauśika tathāgato 'rhan samyaksaṃbuddho 'nantavijñaptighoṣeṇa gambhīranirghoṣeṇa svareṇa gaṅgānadīvālukopamān kalpān api vitiṣṭhamānaḥ sattvaḥ sattva iti vācaṃ bhāṣeta api nu tatra kaścitsattva utpanno va utpatsyate vā utpadyate vā niruddho vā nirotsyate vā nirudhyate vā śakra āha no hīdamārya subhūte

2.20.8

तत्कस्य हेतोः आदिशुद्धत्वादादिपरिशुद्धत्वात्सत्त्वस्य

tatkasya hetoḥ ādiśuddhatvādādipariśuddhatvātsattvasya

2.20.9

सुभूतिराह अनेनापि कौशिक पर्यायेण एवं सत्त्वानन्ततया अनन्तपारमितेयं यदुत प्रज्ञापारमिता

subhūtirāha anenāpi kauśika paryāyeṇa evaṃ sattvānantatayā anantapāramiteyaṃ yaduta prajñāpāramitā

2.20.10

एवं च पुनः कौशिक सत्त्वानन्ततया प्रज्ञापारमितानन्तता वेदितव्या

evaṃ ca punaḥ kauśika sattvānantatayā prajñāpāramitānantatā veditavyā

2.21

अथ खलु सेन्द्रका देवाः सब्रह्मकाः सप्रजापतिकाः सर्षिनरनारीगणास् त्रिरुदानम् उदानयन्ति स्म अहो धर्मः अहो धर्मः अहो धर्मस्य धर्मता

atha khalu sendrakā devāḥ sabrahmakāḥ saprajāpatikāḥ sarṣinaranārīgaṇās trirudānam udānayanti sma aho dharmaḥ aho dharmaḥ aho dharmasya dharmatā

2.21.2

यस्तथागतस्य प्रादुर्भावः स आर्येण सुभूतिना स्थविरेण सुभाषितेनेह सूच्यते देश्यते प्रकाश्यते प्रभाव्यते

yastathāgatasya prādurbhāvaḥ sa āryeṇa subhūtinā sthavireṇa subhāṣiteneha sūcyate deśyate prakāśyate prabhāvyate

2.21.3

तथागतं तं वयं भगवन् बोधिसत्त्वं महासत्त्वमद्याग्रेण धारयिष्यामो यो ऽनया प्रज्ञापारमितया अविरहितो भविष्यति यो ऽपि च अनेन बोधिसत्त्वो महासत्त्वः प्रज्ञापारमिताविहारेण विहरिष्यति

tathāgataṃ taṃ vayaṃ bhagavan bodhisattvaṃ mahāsattvamadyāgreṇa dhārayiṣyāmo yo 'nayā prajñāpāramitayā avirahito bhaviṣyati yo 'pi ca anena bodhisattvo mahāsattvaḥ prajñāpāramitāvihāreṇa vihariṣyati

2.22

अथ खलु भगवांस्तान् सेन्द्रकान् सब्रह्मकान् सप्रजापतिकान् सर्षिनरनारीगणानामन्त्रयते स्म एवमेतद्देवपुत्राः एवम् एतत्

atha khalu bhagavāṃstān sendrakān sabrahmakān saprajāpatikān sarṣinaranārīgaṇānāmantrayate sma evametaddevaputrāḥ evam etat

Aṣṭasāhasrikā